JONÁS-GARDA
JONÁS
GEBE-SOGLENAID
Garda-nug
Jonás-Garda. Jonásʼde, Amitai-e-machid. Nuu-sibuye, Jonás-nug obarileged. A-sogleged, Gayaburba-berbegedye.
Jonás-Gardagi weyob sunmaklenaid
Bab-Dummad, Jonásʼse gochagusad, Nínive-neggweburse e-gayaburbagi sunmaknaegar. Adi, we-dulemar e-isguedga na bukib-binsamalagar. Degi-inigwele, Jonás, Bab-Dummad-ega-ibmar-sogedba ibsassulid. Jonás, Bab-Dummadba-ibsassulidba boni-dummagan abingasgusad, burgwednaga gusad. Deyob, Jonás, wilubdaklesgua, Bab-Dummad-sogedba Nínive-neggweburse, Nínive-dulemarga Bab-Igargi sunmaknadgusad.
Bab-Dummad-bela-neg-ganimaidgi sunmaked. Bela-bela emar-wiledakedgi, emar-sabgumaidgi sunmaked. Dule Babse egisdibe, e-isgued ega eliye, Bab-Dummad ega elied.
We-gardagine, weyob ilemakar sunmaklenaid:
1. Jonás, Bab-Jehováʼgi wakinye sogenad (1:1-17).
2. Jonás, ua-sabanyaba-mai, Bab-Jehováʼse goted (2:1-10).
3. Jonás, Nínive-neggweburgi Bab-Dummad-Gayaburbagi sunmaksad (3:1-10).
4. Jonás ulude gusad (4:1-11).
Be itogua.
1. JONÁS, BAB-JEHOVÁʼGI WAKINYE SOGENAD
1
(1:1-17)
1 Bab-Jehová, Amitai-e-machi-Jonásʼse gornonikid. Ega weyob sognonikid: 2 “Jonás, Nínive-neggwebur-dummadse be nao. A-dulemarga be sogo, anse ibitomaloye. Ar Nínive-dulemar-e-isgued doggus wilub-obicha-gusad, e-ibmar-isgana-imakmalad anse warmaksad.”
3 Ar Jonásʼdi Bab-Jehováʼba gwen ibsassulid. Bab-Jehováʼgi-wakinnegala aka Tarsis-neggweburse naedgi binsaali gusad. A-ular, Jope-neggweburgi urmar-naguedse nade gusad. Jopeʼse modapgua, Tarsis-neggweburse ur-nae-sognai dakdapid. Geb Jonás agi ur-bennuksad, eba naegar. Deyob Bab-Jehováʼgi dikasur-wakinnega Tarsis-neggweburse nadegusad.
4 Agine, Bab-Jehová mataba burwa binnasur-golega imaksad. Geb degidbali, demar bela-bela dunguded, degisoggu, ur mared-naga-gualid. 5 Ur-selamar bela-bela gwayidmalad, geb, neg-isgued-wis-bargaegala, war-wargwen na e-bab-dummad-e-bab-dummadse gotemalad. Deginbali, selamar ur ukuu imakegala, ur-yagi-ibmar-bukwadi demarse midmalad.
Jonásʼdina, ur-sukun-yaba-aides megisad. Agi, ise-nue-gabar megisad. 6 Agine, ur-seed Jonás-gabmaidse nonikid, geb ega sogded:
—Ar bedi, ¿ibu be samai weyob be gabmaigu? ¡Gwisgue! ¡Be-Bab-Dummadse be gole! Ar abakale, be-Bab-Dummad wile anmar-dakalile, nabir anmar-bendakalile, adi, anmar burgosulid.
7 Geb selamardi, na dukin-dukin sogdemalad:
—Anmar wilubdakgwelo. Agi, anmar dakoed, doa gudiidibe, doa-nukad anmargi burwa-dummad noali.
Agi, wilubdaknanai-guarmalad. Geb Jonásʼgi yolenonikid. 8 Degisoggu, selamar Jonásʼse egisdemarsunnad:
—Anmarga be soge, ¿wede ibiga anmargi burwa-dummad noali? ¿Be ibigi arbae? ¿Bia be daniki? ¿Be bialidi? ¿Bede, igid-dule?
9 Geb Jonás dulemar-abin sogded:
—Ani, an Hebreo-dule, Bab-Jehováʼse-gordiid-duled. Ar we-Bab-Dummad nibneg-e-dummadid, demar nasiksabalid, napneg nasiksabalid.
10 Agi, selamar bela-bela dobgudmalad. Geb Jonásʼga sogdemalad:
—¿Igi be neg-imaksa?
Ar ega Jonás sogsasoggu, selamar wisgunonimarsunnad, Jonás Bab-Jehováʼgi wakindii.
11 Degine, demar bur bule dungumaisoggu, Jonásʼse egichidmalad:
—Anmarga demar nabir bogilegegala, ¿igi anmar be-imakosunna?
12 Jonás abin-sogded:
—Ar an-nukad we-burwa-dummad nomaid. Degisoggu, gasa be an-imakmala, demargi be an-metemala, ar degii geb demar bogilegoed.
13 Degine, selamar aisaar gakase-warmakega sabsur-gamminanai-gusmalanad, degi-inigwele, demar-dungueddi baligannosad. E-urdina, sunnale dogsar gunaid, degisoggu, demar-gakase ur-sessur-gusmalad. 14 Geb degine, selamar Bab-Jehováʼse binnasur gotemalad, ega sogdemalad: “Bab-Jehováʼye, melle be we-dule-ular anmar-oburgwe. Ar we-dule ibmar-oakalossulile, melle e-burgoed, anmargi be nasiko. Bab-Jehová, ar bedi na ibmar-imakbiedba be imakmaid.”
15 Agine, selamar Jonás-gasmalad, geb, demargi metemalad. Jonás-melledgua, demar yog bogilegargusad. 16 Selamar bela deyob daksamargua, Bab-Jehová-dobee-ito-nadmalad. Geb Bab-Jehováʼga ibmar-ogumakar uksamalad, deginbali, ise-sogar na weyob sognanai-guarmalad: “Bab-Jehová-sogedba anmar gudii-guoye, deyob anmar imakergebye.”
17 Ar Bab-Jehováʼdi Jonás-ua-dummadse-dolegegala, idu guakwaa ua-dummad-nasiksad. Jonás ua-dummadse-dolesgua, e-saban-yaba ibapaa megisad.