1 भाःङ पाँ उलिज़्‍याव ज़। नो पाँ परमेस्‍वरस उलिज़्‍याव। नो पाँ ओल परमेस्‍वर ज़। 2 नो ङ़ादाकिन ज़ परमेस्‍वरस उलिज़्‍याव। 3 ताव भरी ब नो पाँनी ज़ ताहुकेर। नो पाँनी माताहुव काता ज़ माले। 4 नो पाँनी ज़ पोहोन ब ताके। नो पोहोन ज़ मिँरालाई पलाँ जैद्यान्‍या ज़गै ब ताके। 5 नो ज़गैए चुम चुमोल पलाँ जैज़्‍याव। नो ज़गैलाई चुम चुमोए माहातैधुव।

6 तछा परमेस्‍वरए उपरींव यूहन्‍ना यादोज़्‍याव मिँ तोबो हुके। 7 नो मिँ परमेस्‍वरनी हुव ज़गैवलाई प़ाइँए सरेस्‍द यायुँ घुहुप्‍क लिद साचीए जूँनी हुके। 8 ओल ते नो ज़गै माःक, ज़गैवलाई मिँरालाई सरेसो परींन्‍याए जूँनी उहुव ची।

9 नो ज़गै साचो ज़गै ज़ ओल्‍यो। नो आव मानुवात हुद प़ाइँ मिँरालाई पलाँ जैद याएज़्‍याव। 10 नो मानुवात हुवए ज़ आव नाम नम जैक्‍यो। हितावत ब आव मानुवाताव मिँराए ओललाई मासरेस्‍धुकेर। 11 ओल नो उमींराए याल्‍योक ज़ हुके। खाली नोराए झन मासुम्‍केर। 12 हैदी मनी जो जोराए ओपाँर भैंःद यायुँ हुप्‍ज़्‍या, हो होरालाई परमेस्‍वरए ओज़ार तान्‍या हक याएज़्याव। 13 नोर परमेस्‍वरए ओज़ार याताव संसारलाव बाबु आमानी ब माःक, क्‍याँए ओपैंज़्यावनी ब माःक, मिँए गोहाईनी ब माःक, परमेस्‍वरनी वाज़ ताज़्‍यार।

14 नो पाँ ज़ मिँ मिन्‍सिद गेल्‍योक हुके। ओबाबुनी हुव तोबोका तोबो ओज़ाए ओज़गै गेरँःके। नत ज़ परमेस्‍वरए ओसत स़ोनो गेल्‍योदा उयुँ ओय़ालो ब रैंःके। 15 नोए उजूँनी यूहन्‍नाए चोइस क़िद, “आवए उजूँनी ज़ जेलाई ङ़ादाकिन है ङादाचिज़्‍याव, ‘ङाछींनी हुव ङाकिन घ्योःव लिज़्‍या, काराव ल्‍यो ताकिन नो ङाकिन ङ़ादाकिन ज़ उलिज़्‍याव,’ ” है लिद गोहाई याएक्‍यो। 16 होए ओक्‍याँनी ज़ गे परमेस्‍वरए उयुँलाव भरी दैद असिकए तर्त असिक गेदैके। 17 ङ़ादा मोसाए ल्‍योनी परमेस्‍वरए ओकानुन गेदैके, आज्‍याल फरी परमेस्‍वरए उयुँ ओय़ालो स़ोनो साचो ओपाँ येसु ख्रीसनी गेदैके। 18 परमेस्‍वरलाई खर्क ज़ सुए ज़ मारँःर, ओबाबुए उयुँ स्‍याताव तोबोका तोबो ओज़ाए ओक्‍याँत ज़ सतैंसिउ लिज़्‍या।

