ଫିଲୀମନଙ୍କ ନିକଟକୁ ପାଉଲଙ୍କ ପତ୍ର
ପିଲିମନ ତା଼ଣା ପା଼ୱୁଲ ରା଼ଚାମାନି ଆ଼କୁ
ମୂଲୁ ହା଼ଡା
ପିଲିମନ ଆ଼କୁ ପା଼ୱୁଲ ତା଼ଣାଟି ରା଼ସ୍କି ଆ଼ହାମାନେ ୧:୧ । ପା଼ୱୁଲ ର଼ମ୍ ଗା଼ଡ଼ାତି କାୟିଦି ଇଲୁତା ମାଚାଟି ଈ ଆ଼କୁ ରା଼ଚାମାନେସି । ଏ଼ୱାସି ର଼ମ୍ ଗା଼ଡ଼ାତା ମାଚେସି କ୍ରୀସ୍ତ ଜାର୍ନାଆ଼ତି ୬୧ ବାର୍ସା ଡା଼ୟୁ ଈ ଆ଼କୁ ରା଼ଚା ଡ଼ୟିନେସି । ଏଚିବେ଼ଲାତା କଲସିୟ କୁଲମିତାକି ରା଼ଚା ଡ଼ୟିନେସି । ଏ଼ୱାସି ଈ ଆ଼କୁ ପିଲିମନ ଇନି ର଼ ମାଣ୍ସିକି ରା଼ଚିମାନେସି । ପିଲିମନ କୁଲମିତି କାଜାସି ଅ଼ଡ଼େ ହ଼ଲିୟାଙ୍ଗାତି ସା଼ୱୁକାରି ମାଚେସି । ଏ଼ୱାରି ବିତ୍ରାଟି ଅନିସିମ ଇନି ର଼ ହ଼ଲେଏସି ମାଚେସି ଏ଼ୱାସି ପିଲିମନ ତା଼ଣାଟି ହଟାତୁସା ମାଚେସି ଏ଼ୱାସି ପା଼ୱୁଲ ତା଼ଣାଟି କ୍ରୀସ୍ତାନା ଆ଼ହାମାଚେସି । ରମିୟ ଲ଼କୁତି ମେ଼ରା ତଲେ ଅନିସିମଇଁ ହା଼ନି ଡଣ୍ତ ହୀନାୟି ମାଚେ ।
ଅନିସିମଇଁ କାର୍ମାମେସାନା ଏ଼ୱାଣାଇଁ ହ଼ଲେଏସି ଲେହେଁ ଆ଼ଏ ସାମା କ୍ରୀସ୍ତାନା ତାୟିଲେହେଁ ୱେଣ୍ତେ ଆବାମୁ ଇଞ୍ଜିଁ ପିଲିମନଇଁ ବାତିମା଼ଲିହିଁ ଈ ଆ଼କୁ ରା଼ଚିମାନେସି ୧:୧୩-୧୪ ।
ପତିତା ମାନାୟି
୧. ପିଲିମନଇଁ ଜହରା ୱେହ୍ନାୟି । ୧:୧-୩
୨. ଅନିସିମଇଁ କ୍ରୀସ୍ତାନା ତାୟିଲେହେଁ ଆବାଲି ଏଲେଇନାୟି । ୧:୪-୨୧
୩. ଆ଼କୁତି ରା଼ପ୍ନି କାତା । ୧:୨୨-୨୫
୧
