Sam Kranzpnu-esz'mz-nrade-li (62)
Mnc-xgle-zvzku Gct Txpwz
Nabz ne Devet kx yrbzle mz kxrmailz ngr dzbe kxnzngrng.
Mnc-xgleamu Gct
1 Gct txpwz kx mnc-xgle-zvzx mz nabznge,
Murde nzmnc-zpwx-krnge vzpxm bade.
2 Nide butqbr nyznge x mevalu rnge.
Nide lrpalvc nyznge kx tu-amqngio-ngrne.
3 Delc nimu kxdrka'-ngrng bzkq tz-zvzpeamu ninge mzli ka trxplrpewxu.
X bzkq apusr-ngrnamu ninge nzawxo-krmu ma kx blzlongr.
4 Ryrlqamu drtwr ngr nzapotxo-krmamu ninge me matq kc tqmnco-ngrmc.
X abrtzlvzamu nzpokiatitr-krmu ninge.
Murde nivz lr naomu prlxmamu bange,
A' mz nabzmu la, ngyati drtwrmu ninge.
Na-abrtxtrpwzmu Drtwrmu Mz Gct
5 Gct txpwz kx mnc-xgle-zvzx mz nabznge,
Murde nzmnc-zpwx-krnge vzpxm bade.
6 Nide butqbr nyznge kx abrkitrx drtwrnge.
Nide lrpalvc nyznge kx tu-amqngio-zvz-ngrne.
7 Nzarlapx-krnge x nzmrlue-krnge yctr txpwz bade,
Mz nzngini-krde butqbr nyznge kxmqngi kx rlakitrx.
8 Leplz nengeng, mz nzangidati-krbzle da kx yc mz drtwrmu, na-abrtxtrpwzmu drtwrmu bade.
Murde nide txpwz me rlakitrku.
Bzkq Brti Drtwrmu Doa O Da Kzbleng
9 A' bzkq brti drtwrmu leplz, murde nigu amrlx apu-txpwzku zsikapu,
Kxmule-esz' nigu kxnzetung o leplz txneng.
Murde nzmu na-arsakrlrku nzmrlekr Gct x nigu,
Nide kx mrle txpwz, a' nginigu da-nrbalq.
10 X mz nzrtwz-krmu da kx suti drtwrmu, bzkq brti drtwrmu nzamwxlr-krmu leplz x nzpna-krmu dztudrng.
X kxmule-esz' nimu bcnyrng, bzkq abrtrpzmu drtwrmu mz trau scmu.
11 A' na-amqtrku drtwrgu mz nzxlr-krgu natq lcng.
Murde Gct txpwz kc tqmatq.
12 X da kx myapxbz, nzaodu-krde nigu tresakiu.
Rpimle kx, “Mzli lcde, nzayzlu-krbo da mz doa navz-nqblqle da kx aleleng mz nrlc ka.”