Mi pakapaka rorou rakot
Sibu Iburu
1
E Iesu Karisito eie e Natuon e Raban
1 Muomuo, e Raban a nga vakokoit sibu tubugiet i ngutsuon bu propet sibu keipkepide ra palan ma sibu suasuada rosar palan. 2 Eiekesen ine sibu ra vekvekitip e Raban a te vakokoit nemei segiet i ngutsuon e Natuon. E Raban a nga totoka va ta suvuon ken sar sinsuv kokouk, ma ngan ine mi Nout mo e Raban a nga vogosongie ine mi mangmagoso enaenamon. 3 Ine mi Nout arie mi rararangien man matvinavaso e Raban, ma mi sinavien ine mi Nout a vutuir vasangan duis mi sinavien e Raban. Ma surie ken nama ian ta suvu ngeisngeis, bu kepineits kokouk gi tuir ngeisngeis. I murien tate nga tsang vaton mi tsientsang nia vara melemelen nge giet sorvekenan mi sinavei tsokor, a nga mogos si ken riem suv e Raban ese ta tsiroup. 4 Io, e Natuon e Raban a nga tsorubeit tsiroup sibu angelo, malan mo mi as e Raban ta nga terie sien, a kalei beitsak rio bu asagie bu angelo.
5 Simi vunan e Raban a kap nga pengan si ka angelo malan ine,
“Evoi e Natung,
nevere o te tsorubeit va eou e Tama.” PSA 2:7
Ma e Raban a kap nga pevien buer,
“O ta tsorubeit va eou e Taman,
ma eie ta tsorubeit va eie e Natung.” 2SA 7:14; 1CH 17:13
6 Ma sien e Raban ta turan e Natuon mi muariem nemei simi kaber, a pevien,
“Ken sar angelo kokouk e Raban gi ta ngas rengeir rakot sien.” DEU 32:43
7 Ma surie bu angelo, e Raban a pevien,
“E Raban a nga tsana ken sar angelo malan mi mour,
ma a nga tsana ken sar petspets malan bu berber simi leing.” PSA 104:4
8 Eiekesen surie mi Nout, e Raban a pevien,
“Oo Raban, ke mogomogos ni vuor ta mon sibu ra bu ra rovoriu,
evoi mi kovakova ka leong ma mi ngisingisi nia vuor ta tsorubeit vasvas vemusurie mi sinavei duis mo.
9 E nga tovie mi sana ta duis ma e nga karto mi sana ta tsokor.
Io, ma Raban a te nga vokunie no ngan mi oel nia vasangan mi nires,
va evoi e tsiroup rio bu palapala.” PSA 45:6,7
10 Ma a pevien buer,
“Mi Nguts, simi tsuoktsuok vakaek e nga vogosongie mi tsukatsukan mi mangmagoso enaenamon,
ma mi rangit eie mi tsinatsangan ba rima.
11 Guor ta tsereiv, eiekesen evoi e ta mon.
Eguor kokouk guor ta muduis mala lavlav kebeir.
12 E ta so lokuma guor mala kuirkuir kebeir.
Keguor baidendeng ta meur mala lavlav kebeir.
Eiekesen evoi e kap ko vevekieis.
Ma ke sar avareit ta kap ba buer voto.” PSA 102:25-27
13 Ma e Raban a kap ko pevien si ka angelo malan ine,
“Mogos ine si kong riem suv
oit va o ta tsana ma sar matakorot
va man poppop ba kame.” PSA 110:1
14 Bu angelo egie bu moromoruo ni tsatsang kuilkuil. Egie bu moromoruo kuvu se Raban nia tsatsang segie ese gi ta so suvuon mi vavato.