୧ ନା଼ନୁ ପା଼ୱୁଲ, ଜୀସୁ କ୍ରୀସ୍ତ ତାକି ଦସ୍ପି ଆ଼଼ହାମାନାତେଏଁ, ତାୟି ତିମତି, ମା଼ ତଲେ କାମା କିହିମାନି ଜୀୱୁତି ପିଲିମନ, ୨ ✡ ୧:୨ କଲସି ୪:୧୭ଅ଼ଡ଼େ ତାଙ୍ଗି ଅପ୍ପିୟା ଇଞ୍ଜାଁ ମା଼ ତଲେ ଜୁଜୁକିନି ଆର୍କିପ୍ପ ଇଞ୍ଜାଁ ମୀ ଇଜ ମାନି କୁଲମିତାକି ଆ଼କୁ ରା଼ଚାମାଇଁ; ୩ ମା଼ ଆ଼ବା ମାହାପୂରୁ ଅ଼ଡ଼େ ପ୍ରବୁ ଜୀସୁ କ୍ରୀସ୍ତ ତା଼ଣାଟି କାର୍ମାମେହ୍ନାୟି ଅ଼ଡ଼େ ହିତ୍ଡ଼ି ମିଙ୍ଗେତାକି ଆୟାପେ ।
ପିଲିମନ ଜୀୱୁନ଼ନାୟି ଅ଼ଡ଼େ ନାମିନାୟି
୪ ନା଼ନୁ ନା଼ ପ୍ରା଼ତାନାତା ମୀ ଦ଼ରୁ ଆସାନା କା଼ଲେଏ ନା଼ ମାହାପୂରୁଇଁ ଜହରା କିହିମାଇଁ, ୫ ପ୍ରବୁ ଜୀସୁ କ୍ରୀସ୍ତ ଇଞ୍ଜାଁ ବାରେ ମାହାପୂରୁ ଲ଼କୁତାକି ମୀ ଜୀୱୁନ଼ନାୟି ଅ଼ଡ଼େ ନାମୁତି କାତା ୱେଞ୍ଜାନା ୬ ଏଲେକିହିଁଏ ମୀ ନାମୁତଲେ ଆଣ୍ତ୍ୱି ଆ଼ନାୟି, ମାଙ୍ଗେ ହୀପ୍କିଆ଼ତି ବାରେ ନେହିଁ କାତାତି ପୁନାଣି ତଲେ କ୍ରୀସ୍ତ ତା଼ଣା କାମା ଆ଼ନେ । ୭ ଏ଼ନାଆଁତାକି ଇଚିହିଁ, ଏ଼ ନା଼ ତାୟି, ମାହାପୂରୁ ଲ଼କୁତି ହିୟାଁ ମୀ ତା଼ଣା ସୂସ୍ତି ମେ଼ଡ଼ା ଆ଼ହାମାନାକି ନା଼ନୁ ମୀ ଜୀୱୁ ନ଼ନି ତା଼ଣା ରା଼ହାଁ ଅ଼ଡ଼େ ସା଼ସା ବେଟା ଆ଼ହିମାଇଁ ।
ଅନିସିମ ତାକି ବାତିମା଼ଲିନାୟି
୮ ଆତିହିଁ ଏ଼ନାୟି ନେହାୟି, ଏ଼ କାବ୍ରୁତାକି ନିଙ୍ଗେ ହୁକୁମି ହୀହାଲି କ୍ରୀସ୍ତତି ହ଼ଲେଏଣା ଲେହେଁ ଆ଼ତିଜିକେଏ ନାଙ୍ଗେ ହା଼ରେ ପୁରେ ସା଼ସା ମାନେ, ୯ ଆ଼ତିଜିକେଏ ନା଼ନୁ ବୁଡ଼୍ହା ପା଼ୱୁଲ ଜୀୱୁ ନ଼ନାଣି ତାକି ମିଙ୍ଗେ ବାତିମା଼ଲିମାଞ୍ଜାଇଁ, କ୍ରୀସ୍ତ ଜୀସୁ ତାକି ନୀଏଁ ନା଼ନୁ ଦସ୍ପି ଆ଼ହାମାଇଁ, ୧୦ ✡ ୧:୧୦ କଲସି ୪:୯ନା଼ନୁ ଇଲେକିଁ ଦସ୍ପି