1 ᤀᤠᤸᤗ ᤀᤠᤏᤡᤃᤧ ᤀᤠᤒᤠᤅᤣ ᤆᤶᤛᤡᤱᤔᤠ ᤜᤣ᤺ᤰᤋᤡᤃᤧᤒᤠᤒᤡ᥅ ᤜᤧᤰᤁᤩᤠᤱ ᤘᤣ᤹ ᤔᤏᤠᤜᤠ᤹ ᤁᤢᤀᤡᤛᤡ᤺ᤰ ᤀᤠᤏᤡᤃᤧᤀᤠᤱ ᤂᤡᤏᤡ᤹ ᤗᤠᤃᤡ ᤀᤡᤃᤪ ᤂᤡᤏᤡ᤹ᤗᤠᤶᤒᤠ ᤁᤴ ᤔᤏᤠᤜᤠ᤹ ᤏᤢ᤺ᤖᤡᤰᤁᤠᤱ ᤗᤠᤱᤍᤠ᤺ᤰᤋᤧᤶᤛᤡᤶᤔᤧ᤹ ᤁᤧᤗ᤹ᤒᤠ ᤛᤰᤀᤡᤱᤄᤱ ᤆᤠᤜᤠᤒᤠ ᤔᤧᤈᤥᤃᤡᤃᤧᤴᤗᤥ॥ 2 ᤂᤡᤏᤡ᤹ ᤜᤡᤱᤔᤴᤏᤡᤱᤃ ᤁᤠᤰ ᤔᤏᤠᤜᤠ᤹ᤖᤧ ᤏᤡ᤺ᤵᤔᤠ ᤔᤧᤛᤢᤰᤋᤢᤒᤠ ᤏᤢ ᤁᤢᤛᤡᤱ ᤔᤧᤏᤡ᤺ᤳᤋᤢᤒᤠ ᤔᤧᤴᤇᤠᤶ ᤛᤡᤰᤗᤢᤱᤔᤥ ᤛᤠᤵᤔᤏᤠᤒᤠ ᤛᤰᤀᤡᤱᤄᤱᤗᤥ॥ 3 ᤛᤧᤰᤂᤠᤀᤣ ᤂᤡᤏᤡ᤹ᤃ ᤂᤪᤡᤛ᤻ᤋᤖᤧ ᤛᤠᤵᤋᤢᤀᤠᤱ ᤀᤠᤏᤡᤃᤧᤗᤠᤶᤒᤠ ᤜᤠᤅᤢᤒᤠ ᤛᤰᤀᤡᤱᤄᤱᤏᤡᤱᤗᤥ॥ ᤂᤧᤱᤃ ᤏᤠᤰᤆᤠ ᤏᤢ ᤛᤠᤵᤘᤠᤖᤧ ᤔᤧ᤺ᤴ. ᤁᤖ ᤀᤠᤈᤢᤏᤡ ᤏᤡᤱᤘᤠ᤹ᤑᤢᤔᤠᤱᤅᤡᤸᤗᤧ ᤐᤠᤱᤄᤢᤒᤠ ᤛᤣᤛᤣᤔᤠᤱᤅᤡᤸᤗᤧ ᤛᤠᤵᤋᤢᤒᤠᤖᤥ. ᤛᤠᤵᤗᤢᤱᤅᤥ* ᤏᤡᤱᤘᤠ᤹ᤑᤢᤔᤠᤱᤅᤡᤸᤗᤧ ᤕᤜᤢᤍᤡᤜᤠ᤹ ᤌᤡᤒᤥ᤺ᤱ ᤛᤠᤶᤕᤥᤌᤡᤶ ᤀᤡᤱᤈᤠ᤺ᤱ ᤐᤡᤖᤢᤛᤡᤸᤗᤧ ᤛᤠᤵᤗᤢᤱᤅᤥ ᤛᤠᤵᤋᤢ ᤐᤡᤖᤢᤛᤡᤀᤠᤱ ᤘᤕᤧ॥ ᤛᤠᤵᤋᤢᤒᤠ ᤔᤧ᤺ᤴ. ᤁᤖ ᤔᤧᤴᤇᤠᤶ ᤛᤡᤰᤗᤢᤱᤔᤥ ᤂᤪᤡᤛ᤻ᤋᤖᤧ ᤛᤠᤵᤋᤢᤒᤠ ᤛᤰᤀᤡᤱᤄᤱᤏᤡᤱᤗᤥ॥

