1 Lu icja ládxiʼdaʼahuëʼ rnnëʼ bönniʼ tuʼ canö́z, rnnëʼ: Bitiʼ zoa caz Dios.

Nachixi nanítigaquiëʼ bönniʼ caní, en tunëʼ le cabí riléʼenëʼ dxiʼa Dios.

Cuntu nu zoa nu run le naca dxiʼa.

2 Ga zoëʼ Dios yehuaʼ yubá buyúëʼ luyú ni ga nacuáʼ bönachi

para iléʼenëʼ channö zoa nu réajniʼi, nu naʼ riguilaj Dios.

3 Yúguʼtëʼ nadö́digaquiëʼ tsöláʼalö.

Nachixi nanítigaquiëʼ tu tuëʼ.

Cuntu nu zoa nu run le naca dxiʼa, nitú bönachi.

4 ¿Naruʼ cabí taʼyéajniʼi nupa tuáʼ döʼ?

Le tun nupa naʼ naca tsca tagu bönachi quiaʼ ca nu ragu yöta.

Bitiʼ caʼ tuʼlidza nedaʼ, Xángaca bönachi.

5 Lu yöl-laʼ radxi ridzöbi quéguequi taʼzxizi

tuʼ taʼléʼe Xanruʼ Dios, en zóalenëʼ bönachi tsahuiʼ.

6 Tuʼtitaj xtídzaʼgaca nupa nácagaca yechiʼ,

pero nupa ni tuʼzxöni ladxiʼ gácalenëʼ Xanruʼ léguequi.

7 Raca ládxaʼa irúaj Sión Nu usölá bönachi Israel.

Cateʼ gunëʼ Xanruʼ ga uluʼdxín bönachi queëʼ nadzúngaca xilátjaguequi,

uluʼdzeja zxíʼini xiʼsóëʼ Jacob, bönachi Israel, en uluʼzíʼ xibë́ʼ Dios.