JUAN-GAYABURBA-NUED
JUAN
GEBE-SOGLENAID
Garda-nug
Juan, we-garda narmaksad. Juanʼde, Jesús-sapingan-warambe-gakabogwad-wargwenad gued. We-Juanʼde, Zebedeo-machid, Jacobo-e-urbad. Juan, Jesús-sapingana-warbaagwad-wargwenad-bur-Jesús-walikaa gudigusad-duled.
Juan we-garda-baigan narmaksabalid: Burbar-Oyolesad-Garda (Apocalipsis), degine, 1 Juan, 2 Juan, 3 Juan. Binsamardo, we-gardamar birga 60ʼgi narmakles-insaye, igi, 90ʼgindibeye.
Juan-Gayaburba-Nued-Gardagi weyob sunmaklenaid
Juan e-ibyagwar ibmar-daksadba, degine, e-uayagwar ibmar-itosadba we-garda narmaksad, adi, dulemarga oyogegar, we-Jesúsʼde, Bab-Dummad-Machi-sunnadye. Juan anmarga sogsabardo, Jesús dulemar-isgued-bennukegala nakrusgi burgwisye. Degine, nakrusgi-burgwisad-sorba, ibapaagine gannar durgusbarye.
We-gardagine, weyob ilemakar sunmaklenaid:
1. Jesús Bab-Machi-gued, degi, dule-gubalid (1:1-18).
2. Jesús, dulemar-abargi arbaed-imaksad (1:19–12:50).
2a. Diigi-dule-oged-Juan (1:19-34).
2b. Jesús gebe-e-arbaed-imakded (1:35–3:36).
2c. Jesús-Dule-Wargwen-Barmiledagoye-soglesad magar-daklenonikid (4:1–6:71).
2d. Jesús gwallu-meegwad-gued, degi, burba-dulad gubalid (7:1–12:50).
3. Jesús-wilesad, e-burgwisad, degi, e-gannar durgusad (13:1–21:23).
3a. Jesús e-sapinganbo napi-masguchad, degi, igar-binid mesisad (13:1-36).
3b. Jesús e-sapinganbo napi-sunmaksad (14:1–16:31).
3c. Jesús, e-sapinganga Bab-Dummadse gochad (17:1-26).
3d. Jesús-galesad, ega-igar-itolesad, oburgwilesad, degi, diglesad (18:1–19:42).
3e. Jesús-durgusad (20:1-31).
3f. Jesús, Galileaʼgi e-sapingan-abingusad (21:1-23).
4. Napi-soglenaid (21:24-25).
Be itogua.
1. JESÚS BAB-MACHI-GUED, DEGI, DULE-GUBALID
1
(1:1-18)
Gayaburba anmaryobi sanale nonikid
1 Gebe-negasailaunni bato Gayaburba gudiid.
We-Gayaburba, Bab-Dummadba gudiid,
degi, we-Gayaburba, Bab-Dummad gued.
2 We-Gayaburba, gebe-negasailaunni bato Bab-Dummadba gudiid.
3 We-Gayaburbaba bela ibmar obinnilesad.
We-Gayaburba-imaksasuli, ibmar-obinnilesad gwen ambikussulid.
4 We-Gayaburbagi san-burba-dulad maid.
We-san-burba-dulad, dulemarga gwallu-meegwadga gued.
5 Gwallu-meegwad, negsichid-mee imaked,
degine, negsichid gege gwallu-meegwadgi obined.
6 Bab-Dummad, dule-wargwen barmiargusad. We-dule, Juanʼye nugad. 7 We-dule, gwallu-meegwad-barsogega nonikid, adi, bela dulemar a-gwallu-meegwad mer bengumalagar. 8 We-dule-Juanʼye-nugadi, gwallu-meegwadsulid. We-dule, unnila gwallu-meegwad-barsogegala nonikid. 9 We-gwallu-meegwad we-napnegse-danikidi, napiragwadid. We-gwallu-meegwad bela dulemarga neg-mee imaked.
10 We-gwallu-meegwad we-napneggi gudigusad. Ar we-napneg a-sogedba nagus-inigwele, degite, dulemar-we-napneggi-bukmalad akudaksamalad. 11 We-gwallu-meegwad e-dulemarse nonikinad, e-dulemar gwen abingassurmalad.
12 Ar bela dulemar we-Gayaburba-abingasmaladdi, e-nuggi-bengussurmaladba, amarga Bab-Dummad-e-mimmiganga-guega igar-uknonikid. 13 We-dulemala, Bab-Dummad-Burba-Isligwaledba gwalulenonimalad. Dulemar-sogedba gwalulessurmalad, dulemar-igarginsulid, dulemar-binsaedginsurbalid. Wemar Bab-Dummad-sogedba Bab-Burba-Isligwaledgi gwalulenonimalad.