4 ᤂᤪᤡᤛ᤻ᤋᤖᤧ ᤂᤧᤴ ᤐᤠ᤺ᤴᤏᤡᤴ ᤛᤧᤰᤂᤠ ᤆᤥ᤺ᤰ ᤑᤠ᤹ᤀᤠᤱ ᤏᤡᤱᤘᤠ᤹ᤑᤢᤔᤠᤱᤅᤡᤸᤗᤧ ᤁᤢᤏᤡ᤺ᤔᤠᤀᤥᤀᤣ ᤏᤡ᤺ᤴᤎᤥ ᤆᤥᤃᤡᤃᤧᤖᤥ॥ 5 ᤀᤠᤏᤡᤃᤧ ᤀᤠᤒᤠᤅᤣ ᤌᤣᤛᤠᤱ ᤆᤥ᤺ᤰᤔᤠ ᤛᤢᤰᤋᤢᤶᤒᤧ᤹ ᤑᤠ᤹ᤀᤠᤱ ᤔᤧᤒᤠ᤺ᤳᤋᤢᤶᤒᤧᤴᤗᤥ. ᤁᤖ ᤀᤠᤏᤡᤃᤧ ᤏᤡᤱᤘᤠ᤹ᤑᤢᤔᤠᤱᤗᤠᤶᤒᤠ ᤆᤥ᤺ᤰᤔᤠ ᤛᤢᤰᤋᤢᤶᤒᤧᤖᤥ॥ 6 ᤂᤢᤏᤧ᤹ᤀᤣ ᤁᤢᤛᤱ ᤛᤣᤛᤣᤔᤠᤱᤜᤢᤵᤐᤡᤸᤗᤧᤴ ᤔᤠᤱᤛᤣᤘᤠ ᤆᤥ᤺ᤰᤔᤠ ᤁᤧᤛᤢᤰᤐᤠ ᤆᤥᤃᤡᤃᤧᤀᤠᤱ ᤘᤠ᤹ᤖᤥ॥ ᤁᤱᤃ ᤛᤠᤵᤔᤏᤠᤒᤠ ᤛᤠᤶᤕᤥᤌᤡᤶᤗᤠᤶᤒᤠ ᤔᤧ᤺ᤴ. ᤁᤖ ᤛᤣᤛᤣᤔᤠᤱᤗᤠᤶᤒᤠᤖᤥ. ᤌᤣᤀᤠᤱᤓᤧᤸᤗᤧ ᤛᤠᤵᤔᤏᤠᤒᤠ ᤛᤠᤶᤕᤥᤌᤡᤶᤔᤡᤸᤗᤧ ᤀᤠᤛᤧᤳ. ᤁᤖ ᤛᤣᤛᤣᤔᤠᤱᤅᤡᤸᤗᤧ ᤀᤠᤜᤡᤱᤗᤥ॥

7 ᤔᤥᤛᤠᤖᤧ ᤂᤧᤴ ᤛᤠᤶᤕᤥᤌᤡᤶᤔᤡᤴ ᤗᤢᤱᤛᤠᤵᤐᤥ ᤛᤠᤵᤋᤢᤀᤠᤱ ᤔᤡᤔᤡᤍᤡᤱᤅᤡᤴᤏᤢ ᤋᤩᤧ॥ ᤜᤧᤰᤁᤣ᤺ᤸᤗᤧ ᤔᤥᤛᤠᤖᤧ ᤁᤢᤏᤠᤖᤠ᤺ᤸᤗᤧ ᤁᤢᤔᤡᤔᤡᤍᤡᤱᤅᤡᤴ ᤛᤧᤖᤧᤶ ᤗ᤹ᤖᤧᤒᤣᤖ ᤐᤳᤇᤧᤛᤠᤱ ᤀᤡᤛᤪᤠᤀᤡᤗᤡᤜᤠ᤹ᤖᤧ ᤁᤢᤏᤠᤖᤠ᤺ᤴ ᤀᤥᤔᤧᤵᤔᤠ ᤔᤧᤴᤇᤢᤰᤋᤢᤴᤗᤥ॥ 8 ᤜᤧᤰᤁᤣ᤺ᤸᤗᤧ ᤛᤡ᤺ᤔᤧᤴ ᤁᤧᤍᤠ᤺ᤵᤐᤠ ᤛᤠᤶᤕᤥᤌᤡᤶᤔᤡᤴ ᤔᤡᤔᤡᤍᤡᤱᤅᤡᤴᤏᤢ ᤋᤩᤧ᤺ᤸᤗᤧ ᤛᤣᤛᤣᤔᤠᤱᤅᤡᤸᤗᤧ ᤋᤠᤖᤢᤒᤠ ᤀᤡᤱᤈᤠ᤺ᤱᤅᤡᤱᤃ ᤂᤧᤴᤏᤢ᤺ᤸᤗᤧ ᤕᤖᤡᤰ ᤔᤡᤔᤡᤍᤡᤱᤒᤠ ᤔᤧᤈᤥ᤺ᤰᤏᤧᤴᤒᤡ᥅ 9 ᤔᤧᤴᤇᤠᤶ ᤕᤠᤵᤔᤡᤜᤠ᤹ ᤐᤠ᤺ᤴ ᤁᤧᤎᤡᤰᤐᤠ ᤔᤠᤱᤛᤣᤘᤠ᤺ᤴ ᤔᤡᤔᤡᤍᤡᤱᤒᤠ ᤐᤥ᤺ᤰᤂᤧᤸᤗᤧ ᤔᤧᤴᤇᤠᤶ ᤕᤠᤵᤔᤡᤀᤥ ᤛᤠᤶᤕᤥᤏᤡᤔᤠ ᤁᤧᤍᤠ᤺ᤵᤐᤠ ᤔᤠᤱᤛᤣᤘᤠ᤺ᤴ ᤂᤧᤴᤏᤢ᤺ᤸᤗᤧᤀᤠᤱ ᤕᤖᤡᤰ ᤔᤡᤔᤡᤍᤡᤱᤒᤠ ᤆᤥ᤺ᤰᤗᤥ᥄ 10 ᤛᤧᤰᤂᤠ᤺ᤸᤗᤧ ᤁᤢᤛᤱ ᤛᤣᤛᤣᤔᤠᤱᤜᤢᤵᤐᤡᤸᤗᤧᤴ ᤛᤧᤴᤍᤠᤱᤃᤧᤴ ᤔᤡᤔᤡᤍᤡᤱᤅᤡᤴᤏᤢ ᤋᤱᤔᤠᤸᤗᤧ ᤂᤧᤴ ᤋᤃᤡᤒᤠ ᤔᤡᤔᤡᤍᤡᤱᤅᤡᤱᤃ ᤌᤣᤀᤠᤱ ᤔᤧ᤺ᤴᤗᤥ॥ 11 ᤌᤣᤀᤠᤱᤓᤧᤸᤗᤧ ᤋᤃᤡᤒᤠᤴ ᤛᤧᤖᤧᤶ ᤗ᤹ᤖᤧ ᤐᤣᤛᤠᤱ ᤔᤡᤔᤡᤍᤡᤱᤒᤠ ᤆᤥᤃᤧᤸᤗᤧ. ᤛᤍᤠᤍᤡᤱ ᤁᤧᤘᤠ᤹ᤒᤠᤴ ᤂᤧᤴᤏᤢ᤺ᤸᤗᤧᤀᤠᤱ ᤕᤖᤡᤰ ᤔᤡᤔᤡᤍᤡᤱᤒᤠ ᤆᤥ᤺ᤰᤗᤥ॥

12 ᤀᤠᤏᤡ᤹ᤃ ᤀᤰᤋᤱᤒᤠ ᤏᤡᤱᤛᤠᤱ ᤀᤠᤃᤳᤋᤢᤶᤒᤠᤸᤗᤧ ᤆᤥᤃᤢᤸᤗᤧ ᤛᤧᤰᤂᤠ᤺ᤴ ᤀᤡᤱᤓᤥ᤺ᤔᤠ ᤀᤠᤱᤃᤡᤏᤧᤴ॥ 13 ᤀᤠᤏᤡ᤹ᤃ ᤔᤥᤛᤠ᤺ᤴ ᤁᤢᤀᤡᤛᤡ᤺ᤰᤛᤡ ᤔᤧ᤺ᤴᤗᤥ॥ ᤂᤧᤸᤗᤧᤃ ᤀᤡᤛᤪᤠᤀᤡᤗᤡᤜᤠ᤹ᤖᤧ ᤛᤧᤖᤧᤶ ᤗ᤹ᤖᤧᤒᤣᤖ ᤐᤳᤇᤧᤒᤠ ᤛᤧᤴᤍᤠᤱᤃᤧᤴ ᤀᤥ᤺ᤳᤋᤡ᤺ᤴ ᤔᤧᤴᤏᤡ᤺ᤛᤢᤴᤗ ᤑᤠ᤹ᤀᤠᤱ ᤁᤢᤏᤠ᤺ᤴ ᤋᤧᤵᤋᤢ ᤑᤳᤇᤢᤖᤥ॥ 