TEŊ-LA BA SI ŊMUŊSA PI
HIIBURU TIŊŊAA
1
Wia Bie nɛ kii Wia tiŋdaaraa
1 Faafaa-la Wia bul wiaa pi la naabalimaba a yugɛ nɛ. Woŋbie-la u si to bul wiaa piba ma yuga nɛ. U to nialiŋ fa síi bul wiaa, Wia Diŋ-zɔŋ-la doluŋ lɛ nɛ a bul wiaa deeŋba piba. 2 Ama lɛɛlɛ tapulaa deeŋba, u to u Bie lɛ nɛ a bul wiaa pila. U leŋe u Bie deeŋ nɛ kɛŋ kuŋ-kala doluŋ. Wia síi chɛ duu ŋaa dunia, u leŋe u Bie nɛ ŋaa. 3 Wia si kɛŋ tula-la, u nɛ u Bie ma kɛŋ. Ŋii Wia si naga, ŋii titia nɛ u ma nagɛ. Wialiŋ u síi bul kɛŋ doluŋ. Dol-la nɛ u kaa beŋ kuŋ-kala si hɛ dunia lɛ. U si ku tuu dunia, u piisɛ niaa disinniŋ ta nɛ. U si ŋaa ŋii dɛrɛ, u jila hɔŋ Wia sɛmɛ, ni-duoŋ di-hɔnuŋ. 4 U nɛ kii Wia tiŋdaaraa kala. Yiri-la u si laa Wia teeŋ, u ma nɛ kii yiri-la Wia tiŋdaara-la si laa.
5 Wialiŋ Wia si bula a tigɛu lɛ nɛ ŋla:
“Ŋ ŋaa mi Bii nɛ,
mi nɛ luluŋ jiniŋ.”
U saa bira bula a tigɛu lɛ:
“Mi jaŋ ŋaa ŋ Nyimma,
ŋ ma jaŋ ŋaa mi Bii.”
Wia tiŋdaari bɛɛ lɛ nɛ Wia ha bul wiiŋ deeŋ? Ba kuŋ-kala lɛ dee Wia bul wiiŋ deeŋ. 6 Bua-la lɛ u si leŋe u Bie ku tuu dunia, u bira bula a bul,
“Wia tiŋdaaraa kala jaŋ tuu kpirimi u sipaaŋ a chuɔlu.”
7 Wialiŋ Wia si bula a mu tigɛ u tiŋdaaraa lɛ nɛ ŋla: U si,
“Mi leŋe mi tiŋdaaraa nagɛ peliŋ
ari nyiŋ-geliŋ nɛ.”
8 Ama u si bul wiaa a tigɛ u Bie lɛ, ŋla nɛ u bul: U si,
“Ŋ kuoruŋ jaŋ hɛ dimɛ a kaa mu deeŋ deeŋ.
Wia tuɔ-pul kiaa nɛ jaŋ ŋaa ŋ kuori-daaŋtiga di ŋ kaa beŋ ŋ niaa.”
9 “Ŋ cho wutitiiba nɛ a kii wu-nyiariŋ.
Ŋii nɛ tii ŋ Nyimma Wia liisiŋ
di ŋ yuga kii ŋ dɔŋsuŋ tiŋŋaa a bibeŋba.”
10 Wialiŋ ba bira si bula a tigɛ u Bie lɛ nɛ ŋla: Ba si,
“La Tiina, ŋ nɛ ta tiŋteeŋ buŋbuŋ-la,
a ta wia nyuŋ maa.
11 Wia nyuŋ ari tiŋteeŋ kala jaŋ lɛl, ama ŋ-na jaŋ hɛ dimɛ.
Ba kala jaŋ birimɛ ku-binaa a kɔsɛ, ari gɛnniŋ síi kɔsɛ ŋii.
12 Ba jaŋ nagɛ gɛriŋ di ŋ kaa kpeŋ.
Ŋ jaŋ kɛŋba kaa birimɛ, ari gɛri-zɔŋ-la si yie birimɛ ŋii. Di u zɔmuŋ nɛ lia, u bira bi ku-falii ŋaa.
Ama ŋ-na bi jaŋ kɔ di ŋ birima. Ŋ bi jaŋ kɔ di ŋ hiɛsa.”
13 Wialiŋ Wia bira si bula pu nɛ ŋla: U si,
“Ku hɔŋ mi sɛmɛ, ni-duoŋ di-hɔnuŋ,
see mi yuo dii ŋ diŋdɔŋŋɔɔ kala dɛrɛ.”
Wia tiŋdaari bɛɛ lɛ nɛ Wia ha bul wiiŋ deeŋ? Ba kuŋ-kala lɛ dee Wia bul wiiŋ deeŋ. 14 Wia tiŋdaara-la kala ŋaa Wia tiŋtinnaa nɛ. Wia yie tiŋba ba mu pɛ nialiŋ u síi chɛ u laa ta lɛ nɛ.