ଆ଼ହାମାନାଟି ନା଼ ମୀର୍ଏସି ଅନିସିମ ତାକି ନିଙ୍ଗେ ବାତିମା଼ଲିମାଞ୍ଜାଇଁ; ୧୧ ଏ଼ୱାସି ନ଼କେଏ ନିଙ୍ଗେ ଅ଼ଡ଼େ ନାଙ୍ଗେତାକି ଲ଼ଡ଼ା ହୀଆଗାଟାସି ମାଚେସି, ସାମା ନୀଏଁ ନିଙ୍ଗେତାକି ଅ଼ଡ଼େ ନାଙ୍ଗେତାକି ଜିକେଏ ଲ଼ଡ଼ା ଗାଟାସି ଆ଼ହାମାନେସି ।
୧୨ ନା଼ନୁ ଏ଼ୱାଣାଇଁ ନୀ ତା଼ଣା ୱେଣ୍ତେ ପାଣ୍ତିମାଞ୍ଜାଇଁ, ଏ଼ୱାସି ନା଼ ହିୟାଁ ମାନେ । ୧୩ ନେହିଁ କାବ୍ରୁତାକି ନା଼ନୁ କାୟିଦିତା ମାଞ୍ଜାନା ଏ଼ୱାଣାଇଁ ନୀ କିନି ଜାତ୍ନୁ ନାଙ୍ଗେ କିହାଲି ତାକି ଡାଗେ ଇଟାଲି ଅଣ୍ପିମାଚେଏଁ, ୧୪ ସାମା ନୀନୁ ରା଼ଜି ଆ଼ଆପାତେକା ନା଼ନୁ ଏ଼ନାଆଁ କିହାଲି ଅଣ୍ପାଆତେଏଁ, ଏ଼ନିକିଁ ନୀ ନେହିଁ କାମା ନୀ ମ଼ନତଲେ କିନିଲେହେଁ ଆ଼ଆନା ନେହିଁ ଅଣ୍ପୁ ତଲେ ଆ଼ନେ ।
୧୫ ଆତିହିଁ ଈଦି ଆ଼ହାଲି ଆ଼ଡିନେ, ଏ଼ନିକିଁ ନୀନୁ ଏ଼ୱାଣାଇଁ ହ଼ଲେଏଣା ଲେହେଁ ମେହ୍ଆନା ସାମା ହ଼ଲେଏଣା କିହାଁ କାଜାସି ଲେହେଁ, ଇଚିହିଁ ଜୀୱୁତି ତାୟିଲେହେଁ କା଼ଲେଏତାକି ବେଟାଆ଼ଦି, ଏ଼ଦାଆଁତାକି ଏ଼ୱାସି ଏଚରଦିନା ତାକି ଏଟ୍କା ଆ଼ହାମାଚେସି; ୧୬ ସାମା ଏ଼ୱାସି ୱାର୍ଇ ହ଼ଲେଏସି ଆ଼ଏ, ନୀଏଁ ଏ଼ୱାସି ଜୀୱୁତି ତାୟି, ଇଚିହିଁ ଆଙ୍ଗା ତଲେ ଅ଼ଡ଼େ ମାହାପୂରୁ ତା଼ଣା ନିଙ୍ଗେତାକି ଏଚେକା ଜୀୱୁ ନ଼ନାସି ଆ଼ଅସି ।
