119
परमेश्वरया व्यवस्था
1 धन्य खः दोष मदय्क
म्वानाच्वनिपिं
व परमप्रभुया स्यनातःगु खँकथं
जुइपिं मनूत।
2 धन्य खः वय्कःया नियम
पालन याइपिं
व वय्कःयात दुनुगलंनिसें
मालिपिं मनूत।
3 इमिसं छुं नं मभिं ज्या याइ मखु,
इपिं वय्कःया लँपुइ वनी।
4 छिं जिमित छिगु उपदेश
बांलाक पालन यायेमाः
धकाः उजं बियादीगु दु।
5 छिगु व्यवस्था पालन यायेत
जिगु पहःचहः क्वातुगु जूसा
गुलि बांलाइगु।
6 अले छिगु फुक्क आज्ञाय्
ध्यान बियागुलिं
जि मछालेमालि मखु।
7 छिगु धार्मिक विधि सय्का
काइबलय्
जिं स्वजा मनं छितः सुभाय् बी।
8 जिं छिगु व्यवस्था पालन याये,
उकिं जितः त्वःतादी मते।
बेथ
9 छम्ह ल्याय्म्हम्ह मनुखं
गथे थःगु जीवन
शुद्ध तयेफइ?
छिगु वचनकथं
म्वानाः हे खः।
10 जिं दुनुगलंनिसें छितः
मालाच्वनागु दु,
छिगु आज्ञा पाखें जितः
उखे थुखे वनेबियादी मते।
11 छिगु विरोधय् पाप याये
म्वालेमा धकाः
छिगु बचं जिं थःगु नुगलय्
तयातयागु दु।
12 हे परमप्रभु, छिगु प्रशंसा जुइमा,
छिगु व्यवस्था जितः स्यनादिसँ।
13 जिं थःगु म्हुतुसिं
छिगु म्हुतुं पिहां वःगु
फुक्क विधि कनागु दु।
14 यक्व धन-सम्पत्तिया कारणं
लय्ताःगु थें
जि छिगु नियम पालन यायेत
लय्ताये।
15 छिगु उपदेशय् जिं ध्यान याये,
अले छिं स्यनादीगु खँय्
बिचाः याये।
16 छिगु व्यवस्था जि लय्ताये,
छिगु वचनयात जिं
ल्वःमंके मखु।
गिमेल
17 थः दासयात भिं यानादिसँ,
अले जि म्वानाच्वनी,
अले छिगु वचन पालन याये।
18 छिं स्यनातःगु खँया
अजूचायापुगु खँ खंकेत
जिगु मिखा चाय्कादिसँ।
19 पृथ्वीइ जि छम्ह परदेशी
जक खः,
उकिं जिपाखें थःगु आज्ञा
सुचुकादी मते।
20 छिगु विधि सीकेत
जिगु मन सदां आय्बुयाच्वन।
21 सराः लाःपिं व छिगु आज्ञा
पालन मयाइपिं घमण्डीतय्त
छिं हक्कादी।
22 जिपाखें इमिगु हेला
व अपमान चीकादिसँ,
छाय्धाःसा जिं छिगु नियम
पालन यानागु दु।
23 शासकत नापं च्वनाः
जिगु बारे मखुगु खँ ल्हाःसां
जिं छिगु व्यवस्थाय् ध्यान याये।
24 छिगु नियम जिगु लसता खः,
उपिं जितः सल्लाह बीपिं खः।
दालेथ
25 जिगु म्ह धुलय् प्यपुनाच्वंगु दु।
छिं थःगु वचनकथं जितः
हाकनं म्वाकादिसँ।
26 जिं जिगु पहःचहः छितः
कनागु दु,
अले छिं लिसः बियादिल।
जितः छिगु व्यवस्था
स्यनादिसँ।
27 जितः छिगु उपदेशया अर्थ
थुइकेबियादिसँ,
अले जिं छिगु अजूचायापुगु
ज्याय् ध्यान याये।
28 नुगः मछिनाः जिगु प्राण
न्यलावनी,
छिगु वचनकथं जितः
बल्लाकादिसँ।
29 जिपाखें मखुगु लँ चीकादिसँ,
अले दया यानाः
जितः थःगु स्यनातःगु खँ
