ABADIA
Yã́ pↄ́ kú láɛ bee guuↄ
Lá nɛ́naɛ beeá yã́ pↄ́ Lua ò Ɛdↄ̃uↄ (Esau buiↄ) yã́ musu làasoo pↄ́ aa kɛ̀ Isailiↄ (Esau dãuna Yakubu buiↄ) yã́ musu yã́i. Ɛdↄ̃uↄ zↄ̃lɛa ísida wiside saɛ gɛↄmidↄkĩi oi, ↄ̃ aaìↄ íbɛlɛsɛ ń Isailiↄ gↄↄpii. Gↄↄ pↄ́ wà zĩblè Yuda bùsuwa mɛ́ wà Yelusalɛũ sì, an íbɛlɛ gɛ̀ e a lɛ́waɛ. I kɛ kɛ́ aai mↄ dↄi ń gbɛ̃́ↄlɛo ado no, aa ń bùsu saalo sɛ̀ ń pↄ́ ũɛ, ↄ̃ aa gɛ̀ Yelusalɛũdeↄ pↄ́ↄ sɛ̀lɛ.
Wà lápi kɛ̃̀ Babilonideↄ Yelusalɛũ sia gbɛa e wàↄ gɛ́ Yesu Kilisi ii wɛ̃̀ 587. A guu ãnabi Abadia ò Ɛdↄũↄnɛ aa kaalɛ ń Isailiↄ ibɛɛ kĩniↄ sãnuɛ. Beewa à Isailiↄ nↄ̀sɛ nìninɛ́. Lua mɛ́ a yã́ gbɛzã o, a mↄ́ yã́kpalɛkɛi ń bui píio!
1
Yãdaa Ɛdↄũↄla
1 Yã́ pↄ́ Abadia èn kɛ:
Yã́ pↄ́ Dii Lua ò Ɛdↄũↄ* Isa 34.5-17, 63.1-6, Zel 49.7-22, Eze 25.12-14, 35.1-15, Amↄ 1.11-12, Mal 1.2-5 musuɛ.
Wa baomà à bↄ̀ Dii kĩ́i,
à gbɛ̃́ zĩ̀ buiↄwa aà onɛ́:
À fɛlɛ! Wà gɛ́ Ɛdↄũↄwa zĩu.
2 Ɛdↄũↄ, à ma!
Má tó à gↄ̃ kpɛɛ buiↄ guuɛ,
wa sakaágu à kɛ zài.
3 Á kàamai mɛ́ á sãsã.
Á gbɛ̃́ pↄ́ a gbɛ kɛ̀ á kpɛ́ ũ
á zↄ̃lɛu musumusuↄ,
i o á sↄ̃ guu à mɛ,
i gbɛ̃e e à fↄ̃ á bua à á nɛ́ zĩ́lɛo.
4 Baa kɛ́ á da musumusu lán baɛwa,
mɛ́ a á sakpɛ dà saanaↄ sↄ̀ↄu,
má á bãɛ za weɛ.
Ma Dii mámɛ má ò.
5 Tó kpã́iↄ mɛ́ gɛ̃̀ázi gwã́,
ge tó kpã́iwɛliwɛↄ sìázi yãa,
pↄ́ pↄ́ an pↄ dↄwà ↄ̃ aa sɛ adoo lò?
Tó vɛ̃ɛkↄzↄ̃zↄ̃naↄ mↄ̀ sì á búu sↄ̃,
vɛ̃ɛ kↄ̃na ↄ̃ aa tóɛ́o lò?
Kási á kaalɛɛ.
6 Esau buiↄ, wa á pↄ́ↄ naaaɛ míↄ,
wa á àizɛɛ pↄ́ ulɛaↄ sɛ́lɛ.
7 Bui pↄ́ an lɛ́ doũánↄↄ á yá á bùsuu,
gbɛ̃́ pↄ́ naánↄↄ á sã́sã, aai zĩblewá,
gbɛ̃́ pↄ́ i ↄkãaaↄ filifilimbakpaɛ́,
áↄ a yã́ dↄ̃o.
