54
Bàu Waiq Khàn Xìn Bìac Palem
Đawit Achìh
1 Waiq Boc Plình da au ôi, xìn yŏc hiniq Ìh đòiq dŏih dèch au,
xìn yŏc cwìang itai Ìh đòiq palem ca au.
2 Chuaq ôi! xìn tamàng bàu waiq dang da au,
xìn tamàng bàu capoch loh enh hacùng au.
3 Ma jah 'màng aih rìm ngai yòng đòiq tajraq hlài ca au;
wì mangai dù chaq đòiq jêh đac au;
wì haq ùh đòiq Chuaq enh ngìa dađeh.
4 Cô, Boc Plình Haq Chuaq jùp đò au,
Haq wèq ban mahua yiang au.
5 Haq jah yŏc bìac dù đòiq ca'naih hlài da wì ma tagit au,
tiaq bìac wèq dèh bàu da Chuaq xìn jêh đac wì haq.
6 Chuaq ôi, au jah dèch am ca Ìh ngè tadreo am dech;
au jah calêu padèch hiniq Ìh taiq hiniq Ìh lem lình.
7 Ma jah 'màng aih Chuaq khoi dèch au claih enh bìac yat dè;
au lem manoh jò mat au hnoq Chuaq am ca au ta'blêq wì ma git ca au.