Fofagini Disu
(Da:i Sia:-Lamentations; Modu – Lalohisihisi; Bisini – Krai)
Hidadea Sia:
Fofagini Disu Meloa da gesami biyale gala gilisili dedei. Yelusaleme moilai bai bagade da ode 586 Y.H.M. amoga gugunufinisi dagoi ba:i. Ninia da amo buga da Yelemaia ea dedeiyale dawa:sa. E da Yelusaleme da wadela:lesi dagoi dawa:beba:le, fofagini dinanawane dedei. Amo meloa ganodini, da:i dioi bagade hou da ba:sa. Be gilisili dedei da dafawane hamoma:beyale hahawane hou amola Godema dafawaneyale dawa:su hou. Wali amola, Yu dunu da ode huluanega ha:i mae nawene, didiga:su hamonana. Amola ilia Yelusaleme 586 Y.H.M. ode amoga wadela:lesi dagoi bu dawa:sea, ilia da Fofagini Disu Meloa ilia sia:ne gadosu gilisisu ganodini idisa.
Sia: Dedei
1 Yelusaleme ea Da:i Dioi Bidi Hamosu...Sia:alalo 1:1-22
2 Yelusaleme da Se Dabe Lai...Sia:alalo 2:1-22
3 Se Dabe Iasu amola Hahawane Dafawane
Hamoma:beyale Dawa:lusu...Sia:alalo 3:1-66
4 Yelusaleme da Mugului Dagoi Ba:i...Sia:alalo 4:1-22
5 Gode da ilima Asigima:ne, Ilia da
Sia:ne Gadosu...Sia:alalo 5:1-22
1
Fofagini Disu
Yelusaleme ea Da:i Dioi Bidi Hamosu
1 Yelusaleme da dunu amoga nabaidafa galu. Be wali e da fofagini agoane diala.
Musa: fifi asi gala huluane da ema nodoi. Be wali e da uda didalo agoai gala.
Yelusaleme ea noga:idafa hou da musa: osobo bagade moilai bai bagade huluane baligi dagoi.
Be wali ea dunu huluane da udigili hawa: hamonana.
2 Daeya ganini asili hahabe huluane e da dinana. Si hano da ea siguluba:le daha.
E da musa: sama bagohame galu.
Be waha afae da e dogo denesimu hame ba:sa.
Emagai dunu da ema hohonone, wali ema ha lai gala.
3 Yuda fi dunu da hamedei mugululi udigili hawa: hamosu dunu ba:sa.
Ilia ha lai dunu da gasa fili, ili fifi lasu amogai mae esaloma:ne, sefasi dagoi.
Ilia da ga soge ganodini esala. Ilia fifi lasudafa da hame gala.
Ilia ha lai dunu da ili sisiga:iba:le, hobeamu logo hame ba:sa.
4 Wali da dunu afae da hadigi esoga Debolo Diasuga
sia:ne gadomusa: hamedafa maha.
Uda a:fini amo da musa: amogawi gesami hea:i, wali da se naba.
Amola gobele salasu dunu da gogonomobe fawane.
Moilai bai bagade logo holei huluane da mebu dagoi ba:sa
amola Saione moilai bai bagade da se nabawane diala.
5 Yelusaleme fi ilia ha lai dunu da ili hasali dagoi.
Amo ha lai dunu da ilia gasaga Yelusaleme gagulaligisa.
Yelusaleme da wadela:i bagohame hamoi dagoi.
Amaiba:le, Hina Gode da ema se dabe i dagoi.
Yelusaleme fi ilia mano da ilia ha lai dunu amoga doagala:le,
sasamogele lale, asi dagoi ba:sa.
6 Yelusaleme ea isisima:goi ba:su da asi dagoi.
Ea ouligisu dunu da ‘dia’ gebo amo da ha:ga gasa hamedeiba:le,
benea ahoasu dunu iliba:le hobeamu gasa hame agoane ba:sa
7 Yelusaleme da fofagini mugului dagoi mebui agoane ba:sa.
Be e da ea musa: isisima:goi ba:su hou bu dawa:sa.
Ema ha lai dunu da ema doagala:loba, e da dafai dagoi.
Amola e fidimu dunu afae hame ba:su.
Ema hasanasisu dunu da ea dafabe amo ba:loba, eba:le oufesega:i.
8 Ema nodosu hou da fisiagai dagoi.
E da da:i nabado gala amola eno dunu da e higale ba:sa.
E da gogosia:iba:le, gogonomusa:, ea odagi wamolegesa.
Yelusaleme da hisu wadela:le bagadedafa hamobeba:le, ledo hamoi dagoi.