8 Ma Dii ma mɛ̀,
má Ɛdↄũ bui ↄ̃nↄnaↄ dɛdɛ gↄↄ bee,
yãdↄ̃nae a gↄ̃ Esau gbɛ̀sĩsĩ musuo.
9 Gili a gɛ̃ Temani nɛgↄ̃naↄgu,
aa midɛ ḿpii Esau gbɛ̀sĩsĩdeↄ dɛdɛau.
10 Á gↄ̃ ń wío,
wi á midɛ, áↄ ku lↄo,
yãpãsĩ pↄ́ á kɛ̀
á dãuna Yakↄbu buiↄnɛ yã́i.
11 Kɛ́ buipãleↄ lɛ́ ń àizɛɛ sɛ́lɛ,
kɛ́ bui zĩ̀lopiↄ gɛ̃̀ Yelusalɛũ,
aalɛ líkpa a yã́ musu,
á kú we lá á doũńnↄwaɛ.
12 A maa yãa á dãuna buiↄ gwaa kɛɛ́ na an wɛtãgↄↄo.
I kṹ á pↄ kɛ na Yudaↄ kaalɛgↄↄo,
i kũ à yamↄsɛkpa an taasikɛapi guuo.
13 A maa yãa à si ma gbɛ̃́ↄ wɛ̃́lɛu an yã'eapi guuo.
I kũ an gwaa kɛɛ́ na an yã'eapi guuo,
i kũ à ń àizɛɛ naaa an yã'eapi guuo,
14 A maa yãa àↄ zɛa zɛnankpaau an gbɛ̃́ pↄ́ lɛ́ bàalɛ dɛa yã́io.
I kũ à ń gbɛ̃́ pↄ́ bↄ̀ↄ kṹkũ à kpámá an wɛ́tɛ̃agↄↄpio.
15 Ma fɛlɛa ń bui píio gↄↄ kà kãi,
mí kɛɛ́ lá á kɛ̀nɛ́wa.
Á yãkɛaↄ wi á musu.
16 Lá a imì ma sĩ̀sĩ pↄ́ a kua adoa musu,
màa bui píi a imi we zɛsai.
Aa ma pↄkũmabↄbↄma ípi gbɛ̃,
aai gↄ̃ lán wi ń i yãaowa.
17 Má gbɛ̃́ↄ suaba Siↄna gbɛ musu.
Aↄ dɛ ma pↄ́ ũ,
Yakↄbu buiↄ i ɛa ń pↄ́ sí.
18 Yakↄbu buiↄ aaↄ dɛ lán tɛ́wa,
Yosɛfu buiↄ aaↄ dɛ lán tɛ́vuawa,
Esau buiↄ iↄ dɛ lán sɛ̃̀ giiwa.
Aa kũ Esau buipiↄwaɛ míↄmiↄ,
an gbɛ̃e a bↄo.
Ma Dii mámɛ má ò.
19 Ma gbɛ̃́ pↄ́ kú Nɛgɛvɛↄ i gↄ̃ Esau gbɛ̀sĩsĩↄ vĩ,
an gusalaladeↄ i Filitɛ̃ↄ bùsu sí
ń Ɛflaiũ bùsuo ń Samali bùsuo.
Bɛ̃yãmɛɛ buiↄ sↄ̃ aai gↄ̃ Galada bùsu vĩ.
20 Isaili zĩ̀zↄↄ i gↄ̃ Kanaa bùsu vĩ e za Salɛpa,
Yelusalɛũ zĩ̀zↄ pↄ́ kú Sefalaↄ i gↄ̃ Nɛgɛvɛ wɛ̃́lɛↄ vĩ.
21 Suabanaↄ dɛdɛ Siↄna gbɛ̀sĩsĩwa,
aai yã́kpalɛkɛ ń Esau gbɛ̀sĩsĩdeↄ,
kpala i gↄ̃ Diiɛ.