2
Ritonõpo nymenekahpyry tuisame
1 Oty katohme atamorepãko sero nono põkõ nae
Ritonõpo poremãkapory poko?
Toiparo rokẽ moro poko osenetupuhnõko mã toto.
2 Sero nono põkõ tuisary tõ typyrekõ rĩko mã toto,
kowenu poko erohketõ maro atamorepãko mã toto
Ritonõpo epeme pyra toehtohkõme, tuisame
inymenekahpyry epeme pyra toehtohkõme roropa.
3 Ynara ãko mã toto:
“Tuisame mokaro ehtoh surumekatone;
mame inyripohpyry kyya xine senahkatone.”
4 Tapõ po Exikety kapu ao exianãko mana;
mokaro eunohnõko Kuesẽkõ mana.
5 Mame tohne toexiryke mokaro zurũko mana,
toto enaroximãko mana tyjamitunuru ke,
toto zehno toexiryke.
6 Ynara ãko mana:
“Ynymenekahpyry yriase tuisame japõ po,
moroto Jerusarẽ po, ypy Xião kurã po.”
7 “Jarao omi ekarõko ase,” ãko tuisa mana.
“Ritonõpo omiry ekarõko ase.
Ynara nase ya:
‘Umũkurume mase; seroae omyme toehse ywy.
8 Ekaropoko ya,
imeimehnõ nonory põkõ ekarõko ase oya
opoetoryme toto ehtohme;
sero nono emero ononoryme exĩko mana.
9 Toto esẽme exĩko mase
omyxiry mã kurimene risẽme exĩko;
zae pyra exiketõ wãnohnõko mase
oripo ehmory sã topu pona.’ ”
10 Naeroro etatoko, tuisa tomo;
otato ehtoko, kowenu poko erohketomo!
11 Kuesẽkõ eahmatoko tomeseke samo.
Tykytyky kaxitoko,
oesekumurukõ po oporohtoko ẽpataka;
12 ozehno xine aexiryino te,
oenahkaryino oesemary ae oytoryhtao.
Tãkye matose exĩko
oewomaneme Ritonõpo riryhtao oya xine!