୧୭ ଏ଼ଦାଆଁତାକି, ନୀନୁ ନାଙ୍ଗେ ନା଼ ତ଼ଡ଼ୁତାସି ଇଞ୍ଜିଁ ଅଣ୍ପି ମାଞ୍ଜାସାରେ, ଆତିହିଁ ନାଙ୍ଗେ ଆବାତି ଲେହେଁ ଏ଼ୱାଣାଇଁ ଆବାମୁ । ୧୮ ଇଚିହିଁ ନିଙ୍ଗେତାକି ଏ଼ନି ଲାଗେଏ କିହାମାଞ୍ଜାତିଁ କି ନୀ ତା଼ଣା ରୀଣା ଆ଼ହା ମାଞ୍ଜାତିହିଁ, ଏ଼ଦାଆଁ ନା଼ ଦ଼ରୁତା ରା଼ଚାମୁ । ୧୯ ନା଼ନୁ ପା଼ୱୁଲତେଏଁ, ନା଼ କେୟୁତଲେ ଈଦାଆଁ ରା଼ଚିମାଇଁ, ନା଼ନୁ ଏ଼ଦାଆଁ ୱେଟ୍ହାଇଁ । ନୀନୁଏ ନା଼ ତା଼ଣା ରୀଣା ମାଞ୍ଜି, ଈ କାତା ଅ଼ଡ଼େ ନା଼ନୁ ୱେସାଲି ଅଣ୍ପି ହିଲଅଁ । ୨୦ ହାଅ, ତାୟି, ପ୍ରବୁ ତା଼ଣା ଆଣ୍ତିତିଁ ନୀ ତା଼ଣାଟି ନା଼ ଲା଼ବା ଆୟାନେ, କ୍ରୀସ୍ତତି ତା଼ଣା ନା଼ ଜୀୱୁତା ବା଼ର୍ସୁ ହିୟାମୁ ।
୨୧ ନୀନୁ ନା଼ ୱେସ୍ତାତିଲେହେଁ କିଦି ଇଞ୍ଜିଁ ନାମୁ ମାନାକି ନା଼ନୁ ଈ ଆ଼କୁ ରା଼ଚିମାଇଁ; ସାତେଏ ନା଼ନୁ ପୁଞ୍ଜାମାଇଁ, ନା଼ନୁ ଏଚେକା ୱେସିମାଞ୍ଜାଇଁ, ନୀନୁ ଏ଼ଦାଣିକିହାଁ ଆଗାଡ଼ା ଜିକେଏ କିଦି । ୨୨ ଈଦାଆଁ ତଲେ ନା଼ ଡ଼ୟିନି ଇଲୁ ଜିକେଏ କିହାନା ଇଟାମୁ, ଇଚିହିଁ ମୀ ପ୍ରା଼ତାନା ତଲେ ମୀରୁ ନାଙ୍ଗେ ୱେଣ୍ତେ ବେଟା ଆୟାଦେରି, ଈଦାଆଁ ନା଼ନୁ ଆ଼ସା କିହିମାଇଁ ।
ରା଼ନିବେ଼ଲାତି ଜହରା
୨୩ ✡ ୧:୨୩ କଲସି ୧:୭; ୪:୧୨କ୍ରୀସ୍ତ ଜୀସୁ ତାକି ନା଼ ତଲେ କାୟିଦି ଇଲୁତା ମାନି ଏପାପ୍ରା ୨୪ ✡ ୧:୨୪ କାମା ୧୨:୧୨,୨୫; ୧୩:୧୩; ୧୫:୩୭-୩୯; କଲସି ୪:୧୦; କାମା ୧୯:୨୯; ୨୭:୨; କଲସି ୪:୧୦; କଲସି ୪:୧୪; ୨ତିମ ୪:୧୦; କଲସି ୪:୧୪; ୨ତିମ ୪:୧୧ଇଞ୍ଜାଁ ନା଼ ତଲେ କାମା କିହିମାନି ମାର୍କ, ଆରିସ୍ତାର୍କ, ଦିମା ଅ଼ଡ଼େ ଲୂକ ନିଙ୍ଗେ ଜହରା କିହିମାଞ୍ଜାନେରି । ୨୫ ମା଼ ପ୍ରବୁ ଜୀସୁ କ୍ରୀସ୍ତତି କାର୍ମାମେହ୍ନାୟି ନେହିଁ ଜୀୱୁ ମୀ ତଲେ ମାଣ୍ମ୍ବେ ।