56
परमेश्वरयागु भरोसाया प्रार्थना
दाऊदया भजन, लय् तइम्हय्सिगु निंतिं -- “तापाक स्वंसिमाय् च्वनाच्वंम्ह सुकुभत्तु” या रागय् पलिस्तितय्सं गात शहरय् ज्वंबलय्।
1 हे परमेश्वर,
जितः दया यानादिसँ।
जिमि शत्रुतय्सं जितः न्ह्याबलें
लितुलिनाच्वन।
इमिसं जितः हय्क्कायेत
स्वयाच्वन।* ५६:१ १ शमू २१:१३-१५
2 जितः महीपिन्सं जितः
न्हिच्छि हे लिनाच्वन।
गुलिं गुलिंसिनं ला घमण्ड यानाः
हय्क्कायेत नं स्वयाच्वन।
3 ग्याइबलय् जिं थःगु भरोसा
छिके हे तये।
4 जिं परमेश्वरयागु वचनयात
तःधंकाच्वना,
व हे परमेश्वरयात जिं
भरोसा यानागु दु।
जि ग्याये मखु।
मनूतय्सं जितः छु याये फइ?
5 इमिसं न्ह्याबलें जिगु खँयात
अःखतं थुइकाच्वनि।
अले न्ह्याबलें जितः दायेगु
ग्वसाः ग्वयाच्वनि।
6 इमिसं न्ह्याबलें जितः स्यायेगु
त्वह दइ ला धकाः
पलाः पलाः पत्तिं
चिवा कयाच्वनि।
7 हे परमेश्वर!
इमिगु मभिंगु ज्याया निंतिं
इमित सजाँय बियादिसँ।
थःगु तमय् जात जातितय्त
क्वथलादिसँ।
8 छिं स्यू जिं गुलि दुःखकष्ट
फयेधुन।
छिं जिगु ख्वबिया ल्याःचाः
तयादीगु दु।
छिं थ्व फुक्क थःगु सफुलिइ
च्वयादीगु दु।
9 जिं ग्वाहालिया निंतिं छितः
प्रार्थना यायेबलय्
जिमि शत्रुत बिस्युंवनी।
परमेश्वर जिलिसे हे दु धकाः
जिं स्यू।
10 जिं परमेश्वरया वचनयात
तःधंका।
जिं परमपप्रभुया वचनयात
तःधंका।
11 जिं परमेश्वरयात भरोसा याना।
जि ग्याये मखु,
मनूतय्सं जितः छु याये फइ?
12 हे परमेश्वर!
जिं यानागु भाकल पूवंके।
जिं छितः सुभाय्या
बलि छायेहये।
13 छाय्धाःसा छिं जितः मृत्युपाखें
बचय् यानाः हयादीगु दु।
छिं जितः लुफिं हानाः
दय्केबिया मदी।
उकिं जि छिगु न्ह्यःने
जीवन बीगु जलय् जुइफुगु दु।