बियादिसँ।
30 जिं विश्वास याये बहः जुइगु
ल्ययागु दु,
छिगु विधि जिं थःगु न्ह्यःने
तयागु दु।
31 जि छिगु नियमय्
प्यपुनाच्वनागु दु, हे परमप्रभु,
जितः लज्याय् लाकादी मते।
32 जि छिगु आज्ञाया लँपुइ
ब्वाँय् वने,
छाय्धाःसा छिं जिगु नुगःयात
स्वतन्त्र यानादीगु दु।
हे
33 हे परमप्रभु,
छिगु व्यवस्था पालन यायेगु
जितः स्यनादिसँ,
अले लिपाथ्यंक जिं
व पालन याये।
34 छिं स्यनातःगु खँया अर्थ
थुइकादिसँ।
अले जिं व पालन याये,
दुनुगलंनिसें जिं
व पालन याये।
35 जितः थःगु आज्ञाया लँपुइ
यंकादिसँ,
छाय्धाःसा जि उकी हे
लय्ताये।
36 जिगु नुगःयात लोभ पाखे मखु
छिगु नियमपाखे हीकादिसँ।
37 ज्यालगय् मजूगु खँ
स्वयेगु पाखें
जिगु मिखायात हीकादिसँ,
छिगु वचनकथं
जिगु प्राणयात रक्षा यानादिसँ।
38 छिगु भय काइम्ह छिकपिनि
दासया निंतिं
थःम्हं बियादीगु बचं
पूवंकादिसँ।
39 जिपाखें इमिगु हेला व अपमान
चीकादिसँ,
छाय्धाःसा छिगु विधि भिं।
40 जितः छिगु आज्ञा यः,
छिगु धार्मिकताया कारणं
जितः म्वाका तयादिसँ।
वाव
41 हे परमप्रभु,
छिगु सदां दयाच्वनिगु दया माया
व छिगु बचंकथं
छिगु उद्धार जिथाय् वयेमा।
42 अले जिं थःत हिस्याइपिन्त
लिसः बी फइ,
छाय्धाःसा छिगु वचनय्
जिगु भरोसा दु।
43 जिगु म्हुतुं सत्यया वचन
लाकाकयादी मते,
छाय्धाःसा जिं छिगु विधिइ
आशा तयागु दु।
44 छिं स्यनातःगु खँ
जिं सदां पालन याना हे च्वने।
45 अले जि स्वतन्त्र जुयाः म्वाये
छाय्धाःसा जिं छिगु उपदेश
मालागु दु।
46 अले जिं छिगु नियमया बारे
जुजुपिनिगु न्ह्यःने नवाये,
जि लज्या चाये मखु।
47 छाय्धाःसा
जि छिगु आज्ञाया कारणं
लय्ता,
अले जिं उकियात
माया याना।
48 जिं थःम्हं माया यानागु
छिगु आज्ञा पाखे
थःगु ल्हाः ल्ह्वने,
अले छिगु व्यवस्थाय्
ध्यान याये।
जाइन्
49 थः दासयात बियादीगु वचन
लुमंकादिसँ,
छाय्धाःसा छिं जितः
आशा बियादीगु दु।
50 जिगु दुःखय् जितः थुकिं हे
शान्ति दत,
छाय्धाःसा छिगु बचंपाखें
जितः जीवन दत।
51 तःधंछु जुइपिन्सं जितः
यक्व हे हिस्याःगु दु,
अय्नं छिं स्यनातःगु खँपाखें
जि लिचिलागु मदु।
52 हे परमप्रभु,
छिगु पुलांगु विधि
लुमंकाच्वना,
उकिं जितः शान्ति दइ।
53 छिं स्यनातःगु खँ त्वःतूपिं
दुष्टतय्सं यानाः
जितः तसकं तं पिहां वइगु।
54 जि न्ह्याथाय् च्वंसां
छिगु व्यवस्था हे
जिगु म्ये जूगु दु।
55 हे परमप्रभु,
जिं चान्हय् छिगु नां
लुमंकेगु यानागु दु।
अले जिं छिं स्यनातःगु खँ
जिं पालन यानागु दु।
56 जिं उपदेश पालन यानागुलिं हे
थ्व जितः जूगु खः।
