Abụ Ọma 92
Abụ Ọma. Abụ maka ụbọchị izuike.
Ekele maka ịdị mma Chineke
1 Ọ bụ ihe ziri ezi ito Onyenwe anyị,
na iti egwu nye aha gị, gị Onye kachasị ihe niile elu,
2 ikwupụta ịhụnanya gị nʼụtụtụ,
na ikwesi ntụkwasị obi gị nʼabalị,
3 jiri ihe iti egwu ụbọ akwara
na une bụọrọ gị abụ dị ụtọ.
4 Nʼihi na ị na-eme ka obi dị m ụtọ, site nʼọrụ gị niile, o Onyenwe anyị,
Ọ bụ ya mere m ji na-abụ abụ ọṅụ.
5 Lee ka ọrụ gị si dị ukwuu, Onyenwe anyị.
Leekwa ụdị echiche miri emi ị na-eche.
6 Ndị uche kọrọ amaghị nke a,
ndị nzuzu enweghị nghọta,
7 ọ bụ ezie na ndị ajọ omume na-etopụta dịka ahịhịa
ndị na-emekwa ajọ ihe na-eto na-awasa,
a ga-ala ha nʼiyi ruo mgbe ebighị ebi.
8 Ma gị, O Onyenwe anyị, bụ onye e buliri elu ruo mgbe ebighị ebi.
9 Nʼezie, ndị iro gị niile, Onyenwe anyị,
e ndị iro gị niile ga-ala nʼiyi;
ndị niile na-eme ajọ ihe ka a ga-achụsasị.
10 I meela ka mpi m dị elu dịka oke ehi na-akpa ike;
awụsala m mmanụ dị mma.
11 Ejirila m anya m abụọ hụ ka e meriri ndị iro m;
ejirila m ntị m nụ maka ịla nʼiyi nke ndị iro m afọ tara mmiri.
12 Ma ndị ezi omume ga-awa igu dịka osisi nkwụ;
ha ga-ebukwa ibu dịka osisi ukwu sida nke Lebanọn,
13 nke a kụrụ nʼime ụlọ Onyenwe anyị,
ha ga-eto, wasaakwa nʼime ogige Chineke anyị.
14 Ha ga-amị mkpụrụ, ọ bụladị mgbe ha mere agadi.
Ha ga-ejupụtakwa nʼahịhịa ndụ,
15 na-ekwupụta, “Onyenwe anyị bụ Onye ziri ezi;
ọ bụ Oke Nkume m, ọ dịkwaghị ajọ omume dị nʼime ya.”