Sam Kratrtqki-esz'-nzpnu-esz'-nrade-nzlvqn (115)
Naglqlzku Yawe Mz Nzngini-krde Gct Angidr
Bzkq Angioku Mqngr Drka'
1 Yawe, nim txpwz kx takitrde nzarmyalzngr, a' trngiu nigr.
Murde nim txpwz kx aodu zvz x trataowq natqm kcng tqyrlqq.
2 Delc trtakitrdeu lr mrkzbleng nzrpi-zvz-krmlr bagu kx,
“?Myxpe Gct rmu?”
3 Murde Gct rgu mncom Heven,
X rngisc zmatq ngr nzale-krde nikeng suti drtwrde.
4 A' kxnzmnc-mrbrng nzangiolr mqngr da kxnzlz
Kcng tzwzngr leplz mz mqdr.
5-7 A' mqngr da kxnzlz lcng trnzycmneung x trnzobqung.
Trnzxlrung, trnzycminiung,
X trnzrtcngiung da.
Trnzrmaleung x trnzvzneung.
8 Leplz kcng tzrwz-ngrng mqngr drka' lcng tzlz
X krkcng tzangiolr nidr nzapu-kzlr nidr mz trnzrngisc-krdru zmatq.
Nznabung, mztr mwi, nradrtqdr ngq, trnzycngrlrung,
Trnzrtcngiung da, trnzxngitrung, x trnzvzneung.
A' Na-angio-txpwzku Yawe Gct Rgu
9-11 Nimu kcng tzaxvctr-lzbq-kzpqng bagr mz nzangio-krgr Yawe,
X nimu pris nedeng mz nqvi lr Eron,
X nigu lr Israel amrlx na-abrtrpzku drtwrgu bade.
Murde nide temz ngr lomrgu kc tqyrputrngr nipna.
12-13 Yc zvz mz drtwrde nigu x sa na-amrlz-zvzle nigu.
A' sa na-amrlzle nimu kcng tzaxvctr-lzbqmqng mz nzangiongr nide,
X nimu nqvi lr Eron, x nigu lr Israel amrlx.
Kxmule-esz' nigu leplz txneng o kxnzetung,
14-15 Krka'-ngrne kx Yawe kc tqwz-ngrde Heven x nrlc
Na-amrlz-ebir-ngrde nimu badr doa nemung.
16 Heven mztea nyz Yawe,
A' kamle bagu, nrlc ka.
17-18 X nigu kxnzlung mz nrlc ka na-awibzku bade,
Murde kxnzbzpeng kcng tzyrtzmqpeng mz gq, rblx nzglqlz-krdr nide.
Naglqlzku Yawe na-abzo mzli ka x tqvzpe tqvzpe.
Naglqlzku Yawe!