1 Aha/ c̱ina /e mo jin ’boruwa ’bor bwa i is mo, ayy Tap̱a, ka dum pemi ’baar mo.

Ibwambora risa rum p̱inycon mo tani aha/ yuḵkina gway mmomaŋ /e mo.

2 Aha/ c̱a’bkina ka jiŋ ’kup̱a’dup̱un mmoluŋ ’kup̱ki gu’b gi mondheleladhelel pini mo

dhali c̱i mo jin ’boruwa ’bor bwa i is ki gway pini mo

gom mo/en pini jin ṯelu sho’k mo dhali mii ma isiŋ ganam pini mo

haali/ /e a’di i/eḵkin ki eḵ ap̱owa ris to ’baar mo

ki gway pini mo dhali ki gwom pini mo.

3 Ka tee jin yuḵka/ /e mo tani /e thoḵki aha/ ’twa/ mo,

dhali mom’bi’th is ma ḵashiram pem mo tani markina /e is mo.

4 Aris imaliḵ gi mony’cesh mo tani uni mini maŋ /e mo, ayy Tap̱a,

haali/ uni ciḵki gwo gi ’twam pini mo.

5 Dhali uni mini yuḵ gway ki bway gi Tap̱a mo,

haali/ monyca gi Tap̱a a’di icaaca mo.

6 Ba haali/ Tap̱a a’di i/eḵa/ eḵ mo tani a’di ki c̱iya hirdhe/ ki uni kun hatha ’ko ’ko’d ki ha’th mo,

hili uni kun ’theḵ ’ba/ imis mo tani mishkina a’di ’pena dhana/ mo.

7 Ba aha/ yana e bwaman mo jin ṯoju bwa mo tani

/e ’tashki aha/ mondiki/em pem ’twa/ mo.

/E ki he’th me’d pini ap̱owa nyor gi ’kwani kun ta ’kup̱ ki aha/ mo,

dhali me’da bim poros pini mo tani /e ’cuḵki aha/ mo.

8 Tap̱a a’di midi thim bwam piti yin jin ’boro’d gom aha/ mo.

Mo/en pini jin ṯelu sho’k mo tani, ayy Tap̱a, a’di ’dimki ’kup̱ ki sule/ sule/ mo.

Dhalku/ ki dhal miin to ki me’d pini ’pen mo.