9 Dunu huluane da Yelusaleme moilai bai bagade ea ledo hou amo ba:i dagoi.
Be e da hobea misunu hou mae dawa:le esalu.
Amaiba:le e da gugunufinisili dafai ba:i.
Ea dogo denesimu da hamedei.
Ea ha lai dunu da e hasali dagoi,
Amola e da Hina Godema e fidima:ne, disa wele sia:sa.
10 Ha lai dunu da ea noga:idafa liligi huluane wamolai dagoi.
Hina Gode da amane sema legei, ‘Dienadaile (Yu fi hame) dunu
ilia da Debolo Diasu ganodini masunu da sema bagade.
Be Yelusaleme da ba:lalobawane, ema ha lai da Debolo Diasuga golili sa:i.
11 Yelusaleme fi dunu da ha:i manu hogosa, gogonomosa.
Ilia liligi noga:idafa amoga ilia na:iyadoma,
ha:i manu ili esaloma:ne manusa: bidi lasa.
Yelusaleme moilai bai bagade da disa, amane wele sia:sa,
“Hina Gode! Na ba:ma! Na da baligili da:i dione esala!
12 Dunu huluane da bobaligilalebe, ilima e da disa wele sia:sa, “Na ba:ma!
Na se nabasu defele, dunu afaega da hame ba:i.
Hina Gode da nama ougiba:le, amo se nabasu nama i dagoi.
13 Hina Gode da muagadodili, lalu iasili, amo lalu da na da:i ganodini nenanu.
E da na sa:ima:ne, sanisi.
Amaiba:le, na da osoba gala:la sa:i.
Amalalu, E da na yolesili, na da mae fisili se nabasu nabala.
14 E da na wadela:i hou huluane ba:lalu, amo huluane gilisili,
fedege agoane ‘youge’ hamoi.
E da na wadela:i hou huluane ‘youge’ agoane na galogoaga gisa:ginisisi, amoga na da:i da dioi bagadeba:le, na da:i da gogaya:i ba:i.
Hina Gode da na ha lai dunuma na ianu, na da ilima bu gegemu hamedei ba:i.
15 Hina Gode da na baligili gasa bagade dadi gagui dunu iliba:le oui.
E da na ayeligi dunu wadela:lesima:ne, dadi gagui wa:i asunasi.
E da waini fage hano hamoma:ne ososa:gibi, amo defele na osa:gi.
16 Amaiba:le, na siga si hano da nabale aduga:le daha.
Dunu enoga da na denesimu hamedei.
Na ha lai dunu da na hasali dagoi.
Na fi dunu da liligi gagui hamedafa gala.
17 Na da enoga fidima:ne, lobo ilua:legasa. Be fidimu dunu hame ba:sa.
Hina Gode da nama doagala:ma:ne, la:idi la:idiga ha lai dunu misa:ne sia:i.
Ilia da na ledo hamoi liligi agoane ba:sa.
18 Be Hina Gode Ea hou da moloi fawane.
Bai na da Ea hamoma:ne sia:i nabawane hame hamosu.
Fifi asi gala dunu huluane! Na sia: nabima! Na se nabasu ba:ma!
Na ayeligi dunu amola a:fini huluane da mugululi asi dagoi.
19 Na da na fuligala:su fi dunuma na fidima:ne wele sia:i.
Be ilia da na fidumu higa:i.
Gobele salasu dunu amola ouligisu dunu
ilia da moilai bai bagade logoga esala ha:i manu hogolalu,
be hamedeiba:le udigili bogogia:i.
20 Hina Gode, ba:ma! Na da se bagadedafa nabala!
Fedege agoane, na dogo da faga:i dagoi.
Bai na da na wadela:i hou dawa:beba:le, da:i dioi bagade nabala.
Moilai bai bagade logoga, dunu oda da eno dunu medole legesa.
Amola diasu huluane amo ganodini, bogosu fawane ba:sa.
21 Na gogonomobe nabima! Na dogo denesimu da dunu hame.
Di da amo gugunufinisisu nama iabeba:le, na ha lai dunu ilia da nodosa.
Hahawane eso amo Di da nama ima:ne ilegele sia:i, amo iasima.
Na se nabasu defele, nama ha lai dunuma se bidi ima.
22 Ilia da wadela:i hou baligili hamobeba:le, ilima fofada:nanu,
ilima se bidi imunusa: ilegema.
Di da na wadela:i hou hamoiba:le, nama se bidi i,
amo defele ilima se bidi ima.
Na da bagadewane da:i dioiba:le, gogonomosa.
Na da na dogo ganodini olo bagade gala.”