19 यरूसलेम सहरनिकाव यहूदीराए यासकाव पुजारीर स़ोनो लेबीरालाई यूहन्‍नालाई, “नँ सु?” है दानाव यारापरींक ते, 20 यूहन्‍नाए माम़ोंसिद, “परमेस्‍वरए उपरींज़्‍याव ख्रीस ङा माःक,” है ओरादोक ते, 21 “हुकी नँ सुकी, सैं एलिया रो?” है यादोक ते, “अहँ, ङा हो माःक,” है यादोक्‍यो। “हुकी नँ नो परमेस्‍वरए ‘अगमबक्ता तोबो ङापरींरिज़्या’ है उलिज़्याव मिँ रो?” है यादोक ते, फरी ब, “ङा हो ब माःक,” है यादोक्‍यो। 1:21 ब्य १८:१५,१८; मला ४:५ 22 “हुकी नँ ज़ गेलाई है दाव ताके, नँ सु? गेलाई परींज़्‍यावरालाई नजूँनी गे है दाव ज़ परिके,” है यादोक ते, 23 यूहन्‍नाए, “ङा यसैया अगमबक्ताए सर्द ओनैज़्याव मिँ ज़। नोए ङाजूँनी ओसरो आव ज़ —

24 नो पजैना हुवर फरिसीराए यारापरींवर याल्‍यो। 25 नोराए फरी ब यूहन्‍नालाई, “नँ ख्रीस ब माःक, एलिया ब माःक, नो अगमबक्ता ब माःक ताकिन, नँ काराव मिँरालाई ऱील नरासछैंज़्‍याव?” है यादोक ते, 26 यूहन्‍नाए, “ङा ते ऱील ङारासछैंज़्‍या, खाली जेखार्ल ज़ तोबो लिज़्‍या, होलाई जे जेमासरेसे। 27 नो ज़ ङाछींनी हुरिज़्‍या है ङालिज़्‍याव मिँ। ङा ते नोए ओपोलाए ओच़ें पला·न्‍या स्‍यासो ब ङामाले,” है यादोक्‍यो। 28 आव पाँ भरी यूहन्‍नाए ओरासछैंज़्‍याव यर्दन भै होफताव बेथानिया यादोज़्‍याव पोल ज़ ताके।

29 हो पराःती येसु ओल्‍योदा उहुज़्‍याव रँःद यूहन्‍नाए प़ाइँलाई है यादोक्‍यो, “चिऊचिके, नो ज़ आव मानुवातावराए यापाप हाइद ख्याद्याज़्‍याव परमेस्‍वरए ओपाथा। 30 नोए उजूँनी ज़ ङ़ादाकिन है ङादाचिज़्‍याव, ‘ङाछींनी तोबो हुरिज़्‍या। नो ङाकिन ङ़ादा ज़ उलिज़्‍यावए ङाकिन घ्‍योःव लिज़्‍या।’ 31 नोलाई ङा मनी ङामासरेस्‍ताव। हितावत मनी नोलाई इस्राएलीराए खार्नी पले·द सतैंद्यान्‍याए जूँनी ऱील ङारासछैंज़्‍या।”

32 यूहन्‍नाए नोरालाई अइ लिद गोहाई याएक्‍यो, “ङा परमेस्‍वरए उपुरूस कुइतम मिताव नमतिन भुर्हुद ओक्‍याँत उच़ुसिज़्याव ङारँःके। 33 नोलाई ङानी ते ङामासरेस्‍ताव, खाली ङालाई ऱीनी सछैंव परींज़्‍यावए है दाँक्‍यो, ‘जोए ओक्‍याँत परमेस्‍वरए उपुरूस हुद उच़ुसिउ नरँःज़्‍या, होए ज़ परमेस्‍वरए छैंव उपुरूसनी मिँरालाई यासछैंरिज़्‍याव।’ 34 है जैद आव ङामीए ङारँःवनी ज़ जेलाई आव ज़ परमेस्‍वरए ओज़ा लिद थ·रैद ङायाचिके।”

