129
Israel amɨn da Piŋkop da uwalni paŋupbal asak do bɨsit awit
Piŋkop gawak ɨmɨm tamokon kɨgɨk dakon kap.
1 Israel amɨn, gak monɨŋɨsogon da wɨŋ abɨsok ekwamaŋon gak uwal da yokwi aŋ gamgwit dakon gen niyɨki.
2 Gak yaŋ yoki, “Monɨŋɨsogon da wɨŋ abɨsok ekwamaŋ bɨsapmon uwal da nak yo yokwisi aŋ namaŋ.
Mani nak arɨpmɨ dɨma abɨŋ nepni.
3 Nak obɨsi baljaŋakwa nap kɨrɨŋ da manjinokon gɨptɨmno dapba kɨrɨŋɨkwaŋ.
Pi kaga daŋgap pɨndakgamaŋ uŋun da tɨlak baljaŋba wuda dubagɨsi dɨ noman toŋ.
4 Mani Yawe uŋun kɨlegɨsi.
Nak amɨn yokwi da nap teban wamgwit uŋun mandaŋ dagaŋakwan oman monjɨ saŋbeŋek dɨma egɨsat.”
5 Nak Yawe da mɨŋat amɨnyo Saion kokup pap do uwal aŋ, uŋun mayaktok yomɨŋek pabɨŋ yopmaŋek yolban tobɨlek kokupnikon kɨni dosi nandɨsat.
6 Uŋun joŋ yut kwenon kwaŋek don dubak tokdo aŋakwa gɨldat da pɨndakban tepmɨ kɨbɨdoŋ uŋun yombem ani dosi nandɨsat.
7 Amɨn kɨnda da joŋ uŋun baljaŋ paŋmuwuk wamaŋek dɨma paŋkɨsak.
8 Ae mɨŋat amɨnyo uwalnin da kapmatjok kɨŋek “Yawe da yo tagɨsi aŋ damɨŋek gɨsam damjak” yaŋ dɨmasi yoyɨni dosi nandɨsat.