हेथ
57 छि जिगु ब्व खः, हे परमप्रभु,
जिं छिगु वचनकथं
जुइगु क्वःछिनागु दु।
58 जिं दुनुगलंनिसें छिगु ख्वाः
मालागु दु,
छिगु बचंकथं
जितः दया यानादिसँ।
59 जिं थःगु पहःचहःया बारे
बिचाः यानागु दु,
अले छिगु नियमपाखे
थःगु पलाः न्ह्याकागु दु।
60 जिं छिगु आज्ञा पालन यायेत
लिबाकागु मदु
बरु हथाय् चायागु दु।
61 दुष्टतय्सं खिपतं च्यूसां
जिं छिगु स्यनातःगु खँयात
ल्वःमंके मखु।
62 छिगु धार्मिक विधिया लागि
जि बाचा इलय्
छितः सुभाय् बीत दने।
63 छिगु भय काइपिं व छिगु उपदेश
पालन याइपिं सकसिया
जि छम्ह पासा खः।
64 हे परमप्रभु, छिगु
सदां दयाच्वनिगु दया मायां
पृथ्वी जाःगु दु,
जितः छिगु व्यवस्था स्यनादिसँ।
टेथ
65 हे परमप्रभु,
छिं थःगु वचनकथं
थः दासयात भिं यानादिसँ।
66 जितः ज्ञान व बुद्धिया खँ
स्यनादिसँ,
छाय्धाःसा जिं छिगु आज्ञायात
विश्वास याना।
67 जितः सजाँय जुइ न्ह्यः
जिं लँ द्वंकागु खः,
तर आः जिं छिगु वचन
पालन याना।
68 छि भिंम्ह खः,
अले भिं यानादी,
जितः छिगु व्यवस्था
स्यनादिसँ।
69 तःधंछुया जुइपिन्सं
जिगु विरोधय् मखुगु खँ
पिकाःगु दु,
अय्नं जिं दुनुगलंनिसें
छिगु उपदेश पालन याना।
70 इमिगु नुगः छाःगु दु,
अय्नं जि ला छिं स्यनातःगु
खँया कारणं लय्ताः।
71 छिगु व्यवस्था सय्कागुलिं
जितः दुःख जूगु
जिगु लागि बांहेलात।
72 छिं स्यनातःगु खँ
जिगु निंतिं लुँ व वहःयागु
द्वलंद्वः कुचा स्वयाः मू वं।
योध
73 छिगु हे ल्हातं जितः
दय्कादीगु व समाः
यानादीगु खः।
जितः छिगु आज्ञा थुइकेत
गाक्क बुद्धि बियादिसँ।
74 छिगु भय काइपिं जितः खनाः
लय्तायेमा,
छाय्धाःसा जिं छिगु वचनय्
आशा तयागु दु।
75 हे परमप्रभु, छिगु विधि
धार्मिक खः धकाः जिं स्यू,
छिं जितः दुःख बियादीगु
पाय्छि खः धकाः जिं स्यू।
76 छिगु बचंकथं
छिकपिनि दास जितः
छिगु सदां दयाच्वनिगु
दया मायां शान्ति दयेमा।
77 जि म्वानाच्वनेत जितः
दया यानादिसँ,
छाय्धाःसा छिं स्यनातःगु खँ
जिगु लसता खः।
78 तःधंछुया जुइपिं लज्याय्
लायेमा,
छाय्धाःसा इमिसं
छुं हे कारण मदय्क
जितः मखुगु द्वपं ब्यूगु दु।
अय्नं जिं ला
छिगु उपदेशय् ध्यान बी।
79 छिगु भय काइपिं
व छिगु नियम थूपिं
जिपाखे फहिलेमा।
80 जिं दुनुगलंनिसें
छिगु व्यवस्था मानय्
याये फयेमा,
लज्या चाये म्वालेमा।
काफ
81 हे परमप्रभु,
जि छिपाखें उद्धार कायेत
प्याःचाः,
जिं छिगु वचनय् आशा
तयागु दु।
82 छिगु बचं पिया च्वँच्वं
जिगु मिखा बुलुसे
च्वने धुंकल।
जिं धाये,
“छिं गुबलय् शान्ति बियादी?”