35 हो पराःती फरी यूहन्‍ना ऩेब्‍लो उसिसनिस हो पोक ज़ च्‍याँःसिद यालिज़्‍याक, 36 यूहन्‍नाए येसुलाई याङ़ालाव घ्याँ ओबाज़्‍याव रँःद उसिसनिलाई, “चिऊचिन्‍के, नो ज़ परमेस्‍वरए ओपाथा,” है उनिदोक ते, 37 नोनी नो पाँ थैद येसुए उछींत बाकिनी। 38 येसु उछींदा ओभाल्‍सिक नोनिलाई उछीं उछीं निहुज़्‍याव रँःद, “जिन काता जिन्‍खिम्‍ज़्‍याव?” है उनिदोक ते, नोनी, “गुर्बा, नँ काङ्क नलिज़्‍याव?” है निदोक ते, 39 येसुए, “हुद चिऊचिन्‍के,” है निदोक्‍यो। नोनी उछीं उछीं बाद उलिज़्‍याव पोक ज़ बाद हो छ्याम ओलस ज़ लिकिनी। नो याकेसो ऱिमदाङाव चार बजेवाक ओल्‍यो। 40 नो यूहन्‍नाए ओपाँ थैद येसुए उछींत बावनी तोबो सिमोन पत्रुसए ओभाइ अन्‍द्रियास ओल्‍यो। 41 नो ननी बाद ओदाज्‍यु सिमोनस दैसिद, “गिन मसीहलाई गिन्‍दैके,” है दोक्‍यो। (हिब्रू खामनी मसीहए ओअर्थ ‘ख्रीस’।) 42 नकिन ओदाज्‍युलाई ब येसुए ल्‍योक लाँक्‍यो। येसुए नोलाई लँ लँ चिऊद, “नँ यूहन्‍नाए ओज़ा सिमोन ज़, आकिनी नमिन केफास नैद ङाईंज़्‍या,” है दोक्‍यो। (ग्रीक खामनी केफासए ओअर्थ ‘पहर’।)

43 हुकिन हो पराःती येसु गालीलदा बान्‍या युँ दाद होदा ओबाज़्‍याक फिलिपलाई रँःद, “नँ ङास हुन्‍के,” है दोक्‍यो। 44 नो फिलिप, अन्‍द्रियास स़ोनो पत्रुसनी निलिज़्‍याव बेथसेदा नाखारलाव मिँ ओल्‍यो। 45 नो फिलिपए फरी नथानेलस दैसिद नोलाई, “गे मोसाए ओकानुनल स़ोनो अगमबक्ताराए धर्मसास्‍त्रलाव सर्द यानैज़्‍याव मिँस गेदैसिके — नो ते योसेफए ओज़ा नासरतलाव येसु ची ओल्‍यो,” है दोक्‍यो। 46 हाःत ज़ नथानेलए, “निताव नासरतनी सु ची चाव उहुरिज़्‍याव?” है ओदोक ते, फिलिपए, “नँ ज़ हुद चिऊके,” है ओदोक ते, 47 नथानेललाई ओल्‍योदा उहुज़्‍याव रँःद, येसुए नोए उजूँनी नक लिज़्‍यावरालाई, “चिऊचिके, नो साचो इस्राएली, ओखत माल्‍यो मिँ,” है ओरादोज़्‍याव 48 नथानेलए थैद येसुलाई, “ङालाई कै जैद नसरेस्‍नाव?” है ओदोक ते, येसुए, “फिलिपए नँलाई ओमाखुल्‍निद नेभारा सीं खँक नलिज़्‍याक ज़ ङारँःनिउ,” है दोक्‍यो। 49 हाःत ज़ नथानेलए, “गुर्बा, नँ साचो ज़ परमेस्‍वरए ओज़ा, इस्राएलीराए राजा ज़ नल्‍यो,” लिद है ओदोक ते, 50 येसुए, “काता नेभारा सीं खँक ङारँःनिउ है ङादींवए, ङालाई नयुँ उहुबो रो? साचो ज़ छींनी आवकिन घ्योःव घ्योःव ङाय़ेनर ब रँःन्‍या नले,” है दाद, 51 फरी प़ाइँलाई है यादोक्‍यो, “ङा जेलाई साचो है ङादाचिज़्‍या, जे तछा नम फैसिउ स़ोनो ननी परमेस्‍वरए ओचाकर्‍यार ङा मिँ मिन्‍सिउए ङाल्‍योक हुव य़ेन बाव य़ेन यादोज़्‍याव रँःन्‍या जेले।” 1:51 उत २८:१२