1 “जेयुँर ताक़्याक लिद आव पाँर ङ़ादा ज़ ङासथैचिज़्‍या। 2 जेलाई इताव ब हुरिज़्‍या — यहूदीराए धर्मसास्‍त्र झ़िमनी पले·चिरिज़्‍यार।* 16:2 यूह ९:२२ चिऊन्‍या। फरी जेलाई सैःन्‍या सजा याज़्‍यावर ‘परमेस्‍वरए ओय़ेन ज़ गेदोज़्‍या’ है लिन्‍या लेर। 3 निताव य़ेन नोराए ङाबाबुलाई ब यामासरेसोए, ङालाई ब यामासरेसनावए दान्‍या लेर। 4 आव पाँ भरी जेलाई ङ़ादा ज़ है ङादाचिज़्‍या। हो ताकिन ची जेलाई नितावर याहुक आव ङापाँर य़ाका दान्‍या जेले। नो पाँर आःपै जेस ज़ ङाल्‍योए है ङामादाचिताव।”

5 “अब ते ङालाई परींज़्यावए ल्‍योदा ङाबारिके, खाली ‘नँ काना नबाज़्याव?’ है जेमादाँए। 6 आव है ङादाचिज़्याव पाँए जेयुँर माचाव जैद नैद्याचिउ। 7 खाली ङा साचो ज़ है ङादाचिज़्‍या, ङा आनी बान्‍या जेलाई पाथ लिज़्‍या। ङा आनी ङामाबाकिन जेलाई सघैन्‍या छैंव पुरूस हुन्‍या माले। ङा ङाबावत वाज़ नोलाई परींद ङायाचिरिज़्‍या। 8 नो उहुवत आव मानुवाताव मिँरालाई यापाप सतैंद्याद, परमेस्‍वरए ओन्‍याय स़ोनो ओसजा आव ज़ लिद थ·रैद याएरिज़्‍याव। 9 नो सतैंद ओराएरिज़्‍याव यापाप ङालाई यायुँ ओमाहुबोनी ज़ ताके। 10 नो सतैंद ओराएरिज़्‍याव परमेस्‍वरए ओन्‍याय फरी ङा जेङ़ाकिन ङाबाबु परमेस्‍वरए ओल्‍योक ङाबावत रैंःरिज़्‍या। 11 नो सतैंद ओराएरिज़्‍याव परमेस्‍वरए ओसजा फरी ङा आव मानुवातावराए यास़ेर सैतानलाई ओपाहा झाःद्याद उमिन सम़ैद ङायोत रैंःरिज़्‍या।

12 “अझ ङा जेलाई है दान्‍या पाँर कुधु ज़ ओल्‍यो, खाली आवकिन कुधु ज़ है ङादाचिकिन जेयुँल नैधुन्‍या जेमाले। 13 नो छैंव पुरूस उहुवत वाज़ नोए ज़ साचो पाँर थ·रैव परींद पैचिरिज़्‍याव। नोए ओल उयुँ स्‍यानी सिर्जैसिउ पाँर पाँन्‍या माले, ओथैव वाज़ पाँन्‍या ले। नोए ज़ हुन्‍या पाँर ब सतैंद्यान्‍या ले। 14 नोए ङा ङाल्‍योनिकाव पाँर ओपो·स ज़ छर्लङ्ग सतैंद्याद ङामिन ब सघ्योःद्याँरिज़्‍याव। 15 ङाबाबु परमेस्‍वरस लिज़्‍याव भरी ङा ङामीं ज़। है जैद ज़ है ङादाचिउ, ‘नो पुरूसए जेलाई सतैंद ओयाचिरिज़्‍याव भरी ङा ङाल्‍योनी ज़ ङा ङाजूँनी ज़ तारिज़्‍या।’ ”