14 We-Gayaburba, anmaryobi sanale san-nika gunonimogad, degine, anmar-abargi sanale gudigusmogad. Anmar e-gangued-yeerdakleged daksamalad. Unnila Bab-Machi-Wargwenna-Gued-e-gangued-yeerdakleged anmar daksamalad. We-dule, nue-dulemar-sabe nanadii gusad. Degine, igar-napiragwadgi nanadii gusbalid.
15 Diigi-dule-oged-Juan a-dulegi sunmaksagusad, sogdegusad, deun binnasur gotegusgu:
“An a-dulegi bemarga sunmaksa gusmalad: ‘Dule-wargwen an-sorba-danikoedi, a, an-iduedid, ar a-inse an-idu gudiguad.’ ”
16 Ar a-dule, bela-bela anmargi nued binsamaisoggu, belagwapa ibmar-nikadba ibmar-nuegan anmarga ukmaiguad. 17 Ar Bab-Dummad Moisésʼba dulemarga igar mesisad, dulemar igi nanaergebe. Ar Bab-Dummad na e-nue-sabeddi, degi, e-igar-napiragwaddi, Jesucristoʼba anmarga uknonikid. 18 Dule gwen Bab-Dummad dakdisulid. Unnila Bab-Dummad-Machi-Wargwennagwad, e-Babba-mesa-gudiid, a, anmarga Bab-Dummad-osanalononikid.
2. JESÚS, DULEMAR-ABARGI ARBAED-IMAKSAD
(1:19–12:50)
2a. Diigi-dule-oged-Juan
(1:19-34)
Diigi-dule-oged-Juan ede Cristoʼsurye sogsad
(Mateo 3:1-12; Marcos 1:1-8; Lucas 3:1-9, 15-17)
19 Diigi-dule-oged-Juan weyobi Jesúsʼgi sunmaksagusgu, weyob gusdo. Deunni, Judíoʼmar-dummagan Jerusalén-akar dule-irwa-Bab-Dummadse-gormalad, degi, a-bendakmalad-Levitaʼmar barmiargusad, Juanʼse-egismalaga:
—¿Be doa-dulesunna?
20 Juan gwen yapa-soge gussulid. Innikigwadba sogsad:
—Ani an Cristoʼsulid.
21 Degi, gannar Juanʼse egichidmarbalid:
—Degite, ¿be doa-dulesunna? ¿Be Elías?
Juan, abin-imaksad:
—Suli, an a-dulesurbali.
Juanʼga sogdemarbarsunnad:
—Degite, ¿be Bab-Dummad-gayaburba-barsoged anmar edarbediiddi?
Juan, abin-imakdebalid:
—Suli, an a-dulesuli.
22 Degi ega sogdemarsunnad:
—Degite, ¿be doa-dulesunna? Ar anmar dule-anmar-barmialidga sogergebed, be doa-dule. Degite, ¿doa-duleye na be sogsunna?
23 Juan, abin-sogdegusad:
—Bab-Dummad-gayaburba-barsoged-Isaías sogsa gusad:
‘Dule-wargwen nega-dulesulidganba binnasur sunmaknonikoed, dulemarga sognonikoed:
Dule-Dummad-idu igar mayemar,
igar swilidik mesmar.’
Isaías 40:3
Ani an a-duledo.
24 Dulemar-Juanʼse-barmilear-gusadi, Fariseo-sapingan gumalad. 25 Amar Juanʼse egichiarmalad, ega sogdemalad:
—Ar bede Cristo-sulidde, degi, Elías-surbalidde, degine, Bab-Dummad-gayaburba-barsoged-anmar-edarbediid-surbalidde. Ar degite, ¿ibiga be Bab-Dummad-diigi-ogleged-igar imakdisunna?
26 Juan, amar-abin-imakdegu, sogded:
—Andi Bab-Dummad-diigi-ogleged-igar-imakedi, unnila diigi dule-ogdiid. Ar bemar-abargi dule-wargwen-gudiiddi aku be dakmalad. 27 A-dule an-sorba-danikidi, we an-iduedid. Ar anba bur dule-dummadsoggu, e-sapat-dubse-bakar geg an ei esiked.
28 We-degigusadi, Betania-neg-nugadgi, Jordán-diwar-obakar, bia Juan Bab-Dummad-diigi-ogleged-igar-imaknai, agi deyob gusdo.
Jesús, Bab-Dummad-Sibad-Wawaad-E-Mimmid
29 A-banedgine, Juan, Jesús-ese-dani-dakargua, sogded:
“Be dakmalana, we-dule, Bab-Dummad-Sibad-Wawaad-E-Mimmid, bela dulemarga we-napneggi isgued-osulogedid. 30 We-dulenik an sogsagusad: ‘Dule-wargwen an-sorba danikid, a-dule an-iduedid, ar ade, a-inse an-idu gudiguad.’ 31 Aku a-dule an dakmoganad. A-ulale, Bab-Dummad-diigi-ogleged-igar an imaknonikid. Adi, Israel-dulemar Bab-Dummad-epenne-barmidagoye-sogsad-dule magar dakmalagar.”
