A Ningnigo na Pas
ane Pol tetek
e Timoti
A warwara talapor nigo
A pas ne a ningnigo na pas ane Pol, tetek e Timoti. E Timoti mito na papar Esia. E tana a hane Juda pa e tamana a te Grik. Ning e Pol i han ana nuna areur a tinan, i aslang pas e Timoti sur diar armuri pa diar titol taum (oroi Ap 16:1-3). Lamur e Pol i aslang pas e Timoti sur ir tena tai alar ana lotu to e Epeses.
Ana pas ne, e Pol i atai e Timoti mang ir tai alar a lotu kusun a asasongo na tena asaerla, sakana lar alaulau a tortorot anuna taraila. I atai i otleng ana wakak a asasaer, pa i atai i ona si na ngas a taraila dir aslang pas la sur lar tena titol ana lotu, pa ana wakak a toltol ning ir muri.
A tinan ana Ningnigo na Buk Timoti:
A kamkama buk ne (1:1-2)
E Timoti ir sairas a asasongo na asasaerla (1:3-20)
A ngas ana lotu (2:1-15)
A ningnigola ana lotu (3:1-16)
E Timoti ir tai alari, sur ir hanot a wakak a tena titol (4:1-16)
A asasaer tetek e Timoti ana nuna titol (5:1-6:21)
1
1 Iau e Pol, esaning e God pa e Karisito Iesu dia sune iau sur ar aposel ane Karisito Iesu. E God anundala Tena Alaun pa e Karisito Iesu, esaning dala harnanai suri ana tortorot. 2 A tumus a pas ne tetek u e Timoti, a natuklik momol ana tortorot. A marmaris pa a wakak a toltol taum ana bal molmol, ta e God a Tamandala pa e Karisito Iesu anundala Leklek, ir kes taum hom.
E Timoti ir sairas a asasongo na asasaerla
3 Onone a arakrakai u kale sur ur kes ot ting e Epeses, larning a atong tari tam ning a han utumo e Makedonia. Ur kes sur ur sairas la ning la asaer a taraila anal asasongo na asasaerla. 4 Pa gong la molot ana asasaer oros ka, pa ana ususrai ana mangis a tarai, ning bel ta araropna. I tol otnan ka a arlak, pa bel i harnangai ana titol ane God. A titol ane God i gomo ka ana tortorot. 5 A atongi manglarning, sur a marmaris ir itna artalai na arpotor in dala. A marmaris ning i han miting na totoh na balandala, pa a nuknukindala ning bel ta rongo namata e God, pa tortorot momol. 6 Dingla na tarai la ka han masik kusun a wakak a toltol ne, pa la mur a warwara oros kama. 7 La mang sur lar asaer a taraila ana Warkuraila ane God, ika bel la tasman asaning la warwara onoi, pa a kamkama warwara ning la nuki mang la tastasman onoi.
8 Dala tasmani mang a Warkuraila la wakak, ning tik ir titol wakak onoi. 9 Dala tasmani mang a Warkuraila bel di sarani sur a tena tostos. Di sarani ka sur a ngas a taraila mange: la ning la kutus warkurai, a tabun longorla, la ning bel la lotu tetek e God, a tena tol laulaula, la ning bel la mur a nuknuk e God, la ning la mur a toltol mite na rakrakan hanua, la ning la umkol a taraila, pa la ning la umkol na tamtamanla pa na kabatnanla, 10 la ning la tol a pamuk a toltol, a taraila ning la taulai ulak ka a taraila, la ning la tong akes pas a taraila sur lar siuran la, a tena asasongola, la ning la lele asasongo, pa la rop ning la tol a ututnala ning bel i arlar ana tostos na asasaer ane God. 11 A tostos na asasaer i kes ana Wakak a Warwara, ning e God i saran tari tak sur ar atatai onoi. A Wakak a Warwara ne ane God, a God na matatar ning i angis tikin.
A warwara gasgas ana marmaris ane God
12 A atong wakak tetek e Karisito Iesu anundala Leklek, esaning i tortorot hok pa i saran tar a rakrakai tak, pa i aslang pas iau sur ar titol teteki. 13 Nating a sira atong laulau e Iesu, a alaulau a taraila ning la tortorot pa a akadik la. Ika e God i maris iau, anasa bel a tasman a utna ning a toli, pa belot a tortorot. 14 Anundala Leklek i pek anuna tnan marmaris hok, pa i tabar iau ana tortorot pa a ginina ning ar mang sur a tarai. A artabar ne i kamkamna o e Karisito Iesu.
15 Karisito Iesu i han purum ute na rakrakan hanua sur ir alaun a tena laulaula. A warwara ne i momol kol, pa dalar tortorot onoi. Pa iau, a laulau kol tana tena laulaula rop. 16 Ika e God i maris iau, sur e Karisito Iesu ir asangan anuna wowon a toltol tetek iau, ning i alaun pas iau pa i kepsen anuka toltol laulaula. Pa i tol a toltol ne hok, sur a taraila otleng lar oroi pa lar tortorot ono, pa lar kibas a lalaun tikin. 17 Dalar saran a hanrawai pa dalar atong aleklek pas a King ning i laun tikin, esaning bel dala oroi, ning i ka i God. A aleklek ne bel ir rarop pa bel ir rarop. Amen.
18 E Timoti a natuklik, a asasaerla ne a sarani tam, i arlar ana warwara na propet ning di ka atong tari hom ning la nunung hom. Ning ur mur a asasaerla ne, u ning a wakak a tena harum ana Wakak a Warwara. 19 Ur tur rakrakai ana numa tortorot, pa ur mur a nuknukim ning bel ta rongo na mata e God. Dingla na tarai bel la toli larne, pa anunla tortorot i hirua arlar ana sip ning a top i dapis regen seni pa i murung. 20 E Himeneus pa e Aleksander naur a halinla, ning ia ka saran tar diau na kuna e Satan, sur diar tastasman mang gong ulak ma dia atong laulau e God.