1 Yahwe, du kwihita tiŋa nu mu nanintobeŋ be welege kadakaune nehitubu-didimewene kaŋ nemek malabumuŋ hinek mu tinambeŋ.

2 Yahwe, nu saŋiniŋne dapmahinakaune saŋiniŋ lohilat. Doktiŋa du siloŋ tobogoŋ tinamuŋa kotigoŋ saŋiniŋ nambeŋ. 3 Nu welemulap kisaŋ hinek tilat. Kaŋ Yahwe, du dediŋ doktiŋa nai kweheyeniŋ hinek binabulaŋ? 4 Yahwe, du me siloŋ tobogoŋ titiŋdi kedem buŋa nehitubu-lodaaŋ kotigoŋ nanagilune mu kumumbit. 5 Me kumuŋ tigiŋ heki adi du kotigoŋ mu nadigamiiŋ, tiŋa adi kwet hakiiŋneŋ uŋoŋ adi wohoge mu ganintiloiŋ.

6 Nu kuti kobulabulayeŋ tigetige saŋiniŋne dapmalak. Timiŋ indigoŋ tuwot makat kotiwene dautilitiliknedi kwet damodeitat u tubu-mendadapmaŋ tilak. Tiŋa undugoŋ makat gibita kotiwene mebi uloloŋne mendadapmaŋ tilak. 7 Memikneyedi fee tubune wendoktiŋa makat hakotat. Tiŋa daune bediune nemenemek tuwot mu yabulat.

8 Me titiŋ hogohi tiiŋ, hidi binabuŋa ut. Yahwe adi makat kotat i agaŋ nadinamulak. 9 Nu Yahwedi nehitubu-lodadok kutniŋgut, kaŋ adi kutikutine nadiŋa yonadine agaŋ tubu-udanelak. 10 Memikneye adi malabumuŋ wapum hinek tubumintaneeŋ. Tiŋa meka tiŋa moŋ kaŋ muntaaŋ pilap hinek uŋoŋdibek momogiyondaaŋ uhebineeŋ.