142
Devit ga pit iakan ra ninge. I hinhinawas utano pakana bung ing Devit ga kis narako tano matana haat. A sinasaring ie.
1 Iau manga suah uram hono Watong.
Iau raun haut no ingagu uram hono Watong wara gaena harmarsai.
2 Iau burange hasur ira nugu bala ngungut uram ho ie.
Iau hinawasei ta ira nugu tinirih.
3 Ing bia no nugu nilon i maalum,
augu iaat u nunure tar no nugu ngaas na hinahaan.
Kaia tano ngaas nong iau mur ie,
di te suhe tar tiga kuun wara utagu.
4 Nng 31:11; 88:8,18Nanaas ukai hono kata na limagu ma nu nes
bia taie tikai pai lik bia na harahut iau.
Taie nugu ta barbarahit.
Taie tikai pai balaure tar no nugu nilon.
5 Nng 91:2,9Watong, iau suah ukaia ho ugu.
Iau tange, “Augu no nugu barbarahit.
Augu no pinlawegu kai ra taman audiet ira lilona.
6 Nng 18:17Hadade no nugu sunuah, kanong iau manga tapunuk.
Halon leh iau sukun diet ing diet paspasak hani iau,
kanong diet manga dadas tagu.
7 Nng 146:7Halangalanga iau sukun no nugu harpidanau,
waing iau nigi pirlat no hinsaam.
Io kaik, ira ut na takodas diet na hanuat luhutane iau
kanong utano bilbilai u te gil ie tagu.