140
Oturutoh Ritonõpo a osewomapotohme
Tawi nymerohpyry
1 Ritonõpo Jesemy, kypynanohko popyra
exiketõ winoino!
Kuewomako jetapary se exiketõ winoino.
2 Osenetupuhkehpyra mã toto popyra ehtoh riry poko imehnomo a, tahxime etonatoh kuhnõko mã toto.
3 Inurukõ okoi orihmatõ sã mã toto,
aomirykõ okoi epity sã mã orihmato.
4 Ritonõpo Jesemy, kuewomako popyra
exiketõ jamitunuru winoino!
Kuewomako jetapary se exiketõ winoino,
yporemãkapory se exiketõme mã toto.
5 Mokaro epyrypaketomo a ahno apoitoh tyrise,
tarãpa tõ tyrise eya xine jesemary ao;
japoitoh tyrise eya xine japoitohme.
6 Ritonõpo a oturũko ase: “Jesẽme mase, Ritonõpo.”
Otatõme exiko, kuakorehmako, ekaroporyhtao oya.
7 Jesemy imehxo, Jewomane jamihme,
kuewomase etonatoh po.
8 Ritonõpo, popyra exiketomo a ise aehtohkõ
onekaropyra exiko.
Popyra ehtoh poko se toto ahtao,
toto anakorehmara exiko ime pyra toto ehtohme.
9 Orẽpyra jepetõkara onyripopyra exiko;
ah jenaroximatoh tonõ eya xine
nepukã toto epona xine.
10 Ah ikarã nepukã toto epona xine!
Ah mokaro tõmasẽme nexĩ toto oramã aka
jũme tũtara ropa toto ehtohme!
11 Ah imehnõ hxironanõ torẽse nexĩ toto,
ajohpe toto ahtao!
Ah popyra ehtoh noehno imehnõ etapananomo a,
tapoisẽme toto ehtohme,
tonahkasẽme roropa toto ehtohme!
12 Ritonõpo yna Esemy, zuaro ase,
tymõkomokãkara ewomãko mase,
omise exiketõ roropa,
zae toto ripotohme imehnomo a.
13 Õmiry omipona exiketõ oeahmãko mã toto.
Zae ehtoh poko exiketõ isene exĩko mã toto oẽpataka.