63
परमेश्वरया माया
जीवन स्वयाः तःधं
जीवन स्वयाः तःधं
दाऊदया भजन, यहूदाया मरुभूमिइ च्वनाच्वंबलय्
1 हे परमेश्वर,
छि जिम्ह परमेश्वर खः।
जिं छितः दुनुगलंनिसें
मालाजुया।
गंगु, झिझांदंगु व लः मदुगु बँ थें
जिगु नुगः छि मदयाः प्याःचाः।* ६३:१ १ शमू २३:१४
2 जिं छितः पवित्र थासय्
खनागु दु।
अले छिगु शक्ति व महिमा
नं खना।
3 छिगु माया जीवन स्वयाः तःधं।
उकिं जिं न्ह्याबलें
छितः तःधंके।
4 उकिं जिं मसितले
छितः तःधंके।
छिगु नां कयाः जिं थःगु
ल्हाः ल्ह्वने।
5 जिगु नुगः तःजिगु भ्वय् नये थें
लुधंगु दु।
जिगु म्हुतुं छिगु म्ये हालाः छितः
तःधंकाच्वनि।
6 जिं लासाय् नं छितः लुमंके।
चच्छिं जिं छिगु ध्यान
यानाच्वने।
7 छाय्धाःसा छिं जितः न्ह्याबलें
ग्वाहालि यानादीगु दु।
छिगु पपूया किचलय्
जिं लसताया म्ये हाले।
8 जिगु आत्मा छिलिसे
प्यपुनाच्वंगु दु।
छिगु जव ल्हातिं जितः
तिबः बियाच्वंगु दु।
9 जितः स्यायेत स्वयाच्वंपिं
नाश जुयावनी।
इपिं पातालय् कुतुंवनी।
10 इपिं तरवारं पालाः सी।
अले ध्वंतय्गु आहार जुइ।
11 जुजु परमेश्वर लिसे
लय्तायाच्वनि।
वय्कःयात विश्वास याइपिन्सं
वय्कःयात तःधंकी।
मखुगु खँ ल्हानाजुइपिनिगु
म्हुतुप्वाः धाःसा ती।