16 “आकिनी जाँवाक जे ङालाई रँःन्‍या जेमाले। नकिन फरी जाँवाक वाज़ रँःन्‍या जेले,” है ओरादोक ते, 17 उसिसर या याल, “आव काता ओपाँज़्‍याव इताव — ‘छ्यावाकिन जे ङालाई रँःन्‍या जेमाले, फरी छ्यावाक वाज़ रँःन्‍या जेले’ है लिज़्‍या? स़ोनो, ‘ङा ङाबाबुए ल्‍योदा ङाबारिज़्‍या,’ है मनी लिज़्‍या,” है लिकेर। 18 नोराए, “आव ‘छ्यावाक’ है ओल्‍यो काता ओताव? आव पाँ जाँ गेमाबुझिधुके,” है यालिज़्‍याव। 19 हाःत ज़ येसुए ‘नो पाँर ङालाई है दाव यापैंज़्‍याव ताखेहो’ लिद नोरालाई है यादोक्‍यो, “नो ‘छ्यावाक रँःन्‍या जेमाले, छ्यावाक फरी जेरँःनारिज़्‍या’ है ङादाचिउ पाँत काताए जूँनी उल्‍तानी पाल्‍ता जेताज़्‍याव? 20 नोए जूँनी साचो ज़ है ङादाचिज़्‍या, आव पाँत जे ते जेसोगोए चिर्लनी बिर्ल घर्न्‍या जेले, मानुवाताव मिँर ते बनै रेंन्‍या लेर। खाली नो जेसोगो रेंतल त़ोसिरिज़्‍या। 21 किताव तोबो ज़ा दैन्‍या मेंमाए ज़ा दैन्‍या बेलाक घर्लिद दुख दैज़्‍याव, फरी भाउज़ा उजर्मिउत नो मेंमा उदुखर मेंःद उयुँर होलाँ ताद रेंज़्‍या, 22 हिताव ज़ जे मनी छ्यावा पै वाज़ सोगो दान्‍या जेले। फरी जेस ङादैसिउत जेयुँर होलाँ ताद रेंन्‍या जेले। नो जेरेंत सुए ज़ जेनी नैद लाँधुन्‍या मालेर। 23 नो बेला उहुवत जे ङालाई सुधिउ परिन्‍या माले। ङा जेलाई साचो है ङादाचिज़्‍या, ङामिननी जो जेऩिदी ब ङाबाबुए नो याचिरिज़्‍याव। 24 आःपै ते जे ङामिननी काता ज़ जेमाऩिताए। अबकिन ते ऩिचिकेदा दैन्‍या जेले। हो ताकिन ची जेरेंत ब सयो·द्यान्‍या ले।”

25 “आःपै ते आव ङापाँर जेस बिन्‍ज़ा बिन मितावनी ज़ ङापाँके। तछा छींनी नो ङाबाबुए उजूँनी ङापाँव पाँर ओपो·स ज़ छर्लङ्ग तारिज़्‍यार। 26 हो छ्याम जे ज़ ङामिननी ऩिन्‍या जेले, ङा जेजूँनी ङाबाबुस ऩिद्याव मापरिए। 27 ङा ङाबाबुए ल्‍योनी ङाहुव लिद जेयुँ हुप्द ङालाई मया जेदाँवए ङाबाबुए मनी जेलाई मया दान्‍या ले। 28 ङा ङाबाबुए ल्‍योनी ज़ आव मानुवात ङाहुके, फरी आव मानुवालाई ऱास्‍द ङाबाबुए ल्‍योदा ज़ ङाबारिज़्‍या,” है यादोक्‍यो।

29 हाःत ज़ उसिसराए, “अब ते नपाँ बिन्‍ज़ा बिननी माजैद चावस ज़ पलास्‍द नयासिके। 30 अब ते गेसैंके, नँ प़ाइँ ज़ नसैंज़्‍या, आकिन गे नँलाई सुधिउ ब मापरिके। नँ परमेस्‍वरनी हुव ज़ लिद गेयुँ मनी हुप्‍के,” है यादोक ते, 31 येसुए, “ङालाई बल्‍ल जेयुँ जेसुहुबो रो? 32 आव मनी थैच्‍यो, तछा इताव बेला हुरिज़्‍या, नो बेला उहुधुव मिताव ब लिज़्‍या, जे जेछ्याचेए चितराँ पुतराँ ताद सु सु जेझ़िमदा बाद ङालाई ङाबातङ ज़ जेजैनारिज़्‍या। हैदी ब ङा ङाबातङ ङामाले, परमेस्‍वर ङाबाबु ङास ज़ लिज़्‍या। 33 आव पाँ भरी जे ङास लिद जेयुँ होलाँ ओताक लिद ङ़ादा ज़ है दाद ङानैचिए। जे आव मानुवात दुखर वाज़ दैन्‍या जेले। हितावत ब जेयुँर तासतेच्‍यो, ङा आव मानुवालाई हारैद ङानै,” है यादोक्‍यो।