61
Amɨn kɨnda Piŋkop da kɨlani asak do bɨsit agɨt
Kap on kap yoŋ dakon kɨla amɨn do mandabi. Dewit dakon kap kɨnda. Gita tɨdaŋek yogogɨ.
1 Piŋkop, mɨrakgo yopmaŋek aŋpulugoki do yaŋ tɨdosot uŋun nandaki.
Bɨsitno nandaki.
2 Nak mɨktɨm dubagɨsikon da gak do yaŋ tɨdosot.
Butnokon da paŋpulugogɨ mɨni egɨsat yaŋ nandaŋek yaŋ tɨdosot.
Aŋkɨ nepbɨ tɨp madep da yoŋgamon pasɨlɨ egɨpbeŋ,
3 nido tagɨsi aŋkutnosol.
Nagal tebano agaki uwalno da arɨpmɨ dɨma abɨŋ nepni.
4 Nak bɨsap mudok mudogɨ mɨni gak da yutnon egɨpbeŋ do nandɨsat.
Pup pudɨk meŋi da pɨtgwan tagɨsi ekwaŋ, uŋun da tɨlak gak da kapmatjok egapbo aŋkutnoki do nandɨsat.
5 Piŋkop, nak yaŋ teban tok agɨm uŋun gak da nandagɨl.
Yo tagɨsi gak do pasolgoŋ amɨn kabɨ do yomɨsal uŋun nak do kɨlɨ namgul.
6 Kɨla amɨn madep aŋteban abɨ bɨlak morapmɨsi egɨpjak.
Aŋteban abɨ babɨkni morapmɨ altaŋ altaŋ ani uŋun pɨndatjak.
7 Piŋkop, aŋteban aŋaki bɨsap dagok dagogɨ mɨni gak da dabɨlon kɨla amɨn madep egɨpjak.
Toktogɨsi but dasi galak taŋ ɨmɨŋek kɨlani aŋek aŋkutnoki dosi nandɨsat.
8 Yaŋ aŋaki gɨldarɨ gɨldarɨ yo ak do yaŋ teban tok agɨm uŋun abeŋ.
Aŋek gɨldarɨ gɨldarɨ kap yaŋek mango aŋkɨsikeŋ.