22
दुःखय् याःगु प्रार्थना
दाऊदया भजन, लय तइम्हय्सिगु निंतिं
“सुथया चला” लय कथं
“सुथया चला” लय कथं
1 हे परमेश्वर!
जिम्ह परमेश्वर,
छिं छाय् जितः त्वःतादियागु?
जिं छितः गुलि प्रार्थना याना नं
छि जिपाखें छाय्
तापाना च्वनागु?* २२:१ मत्ती २७:४६; मर्क १५:३४
2 चा-न्हिं जिं छितः प्रार्थना
यानाच्वना,
तर छिं लिसः बियामदी।
चान्हय् नं
जितः सुख शान्ति मदु।
3 अथेसां छि पवित्रम्ह
परमेश्वर खः
इस्राएलं छितः तःधंकू धकाः
जिं स्यू।
4 जिमि तापाःबाज्यापिन्सं
छिगु हे भलसा काःगु खः।
अले छिं इमित बचय्
यानादीगु खः।
5 इमिसं छितः प्रार्थना यात,
अले इपिं बचय् जुल।
इमिसं छिगु भलसा काल,
अले गुबलें मछालाच्वने
म्वाःल।
6 जि ला छम्ह की जक खः,
मनू मखु,
सकसिनं क्वह्यंकाः
व हेपंख्याकाच्वने माःम्ह!
7 खँक्वसिनं जितः
हेबाय्चबाय् याइ
इमिसं थःगु म्हुतु स्यंकाः
छ्यं क्वानाः थथे धाइ–* २२:७ मत्ती २७:३९; मर्क १५:२९; लूक २३:३५
8 “परमप्रभुयागु भलसा काइम्ह
थ्व हे मखु ला?
आः परमप्रभुं हे वयात
बचय् याकेब्यु।
परमप्रभुं वयात अपाय्सकं
माया याः धयागु खःसा
परमप्रभुं छाय् ग्वाहालि
याना मदीगु?”* २२:८ मत्ती २७:४३
9 छिं हे जितः मांया प्वाथं
बुइकादिल।
अले मांया मुलंनिसें हे
छिं जितः छिके भलसा
तइम्ह यानादिल।
10 बूखुन्हुनिसें हे
जितः छिगु ल्हातय् लःल्हात,
बूसांनिसें
छि जिम्ह परमेश्वर खः।
11 जिपाखें तापानादी मते,
दुःख जिगु न्ह्यःने हे
वयाच्वंगु दु।
जितः ग्वाहालि याइपिं
सुं हे मदु।
12 द्वहंतय्सं थें
जितः शत्रुतय्सं
घेरय् यानातःगु दु।
बाशान देशया
ग्यानापुपिं द्वहंतय्सं थें
जितः घेरय् यानातःगु दु।
13 सिंह थें हालाः
इपिं जितः कुचा कुचा थलेत
म्हुतुप्वाः चाय्काः
न्ह्याःवयाच्वंगु दु।
14 जिगु तागत लः थें
ज्वयावने धुंकल।
जिगु क्वँय्या फुक्क साहा साहा
ब्यनावने धुंकल।
सी थें जिगु नुगः
नायावने धुंकल।
15 जिगु कथुप्वाः धू थें
गने धुंकल,
जिगु मे थक्वय्
प्यपुने धुंकल,
छिं जितः सित धकाः
धुलय् वांछ्वयादिल।
16 जिमि शत्रुत खिचात थें
जिगु प्यखें मुंवःगु दु।
इमिसं जिगु ल्हाः तुति
त्यात्यायाये धुंकल।
17 जिगु म्हय् च्वंगु क्वँय्
फुक्क खनेदये धुंकल।
जिमि शत्रुतय्सं जितः स्वयाः
“हः” धयाच्वंगु दु।
18 इमिसं जिगु लं चिट्ठा तयाः
थःथवय् इनाकाइ।* २२:१८ मत्ती २७:३५; मर्क १५:२४; लूक २३:२४; यूह १९:२४
19 हे परमप्रभु!
जिपाखें तापानादी मते।
छि हे जिगु तागत खः।
जितः ग्वाहालि याः झासँ।
20 थ्व तरवारपाखें जितः
बचय् यानादिसँ।
थ्व खिचातय्पाखें जिगु प्राणयात
बचय् यानादिसँ।
21 सिंहया म्हुतुं जितः
पिकयादिसँ
द्वहंया न्यकुतिं जितः
बचय् यानादिसँ।
22 जिं जिमि मनूतय्त
छिं यानादीगु खँ कने,
जिं छितः इमिगु पुचलय्
तःधंके।* २२:२२ हिब २:१२
23 हे परमप्रभुया ग्याःभय काइपिं,
वय्कःया प्रशंसा या!
हे याकूबया सन्तान, वय्कःयात
हनाबना ति!
हे इस्राएलया मनूत,
वय्कःयागु आराधना या!
24 परमप्रभु मनूतय्गु
दुःखयात च्यूताः मतसे
जुयादीम्ह मखु,
अले इमित
क्वह्यंकादीम्ह नं मखु।
छाय्धाःसा जिं वय्कःयात
प्रार्थना यानाबलय्
वय्कलं न्यनादिल।
वय्कः जिपाखें फस्वया मदी।
25 छिं यानादीगु ज्याया निंतिं
जिं तःधंगु सभाय्
छितः सकसिगु न्ह्यःने
तःधंके।
छिगु ग्याःभय काइपिनिगु न्ह्यःने जिं थःगु बचं पूवंके।
26 नयेमखंपिन्सं लुधंक नयेखनी
परमप्रभुयात मालाजुइपिन्सं
वय्कःयात तःधंकी।
इमिगु नुगः
न्ह्याबलें लसतां जायाच्वनि।
27 फुक्क जातियापिन्सं
वय्कःयात नालाकाइ,
अले परमप्रभुया थाय् वइ।
फुक्क जातिया मनूतय्सं
वय्कःयात भागि याइ।
28 परमप्रभु जुजु खः।
वय्कलं फुक्क जातियापिन्त
शासन याइ।
29 तःधंछुया जुइपिं
फुक्कसिनं वयाः
वय्कःया न्ह्यःने
छ्यं क्वछुकी।
सीमानिपिं फुक्कसिनं वयाः
वय्कःया न्ह्यःने
छ्यं क्वछुकी।
30 लिपा वइपिं सन्तानतय्सं नं
परमप्रभुयागु सेवा याइ।
लिपा वइपिन्सं नं
वय्कःयागु खँ न्यनाकाइ
31 बु हे मबूनिपिं मनूतय्त नं न्यंकी–
“परमप्रभुं थः मनूतय्त बचय्
यानादिल।”