67
लय्तातां सुभाय्या भजन
लय् तइम्हय्सिगु निंतिं -- तारया बाजं नापं।
1 हे परमेश्वर,
जिमित दया यानादिसँ,
अले सुवाः बियादिसँ।
जिमित थःगु ख्वाःया दयाया
जलं खय्कादिसँ।* ६७:१ गन्ती ६:२४-२६
सेला
2 छिगु लँपुइ पृथ्वीइ च्वंपिं
फुक्कं जुइफयेमा।
छिगु उद्धारया शक्ति
फुक्क जातियापिन्सं सीमा।
3 हे परमेश्वर,
जात जातितय्सं छितः तःधंकेमा,
खः, फुक्क जात जातितय्सं
छितः तःधंकेमा।
4 देश देशयापिं मनूत लय्तायेमा,
अले लसतां म्ये हालेमा
छाय्धाःसा छिं जाति जातियापिन्त
उत्थें यानाः शासन यानादी।
अले देश देशयात लँ क्यनादी।
सेला
5 हे परमेश्वर,
जात जातितय्सं छितः तःधंकेमा,
खः, फुक्कसिनं छितः
तःधंकेमा।
6 पृथ्वीं अन्न सय्कूगु दु।
परमेश्वर, झी परमेश्वरं
झीत आशिष बियादीगु दु।
7 परमेश्वरं झीत आशिष
बियाच्वनादीमा।
अले पृथ्वीया कुंकुलामय् च्वंपिं
सकल मनूतय्सं
वय्कःयागु ग्याःभय काइ।