32 Juan, Jesúsʼnik sogsagusbalid:
“Nibneg-akar Bab-Dummad-Burba-Isligwaled nuuyobi aidedani, an daksad. Degi, a-dulegi signoni an daksad. 33 An a-dule akudakmoganad. Ar Bab-Dummad E-diigi-ogleged-igar-imakega-an-barmialidi, anga sogsad: ‘Dule-wargwengi Bab-Dummad-Burba-Isligwaled nuuyob-aidedani, degi, egi signoni, be daksale, we-dule, Bab-Dummad-Burba-Isligwaledgi dulemar-ogoed-duledo.’ 34 We deyob an daksad. Degisoggu, an sogdo, we-dule, nue-Bab-Dummad-Machi-sunnadye.”
2b. Jesús gebe-e-arbaed-imakded
(1:35–3:36)
Gebe Jesúsʼba-nagusmalad
35 A-banedgine, Diigi-dule-oged-Juan, degine, e-sapingan-warbogwadmala iduar-gudigusadgi gannar gudiid. 36 Deunni dakalid, Jesús e-walik gudii. Geb Juan sogded:
—Be dakmalana, we-dule, Bab-Dummad-Sibad-Wawaad-E-Mimmid.
37 Juan-e-sapingan-warbogwad degi-soge-itosgu, Jesúsʼba nadegusmalad. 38 Jesús sorba-atakdegu, dule-warbogwad eba-dani-dakargu, amarga sogded:
—¿Ibu be amimala?
Amar, abin-sogdemalad:
—Rabí, ¿bia be mai?
(Rabí sogleged, odurdaked-sailaye).
39 Jesús amarga sogded:
—Be dagmar. Degi, be dakmaloed bia an mai.
Amar Jesúsʼba nadegusmalad, degi, daksamalad bia Jesús mai. A-ibagi Jesús-walik osedosmalad, ar ade, bato sedosad.
40 Dule-warbogwad Juan-sunmak-itosgu Jesúsʼba nadegusmaladi, wargwenadi Andrésʼye-nugad, Simón-Pedro-e-urbad. 41 Andrésʼde, e-ia-Simón-inse aminaded. Simón-amisgu, ega sogded:
—Anmar Mesías-amisad.
(Mesías sogleged, Cristoʼye).
42 Geb degi, Andrés, Jesúsʼse e-ia-Simón-senonikid. Jesús, Simón-nuu-dakdegu, ega sogded:
—Be, Simón Jonás-machi, emigindi, Cefasʼye be nugguoed.
(A sogleged, Pedroʼye).
Jesús, Felipeʼse, degi, Natanaelʼse gochad
43 A-banedgine, Jesús Galileaʼse naesokargu, Felipe-dakalid, ega sogded:
—Anba be dage.
44 Felipe, Betsaida-neggweburginedid. Andrés, degi, Pedro, a-neggweburginmarmogadid.
45 Felipe, Natanael-aminaded. Amisgu, ega sogded:
—Anmar dule-wargwen amisad. Igi Moisés e-Igar-Mesisadgi-narmaksagusa, degi, igi Bab-Dummad-gayaburba-barsogmalad narmaksagusmarmoga, yoedse dule-wargwen danikoye, a-dule anmar amisad. A-dule, Jesúsʼye-nugad, Nazaretʼginedid, José-machid.
46 Natanael, abin-sogded:
—¿Ar Nazaret-neggweburgi sunna ibmar-nued nodasi?
Felipe, abin-sogded:
—Be anba dage, adi, be-sunnad be dakoed.
47 Jesús, Natanael-ese-warmakdani-dakargu, Natanaelʼgi sogded:
—Wedi, Israel-dule-sunnadid, dule-nuedid. We-dule, e-gwagegi emar-yardaked gwen naisulid.
48 Natanael Jesúsʼga sogded:
—¿Wede igi be an-wisi an deyobid?
Jesús, abin-sogded:
—Amba yoo Felipe bese goleunni, deun sapi-higuera-urba amba be sigua, bato an be-daksad.
49 Natanael Jesúsʼga sogdesunnad:
—Rabí, be Bab-Dummad-Machid, Israel-e-Rey-sunnadid. A-ular, be an-wisid.
50 Jesús, abin-sogded:
—¿Higuera-sapi-urba-sii an be-daksaye an bega sogsad-ulale, be an-bensuli? Weba bur bule ibmar-dummagan be dakoed.
51 Jesús sogdebar:
—Napira an bemarga soged, emi-onodedgi bemar nibneg-argade, degi, Bab-Dummad-e-baliwiturmar Dule-Machigi nakwemai, degi, aidemai, be dakoed.