CARTA NIMA CATZOKNICA HEBREOS
1
Dios ma̱lakácha̱lh Ixkahuasa xlacata nali̱chihui̱nán
1 Dios ca̱ma̱lakachá̱nilh profetas xalakmaká̱n quili̱talakapasnicán; ni̱ caj maktum ca̱ta̱chihuí̱nalh y lhu̱hua tú ca̱li̱ma̱lacahuá̱ni̱lh la̱ta maká̱n quilhtamacú. 2 Pero chí jaé quilhtamacú ma̱lakácha̱lh Ixkahuasa xlacata naquinca̱li̱ta̱chihui̱naná̱n tú ixtalacapastacni, namá tí maktlahuani̱t hua̱k la̱ta tú huí ca̱quilhtamacú y macama̱xqui̱ni̱t nama̱paksí hua̱k la̱ta tú huí ca̱quilhtamacú.
3 Xlá ma̱sí ixli̱lanca ixli̱tlihueke Dios, li̱tanú ixma̱su̱y la̱ kalhí ixkásat Dios, y ixli̱tlihueke ixtachihuí̱n ca̱ma̱xquí tú natali̱latamá ni̱ natalaksputa la̱ta tú anán. Xlá quinca̱xapanín quintala̱kalhi̱ncán y a̱stá̱n alh tahuilá nac ixpa̱xtú̱n Dios ni̱ma̱ huí nac akapú̱n.
Ixkahuasa Dios ni̱tí ma̱ccha̱ní ixli̱tlihueke
4 Ixkahuasa Dios ca̱kapu̱lani̱t ángeles porque maklhti̱nani̱t ma̱s lanca ixpu̱táhui̱lh que ángeles. 5 Ca̱ksántit xlacata Dios ni̱cxni huánilh cha̱tum ángel:
Huix Quinkahuasa;
aquit chí cli̱tanu̱ni̱t minti̱cú.
Alacatum huampá:
Aquit cama li̱tanú ixti̱cú,
y xlá ama li̱tanú quinkahuasa.
6 Chuná li̱tum acxni macáchilh jaé xapuxcu Ixkahuasa ca̱quilhtamacú huá:
Catalakachixcúhui̱lh hua̱k ángeles tí tata̱lama̱na Dios.
7 Dios chuné ca̱li̱chihuí̱nalh ángeles:
Ixángeles ca̱li̱macá̱n caj la̱ u̱n,
ixcha̱lhca̱tnaní̱n ca̱li̱macá̱n la̱ lhcúya̱t.
8 Pero Ixkahuasa chuné li̱chihui̱nán:
Huix Dios, mintapáksi̱t ni̱cxni ama laksputa
porque huata huix tla̱n tancs ma̱paksi̱nana y stalhca pa̱t ma̱sta̱ya taxokó̱n.
9 Huix lakmakani̱ta tú ni̱ tla̱n, lakati̱ni̱ta tla̱n catzi̱ya;
huá xlacata Dios, Mimpu̱chiná Dios li̱lhca̱ni̱tán
ma̱s li̱pa̱xáu nama̱paksi̱nana que la̱ xa̱makapitzi tí tama̱paksi̱nani̱t.
10 Alacatum na̱ huampá nac Salmos:
Huix Ixpu̱chinacán hua̱k tú talama̱na, la̱ta maka̱sá ca̱xtlahua ní natahuilá ca̱quilhtamacú,
y mimacán li̱tlahua akapú̱n.
11 Xlacán ama talaksputa, pero huix ta̱yanípa̱t nahuán cani̱cxnihuá,
hua̱k ama talaclakó la̱ aktum aklhchú lháka̱t tú yaj tú macuán.
12 y pa̱t ca̱lakkapsa la̱ aktum lháka̱t,
pa̱t ca̱lakxta̱pali̱ya la̱ acxni talakxtunancán.
Pero huix ni̱cxni pa̱t talakxta̱pali̱ya,
milatáma̱t ni̱ ama laksputa.
13 Dios ni̱cxni huánilh cha̱tum ángel jaé tachihuí̱n tú huánilh Ixkahuasa:
Catahuila ixpa̱xtú̱n cquimpu̱ma̱paksí̱n,
hasta xní nacca̱makatlajá hua̱k mienemigos
xlacata acxtum natalakachixcuhui̱yá̱n.
14 Porque hua̱k ángeles tali̱tanú ixcha̱lhca̱tnaní̱n Dios; xlá ca̱ma̱lakachá xlacata natamakta̱yá cristianos tí ca̱li̱lhca̱ni̱t natataxtuní.