14 ᤁᤖ ᤔᤏᤠᤜᤠ᤹ᤖᤧ ᤂᤢᤏᤡ᤹ ᤏᤡᤱᤘᤠ᤹ᤒᤠᤴ ᤁᤧᤛᤠᤰᤐᤠ ᤐᤥ᤺ᤰᤂᤧᤀᤠᤱ ᤀᤠᤸᤗ ᤌᤠᤖᤡᤰᤛᤠᤱ ᤌᤡᤰᤛᤡᤃᤣ᤺ᤰᤛᤔᤠ ᤔᤠᤱᤜᤢᤵᤐᤡᤴ ᤔᤧᤏᤡ᤺ᤖᤢᤸᤗᤧ ᤛᤧᤰᤂᤠ᤺ᤴ ᤁᤢᤛᤡᤱ ᤔᤧᤴᤏᤡ᤺ᤳᤋᤢᤴᤗ ᤑᤠ᤹ᤀᤠᤱ ᤂᤧᤴ ᤏᤠᤍᤧᤵᤔᤠᤸᤗᤧ ᤋᤧᤵᤋᤢ᤹ᤖᤥ॥ ᤁᤴ ᤏᤠᤍᤧᤵᤔᤠᤱᤃ ᤂᤪᤡᤛ᤻ᤋᤧᤴ ᤆᤥ᤺ᤰᤔᤏᤠᤒᤠ ᤏᤛᤠ᤺ᤴᤏᤡᤸᤗᤧᤖᤰ ᤜᤴᤍᤢ᤹ᤖᤥ॥ 15 ᤀᤠᤀᤡᤴ ᤌᤠᤖᤡᤰᤛᤠᤱ ᤔᤥᤛᤠᤖᤧ ᤛᤠᤵᤋᤢᤒᤠ ᤛᤠᤶᤕᤥᤌᤡᤶᤔᤡᤴ ᤔᤧᤏᤡ᤺ᤖᤢᤸᤗᤧ ᤂᤧᤱᤜᤠ᤹ᤖᤧ ᤂᤢᤏᤡ᤹ ᤏᤡᤱᤘᤠ᤹ᤀᤡᤴ ᤂᤧᤴ ᤏᤠᤍᤧᤵᤔᤠᤸᤗᤧ ᤋᤧᤵᤋᤢ᤹ᤀᤠᤱ ᤁᤢᤛᤡᤱ ᤔᤧᤴᤏᤡ᤺ᤳᤋᤢᤴᤗᤥ॥

16 ᤁᤖ ᤀᤠᤳᤋᤡᤴ ᤔᤏᤠ᤺ᤸᤗᤧ ᤍᤠᤱᤒᤠᤴ ᤏᤛᤠ᤺ᤴ ᤆᤥᤃᤢ᤹. ᤂᤧᤸᤗᤧ ᤁᤢᤏᤠᤍᤧᤵᤔᤠᤴ ᤜᤴᤗᤥ॥ 17 ᤀᤠᤸᤗ ᤍᤠᤱᤒᤠᤱᤃ ᤛᤣᤛᤣᤔᤠᤱᤗᤥ. ᤜᤧᤰᤁᤩᤠᤱ ᤍᤠᤱᤒᤠᤸᤗᤧ ᤁᤢᤛᤣᤛᤣᤔᤠᤱᤅᤡᤴ ᤀᤠᤳᤋᤥ ᤘᤠ᤹. ᤂᤧᤵᤔᤥ ᤆᤥ᤺ᤰᤕᤢᤶᤓᤥ ᤘᤠ᤹ᤖᤥ॥ 18 ᤀᤠᤏᤡ᤹ ᤍᤠᤱᤒᤠᤸᤗᤧ ᤁᤢᤔᤡᤔᤡᤍᤡᤱᤅᤡᤴ ᤀᤥᤛᤣ᤺ᤴᤀᤠᤎᤠᤰᤗ ᤑᤠ᤹ᤀᤠᤱ ᤀᤠᤏᤡ᤹ ᤏᤠᤍᤧᤵᤔᤠᤴ ᤜᤖᤧᤀᤠᤱ ᤘᤠ᤹ᤖᤥ॥ ᤍᤠᤱᤒᤠᤴ ᤛᤣᤛᤣᤔᤠᤱᤗᤥ. ᤜᤧᤰᤁᤩᤠᤱ ᤂᤢᤏᤧ᤹ᤗᤠᤶᤒᤠ ᤁᤧᤍᤠ᤺ᤒᤠ ᤁᤢᤔᤡᤔᤡᤍᤡᤱᤅᤡᤸᤗᤧ ᤂᤢᤏᤧ᤹ ᤁᤢᤀᤡᤛᤡ᤺ᤰ ᤀᤠᤗᤧᤱᤛᤡᤱᤗ ᤀᤠᤒᤣ᤺ᤰ. ᤜᤧᤰᤁᤩᤠᤱ ᤀᤠᤸᤗᤛᤠᤱ ᤕᤖᤡᤰ ᤔᤡᤔᤡᤱᤍᤡᤱᤒᤠ ᤀᤠᤒᤥ᤺ᤱᤗ ᤀᤠᤒᤣ᤺ᤰᤗᤥ॥