83 कुँलय् तयातःगु छेंगूया
म्हिचाय् दाखमद्य तइगु थें
जि जुइ धुंकूगु दु,
अय्नं छिगु व्यवस्था जिं
ल्वःमंकागु मदुनि।
84 छिकपिनि दासं
अज्ज गुलि पी मानि?
जितः दुःख बीपिन्त छिं गुबलय्
सजाँय बियादीगु?
85 छिगु स्यनातःगु खँकथं
मजुइपिं तःधंछु जुइपिन्सं
जिगु निंतिं गाः म्हूगु दु।
86 छिगु आज्ञा फुक्क
भरोसा याये बहः जू।
जितः ग्वाहालि यानादिसँ,
मनूतय्सं छुं कारण मदयेकं
जितः दुःख बीगु।
87 इमिसं जितः झन्दिले पृथ्वीं
नाश यानाबी धुंकूगु।
अय्नं जिं छिगु उपदेश
त्वःतागु मदुनि।
88 छिगु सदां दयाच्वनिगु
दया मायाकथं
जिगु प्राणयात रक्षा यानादिसँ,
अले जिं छिगु म्हुतुं पिहां वःगु
नियम पालन याये।
लामेध
89 हे परमप्रभु,
छि न्ह्याबलें दयाच्वनी,
छिगु वचन न्ह्याबलें स्वर्गय्
दयाच्वनी।
90 छिगु विश्वास याये बहःसू
पुस्तां पुस्तातक दयाच्वनी।
छिं पृथ्वीयात थापं यानादीगु दु,
अले व दयाच्वनी।
91 छिगु विधि थौंतक नं
दयाच्वंगु दु,
छाय्धाःसा फुक्क सृष्टिं
छिगु सेवा याइ।
92 छिगु स्यनातःगु खं जि
लय्मताःगु जूसा
दुःखया इलय्
जि नाश जुइधुंकीगु।
93 जिं गुबलें छिगु उपदेश
ल्वःमंके मखु,
छाय्धाःसा छिं उपिं पाखें हे
जिगु जीवनयात रक्षा
यानादीगु दु।
94 जि छिकपिनिम्ह हे खः,
छिं जितः बचय् यानादिसँ,
जिं छिगु उपदेश मालागु दु।
95 दुष्टत जितः नाश यायेत
पियाच्वंगु दु,
तर जिं छिगु उपदेशय्
ध्यान याये।
96 फुक्क सृष्टियागु सीमा दु,
तर छिगु आज्ञाया सीमा मदु।
मेम
97 छिगु स्यनातःगु खँयात
जिं गुलि माया याना!
न्हिच्छि हे जिगु
ध्यान उकी हे वनाच्वनी।
98 छिगु आज्ञा न्ह्याबलें जिगु मनय् दु,
उकिं जितः जिमि शत्रुत स्वयाः
बुद्धि दुम्ह दय्की।
99 जिमि गुरूत स्वयाः यक्व जिं थु,
छाय्धाःसा जिं छिगु नियमय्
ध्यान बिया।
100 थकालिपिं मनूतय् स्वयाः
यक्व बुद्धि जिके दु,
छाय्धाःसा जिं छिगु उपदेश
पालन याना।
101 छिगु वचन पालन याये धकाः
जिं थःगु तुतियात फुक्क मभिंगु
लँपुपाखें अलग तयागु दु।
102 जिं छिगु विधि त्वःतागु मदु,
छाय्धाःसा छिं हे
जितः स्यनादीगु दु।
103 छिगु वचन जितः गुलि साः,
जिगु म्हुतुया निंतिं
कस्ति स्वयाः नं साः।
104 छिगु उपदेश पाखें जितः
बुद्धि दुम्ह दय्की,
उकिं फुक्क मखुगु लँपु
जितः मयः।
नुन
105 छिगु वचन
जिगु तुतिया निंतिं मत,
अले जिगु लँपुया निंतिं
जः खः।
106 छिगु धार्मिक विधि
पालन याये धकाः
जिं पाफयागु दु,
अले उकियात जिं पक्का
यानागु दु।
107 जिं तसकं दुःख सियागु दु,
हे परमप्रभु, थःगु वचनकथं
जितः म्वाकातयादिसँ।
108 हे परमप्रभु!
