1 Mam one a kpeenm n sobid neꞌeŋa n tisid fun poꞌa on ka Winaꞌam gaŋ la ne fu biis. M sid noŋi ya ameŋa. 2 Li ane yelsida line bee ti saꞌan la, ka na kpelim bee ti saꞌan yuma dine kaꞌ naar la zug, ka man ne bane wusa miꞌ sida la noŋi ya.

3 Ti Baꞌ Winaꞌam ne o Biig Yesu Kiristo na tisi ti yelsum ne sumalisim ka zoo ti nimbaanlig, ka tisi ti o yelsida ne noŋilim.

4 Li malisi m bedego man nye ka biis la sieba dol sida la wen wuu ti Baꞌ Winaꞌam da yeli ti siꞌem la. 5 Ala m sos uf, m maa, kel ka ti noŋ taaba. Neꞌeŋa kaꞌ noor yelug paal ka m sobid tisidi yaa. Li ane noyelug kan ka ti da wum tinam da dol Yesu Kiristo pinꞌilugin sa la. 6 Noŋilim kan ka m pianꞌad li yela la, gbin ane ye ti siakim Winaꞌam noyelug la wusa. Yelugkan ka ya da wum pinꞌilugin sa la ane neꞌeŋa ye, ya wusa noŋim taaba.

7 Ziri dim bedego giligi dunia wusa, nidib bane pu siak nie paalo ye Yesu da lieb ninsaal la. Ninkan buudi ane ziri daan ka a Kiristo dataa. 8 Baŋimi ya meŋ ka da saꞌam lin ka ti daa tum tisi ya la, ka ya na diꞌe nyood wusa.

9 On mekama pu dol Kiristo paꞌalugo, ka paas o meŋ paꞌalug, o pu dol Winaꞌam. On mekama dol paꞌalug la, o dol ne ti Baꞌ Winaꞌam ne o Biig. 10 Soꞌ yaꞌa keenn ya saꞌan na ka pu mor paꞌal kaŋa naa, yanam da diꞌe o ya yin ne, hale kudum da puꞌus oo. 11 One puꞌus o na lieb ne o tuumbeꞌed tiraan.

12 M mor pianꞌad bedego ye m yeli ya, ka pu bood ye m sobi li gbauŋin n tisi yaa. M tenꞌes ye m na kaae ya, ka pianꞌa tisi ya m meŋ. Ka ti na mor sumalisim bedego.

13 Fu bier on ka Winaꞌam gaŋ la biis puꞌusid uf suꞌuŋa.