1 Ka jiŋ gana/ Arumgimis ta a’di jin ’boro’d gom uni kun dhelel ma du mo,

gom uni gwansan kun dhelelkin eya du mo.

2 Bahili gom aha/ mo tani sho’k pem ’dishi ’twa/ ’taki dheres mo,

ŋaṯgin pem ’disha’dish ’taki yeres mo.

3 Haali/ aha/ tana dhap̱an gom uni kun dhu is ki ca mo,

ki aha/ p̱arkina mo jin rusa to ki rus gom uni kun ta thus ki thus e mo.

4 Haali/ uni dar gi mo jin su’k uniya du ka war mo.

Buŋgwar is buni c̱a’b ki c̱ur c̱ur mo dhali c̱a’b ki ’thiḵil ’thiḵil mo.

5 Uni ṯocu ’kus me’d ’kwanin tiyaa?

Dhali uni doru ki to jin woci is she/ me’d ’kwanin tiyaa?

6 Wakan uni dhu is ki ca gom neram buni kun hitha uni i’ba/ mo,

dhali mo ma bujur jin bujurkina uni mo tani a’di ’kamki uni is mo me’d burrinye/ mo.

7 Em buni dhethadhe’th gom momoṯ buni mo,

adum buni a’di kumkunu ’twa/a ’cesh ki mii ma p̱ali mo.

8 Uni ’theḵ shushi mis mo dhali o gwo ki mo jin dup̱uwa dup̱ i e mo.

Mmodhuna uni is buni eya tente/ ki ṯẖorony mo tani uni ki ruma rum gom mo jin miinu sirica siri’c ki sho’k mo.

9 Uni ki ḵa’d ’twam buni mmosor momis mo

dhala le’d buni a’di ḵalki ’pen ḵany e mony’cesh mo.

10 Dhali gom gwo gi wakan mo tani ’kwani ṯu’kkin mo dhali maŋ uni mo

dhali gam to shiyi’da kamu/ e uni yisa.

11 Dhali uni o gwo mo ki: Ki tonta si’da/ imish ma Arumgimis mo?

A/a’di jin Caa e ki Ca nyiṯẖki toŋ kamuwa?

12 Hili mo mo ma, uni gwansan ita thus ki thus mo.

Isa yempa/ uni ’koni mo jin ’ka’da mii ’ba/ ki ’ka’d mo

dhali uni mara to kun tana uni pa ki pa is mo.

13 Dhali aha/ ki p̱e’th mo tani aha/ karkina dum pem ki dhelel dhelel mo

dhali lam me’d pem e mo jin ’konu ka p̱o/ mo.

14 Haali/ ka tee ’baar mo tani aha/ dherkunu is bwa mo,

dhali dorkunu isa yempa/ mon’thamo/ mo.

15 Waḵki/ aha/ mina ’taki o gwo mo ki: Aha/ mina o gwo wakan mo tani

aha/ mina ’taki diki ta a’diŋ gana/ goma nyaḵum yil gi uc̱im pini mo.

16 Hili ki aha/ kulumkina gwo ibwa mmomish gwo yansan ’ban mo tani

a’di midi ’taki wayaa/ e ki to jin midi wu is e mmomii mo,

17 ntagi aha/ yakina e mo ma Arumgimis jin ḵogu mo,

dhali yan’ko’d aha/ ki nyiṯẖ ’pemen gi ’ko’d ’buni mo.

18 Ka jiŋ gana/ /e ki dhu uni e mo jin yeresa/ yeres mo.

/E ki dhal uni bway mo mmoṯa’k e mo jin kup̱u/ mo.

19 Uni ’ce’dki sho’k kadhamowa?

Uni dhidhu sho’k ka pupush ka dhan mii jin ta’da pure/ ka pure/ mo.

20 Uni wana e ki jan jin shu’bu/ mo me’d jin merkina jan ’deŋ kamu/ e mo.

’Peni momer e mo tani um ki waḵ to munn buni mo.

21 Ka ḵashiram pem ḵa/ki’d ki ḵa/ mo tani

dhali ki aha/ su’kkunu eya du mo,

22 aha/ takina dholgon mo dhali ta p̱us mo tani

aha/ wana e ki tombwaasho ’kup̱ ki /e mo.

23 Bahili aha/ dina mmoṯikir c̱a’b nyaḵki /e mo.

/E bu’thki me’da bim poros pem mo.

24 /E ki shu aha/ bway ki gwom pini jin logomkina /e mo

dhali yan’ko’d /e mini bu’th aha/ mmotaḵ mo.

25 Kaja a’di itaka/ e momis mo? Hili diki ta jasi /eya?

Dhali to p̱iyi’d e mony’cesh yan mo mmo/oka/ bwa mo mmodhal /e ka p̱o/ mo.

26 Buŋgwar is pem dhala dum pem mini ’taki ush me’d mo tani

hili Arumgimis a’di ta’da Man’bitha dum pem is mo dhali Amanpwaḵ ki aha/ to jin miga/ ta ki sule/ sule/ mo.

27 Haali/ hili mo mo ma, uni gwansan kun si’dkin ’peni /e mo tani minu ’ce’d sho’k mo be.

/E ki kar mo jin daḵu gwo ’kup̱ mo gom uni gwansan kun ṯori gwon thus ap̱o/ /e mo.

28 Hili gom aha/ mo tani a’di ’boro’d jin miga/ ’disha Arumgimis is mo.

Aha/ karkina Tap̱a Arumgimis mo mmota a’di jin hurga/ jwa icine/ mo,

ki aha/ mina ṯora ris miim pini mo.