जिगु म्हुतुं पिहां वःगु
थः यसें बलि
नालाकयादिसँ,
अले छिगु विधि
जितः स्यनादिसँ।
109 जिं थःगु जीवन पायेत तयार दु,
अय्नं छिं स्यनातःगु खँ
जिं ल्वःमंके मखु।
110 दुष्टतय्सं जिगु निंतिं
जाः ग्वःगु दुसां
छिगु उपदेश पाखें
जि उखे थुखे वनागु मदु।
111 छिगु नियम न्ह्याबलेंया निंतिं
जिगु मू वंगु सम्पत्ति जूगु दु।
उकिं जिगु नुगःयात
लय्ताय्की।
112 छिगु व्यवस्था लिपा थ्यंक
पालन यायेगु
जिं क्वःछिनागु दु।
समेख
113 दोमन दुपिं मनूत जितः
तसकं मयः,
अय्नं छिं स्यनातःगु खँयात
जिं माया याना।
114 छि जिगु शरण कायेगु थाय्
व ढाल खः,
जिं छिगु वचनय् आशा
तयागु दु।
115 हे मभिंगु ज्या याइपिं मनूत,
जिपाखें तापाक हुँ,
अले जिं जिमि परमेश्वरया आज्ञा
पालन याये फइ।
116 हे परमप्रभु,
जि म्वानाच्वने फयेमा धकाः
छिगु बचंकथं जितः लिधंसा
बियादिसँ,
अले जिगु आशाया लागि
जितः लज्याय् लाकादी मते।
117 जितः लिधंसा बियादिसँ,
अले जि म्वाइ।
छिगु व्यवस्थाय् जिं न्ह्याबलें
ध्यान याना च्वने।
118 छिगु व्यवस्था पाखें
उखे थुखे वंपिं सकसितं
छिं चीकादीगु दु,
छाय्धाःसा इमिगु छल
ज्यालगय् जुइ मखु।
119 पृथ्वीइ फुक्क दुष्टतय्त
छिं फोहर थें वांछ्वयादी।
अथे जुयाः छिगु नियमयात
जिं माया याना।
120 छिगु भयं यानाः
जिगु म्ह खाइ,
अले छिगु विधि खनाः
जि ग्याना।
एयिन
121 जिं ला धार्मिकता व न्यायया
ज्या यानागु दु,
छिं जितः शत्रुतय्गु ल्हातय्
त्वःतादी मते।
122 छिकपिनि दासया भिंया लागि
जमानी जुयादिसँ,
तःधंछु जुइपिन्सं जितः
क्वत्यकेबियादी मते।
123 छिगु उद्धार
व छिगु धार्मिकताया
बचंयात पियाच्वँच्वं
जिगु मिखा बुलुसे च्वने धुंकल।
124 थः दासनापं थःगु
सदां दयाच्वनिगु दया माया
क्यनादिसँ,
अले छिगु व्यवस्था जितः
स्यनादिसँ।
125 जि छिकपिनि दास खः,
छिगु नियम म्हसीकेत
जितः थुइकेगु शक्ति
बियादिसँ।
126 हे परमप्रभु, दनादिसँ!
