6
Llaquicur Diosta mañacushan
Instrumentuta racupa tucar cantananpaj David isquirbishan alabansa.
1 Tayta Dios, rabyasha caycashayqui öraga ama piñacamaychu.
Fiyupa rabyasha carga ama castigamaychu.* Sal. 38.1; Jer. 10.24
2 Tayta Dios, cuyapaycamay ari.
Gueshyarmi callpaynaj ricacushcä.
Tayta Dios, allchacaycachimay ari.
Intëru cuerpöchaj sicsicyaycan.
3 ¡Manchariywanmi sicsicyaycä!
Tayta Dios, ¿imaycamaraj cayno cashaj?
4 ¡Aywaycamuy ari Tayta Dios, salbamänayquipaj!
¡Cuyapäcoj cashpayqui salbaycamay ari!
5 Wañojcunaga manami pipis yarpäshunquinachu.
¿Piraj alabashunquiman pamparashan allpapitaga?* Sal. 88.10–12; 115.17; Isa. 38.18–19
6 Atarpis pasaypanami uticashcä.
Waray waraymi amatar wagä.
Jawanätapis wagaycaptillämi weguë ushmasha.
7 Wagaycaptillänami ñawëpis chacaycan.
Chiquicuna chiquimaptin wagaycällarnami ushacaycäpis.
8 ¡Lädöpitapis witicuyna mana allita rurajcuna!* Mat. 7.23; Luc. 13.27
Tayta Diosga wiyashanami fiyupa wagashäta.
9 Tayta Diosga wiyashanami ruwacushäta.
Tayta Diosga chasquimashanami mañacushäta.
10 Chiquimajcunaga manchariyllawan manami ima ruraytapis camäpacongachu.
Illajpitami pengay-tucusha gueshpir aywaconga.