ई वःगु दु छिं ज्या यानादिसँ,
इमिसं छिं स्यनातःगु खँ
त्वथुले धुंकल।
127 जिं छिगु आज्ञायात लुँ स्वयाः
अप्वः भिंगु लुँ स्वयाः
नं अप्वः माया याना।
128 उकिं जिं छिगु फुक्क उपदेश
मानय् याना,
अले फुक्क मखुगु लँपु
जितः तसकं मयः।
पे
129 छिगु नियम अजूचायापुसे च्वं,
उकिं जिं दुनुगलंनिसें
उपिं पालन याना।
130 छिगु वचन थुइकाबीबलय्
जिमित जः दइ।
थुकिं छुं मस्यूपिन्त ज्ञान दइ।
131 जिं म्हुतु चाय्काः
स्वां-स्वां वय्काः
छाय्धाःसा जि छिगु आज्ञाया
लागि प्याःचाः।
132 छिगु नांयात माया याइपिन्त
छिं गथे यानादी,
अथे हे जिपाखे फहिलाः जितः
दया यानादिसँ।
133 छिं थःगु बचंकथं जिगु पलाः
बल्लाकादिसँ।
छुं नं पापयात जितः शासन
याकेबियादी मते।
134 जितः क्वत्यलातःपिं पाखें
त्वःतकादिसँ,
अले जिं छिगु उपदेश
पालन याये।
135 छिं थःगु ख्वाःया जलं
जिमित खय्कादिसँ,
छिगु व्यवस्था जितः
स्यनादिसँ।
136 जिगु मिखां ख्वबिया धाः
हाया हे च्वनि,
छाय्धाःसा मनूतय्सं छिं
स्यनातःगु खँयात मानय्
याइ मखु।
साधे
137 हे परमप्रभु, छि धर्मी खः,
छिगु विधि सत्य खः।
138 छिं बियादीगु नियम धार्मिक जू,
उपिं तसकं
विश्वास याये बहः जू।
139 जिगु जोसं जितः नये धुंकल
छाय्धाःसा जिमि शत्रुतय्सं
छिगु वचन मानय् मयाः।
140 छिगु बचंयात पूवंक
जाँचय् याःगु दु,
अले जिं उकियात
यक्व माया याना।
141 जि चिधंम्ह
व क्वह्यंम्ह खः सां
जिं छिगु उपदेशयात
ल्वःमंके मखु।
142 हे परमप्रभु!
छिगु धार्मिकता न्ह्याबलें
दयाच्वनी,
अले छिं स्यनातःगु खँ
सत्य खः।
143 जिके दुःख व संकट वःगु दु,
अय्नं छिगु आज्ञां जितः
लय्ताय्की।
144 छिगु नियम न्ह्याबलेंया लागि
पाय्छि जू,
जितः थुइके बियादिसँ,
अले जि म्वानाच्वनी।
कोफ
145 हे परमप्रभु!
जिं दुनुगलंनिसें छितः सःता
च्वनागु दु,
जितः लिसः बियादिसँ!
जिं छिगु व्यवस्था मानय् याये।
146 जिं छितः सःताच्वनागु दु,
जितः बचय् यानादिसँ,
अले जिं छिगु नियम
पालन याये।
147 सुथ जुइ न्ह्यः हे दनाः
जिं ग्वाहालिया लागि तसकं
हाला च्वनागु दु,
छिगु वचनया आशा
यानाच्वनागु दु।
148 छिगु बचनय् ध्यान यायेत
चच्छि हे जि मद्यंसे च्वनेगु।
149 हे परमप्रभु!
थःगु सदां दयाच्वनिगु
दया मायाकथं
जिगु बिन्ति न्यनादिसँ,
थःगु विधिकथं
जितः रक्षा यानादिसँ।
150 मभिंगु बिचाः यानाः
जितः सास्ति बीपिं मनूत
सतिक वये धुंकूगु दु।
इपिं छिं स्यनातःगु खं
तापाक हे दु।
151 छि धाःसा जिगु सतिक दी,
हे परमप्रभु,
अले छिगु फुक्क आज्ञा
सत्य खः।
152 यक्व न्हापां निसें हे जिं
छिं न्ह्याबलेंया लागि
थापं यानादीगु छिगु नियम स्यू।
रेश
153 जिगु दुःखयात बिचाः यानाः
जितः त्वःतकादिसँ।
छाय्धाःसा छिं स्यनातःगु खँयात
जिं ल्वःमंकागु मदु।
154 जिगु मुद्दा ल्वानादिसँ,
अले जितः त्वःतकादिसँ।
थःगु बचंकथं
जिगु जीवन रक्षा यानादिसँ।
155 उद्धार दुष्टत पाखें तापाः
छाय्धाःसा इमिसं छिगु
व्यवस्था माली मखु।
156 हे परमप्रभु,
छिगु दया तसकं तःधं,
उकिं छिगु विधिकथं
जिगु जीवन रक्षा यानादिसँ।
157 जितः दुःख बीपिं
यक्व शत्रुत दु,
अय्नं जिं छिगु नियम
मानय् यायेगु त्वःतागु मदु।
158 ध्वंलाइपिं खनाः
जि तसकं घच्चाः,
छाय्धाःसा इमिसं छिगु वचन
पालन मया।
159 स्वयादिसँ! छिगु उपदेशयात
जिं गुलि माया याना।
हे परमप्रभु! छिगु सदां
दयाच्वनिगु दया मायाकथं
जिगु जीवन रक्षा यानादिसँ।
160 छिगु फुक्क वचन
सत्य हे खः,
छिगु फुक्क धार्मिक विधि
न्ह्याबलें दयाच्वनी।
शीन
161 शासकतय्सं छुं हे कारण
मदय्कं जितः सास्ति बी।
अय्नं जिगु नुगलं छिगु वचनया
भय काइ।
162 गथे यक्व धन दयाः
मनू लय्ताइ
अथे हे जि छिगु बचंया कारणं
लय्ताये।
163 मखुगु खँ जितः तसकं मयः
तर छिं स्यनातःगु खँयात
माया याना।
164 छिगु धार्मिक विधिया कारणं
न्हिइ न्हय्क्वः
जिं छिगु प्रशंसा याना।
165 छिगु स्यनातःगु खँयात माया
याइपिन्त तःधंगु शान्ति दइ,
इमित लुफिं हाइगु
छुं कारण दइ मखु।
166 हे परमप्रभु,
जिं छिगु उद्धार पियाच्वनागु दु,
छिगु आज्ञा पालन यानागु दु।
167 जिं छिगु नियम पालन
यानागु दु,
जिं उकियात दुनुगलंनिसें
माया याना।
168 जिं छिगु उपदेश व नियम
पालन यानागु दु,
छाय्धाःसा जिगु फुक्क
पहःचहः छिगु हे न्ह्यःने दु।
ताव
169 हे परमप्रभु,
जिगु इनाप छिगु न्ह्यःने थ्यनेमा,
छिगु वचनकथं जितः
थुइकेबियादिसँ।
170 जिगु बिन्ति छिथाय् थ्यनेमा,
छिगु बचंकथं जितः छुत्कारा
बियादिसँ।
171 जिगु म्हुतुसिं छिगु प्रशंसा
यायेमा,
छाय्धाःसा छिं जितः
छिगु व्यवस्था स्यनादीगु दु।
172 जिगु म्हुतुं छिगु बचंया
भजन हालेमा,
छाय्धाःसा छिगु फुक्क
आज्ञा भिं।
173 छिगु ल्हातं जितः ग्वाहालि
यानादिसँ,
छाय्धाःसा जिं छिगु उपदेश
ल्ययागु दु।
174 हे परमप्रभु!
छिगु उद्धारया लागि जि प्याःचाः,
अले छिं स्यनातःगु खँ
जिगु लसता खः।
175 जितः रक्षा यानादिसँ,
अले जिं छिगु प्रशंसा याये,
अले छिगु विधि पाखें जितः
ग्वाहालि दयेमा।
176 तंम्ह फै थें जि मखुगु लँय्
वनागु दु,
छिकपिनि दासयात मालादिसँ,
छाय्धाःसा जिं छिगु आज्ञा
ल्वःमंकागु मदु।
†^ 119:0 थ्व भजन आखः छगः छगः हनाः खँग्व जुइकथं च्वयातःगु चिनाखँ खः। थुकिया फुक्क ब्वया पद छगू हे हिब्रु आखलं शुरू जूगु दु।