130
1–8 ʻOku fakahā ʻe he tangata tohi saame ʻene ʻamanaki ʻi heʻene lotu, 5 Mo ʻene kātaki ʻi heʻene ʻamanaki. 7 ʻOku ne enginakiʻi ʻa ʻIsileli ke nau ʻamanaki lelei ki he ʻOtua.
Ko e Hiva ʻae ʻalu hake.
1 ʻE Sihova, naʻaku tangi kiate koe mei he ngaahi moana.
2 ʻE ʻEiki, ke ke ongoʻi hoku leʻo:
fakatokangaʻi ho fofonga ki he leʻo ʻo ʻeku ngaahi lotu tāumaʻu.
3 Kapau te ke fakaʻilonga, ʻE Sihova, ʻae ngaahi hia,
ʻE ʻEiki, ko hai ʻe faʻa tuʻu?
4 Ka ʻoku ʻiate koe ʻae fakamolemole,
koeʻuhi ke manavahē ai kiate koe.
5 ʻOku ou tatali kia Sihova,
ʻoku tatali ʻa hoku laumālie,
pea ʻoku ou ʻamanaki lelei ki heʻene folofola.
6 ʻOku tatali ʻa hoku laumālie kia Sihova ʻo lahi hake ʻiate kinautolu ʻoku nau leʻo ki he pongipongi:
ʻoku ou pehē, ʻo lahi hake ʻiate kinautolu ʻoku nau leʻo ki he pongipongi.
7 Ke ʻamanaki ʻa ʻIsileli kia Sihova:
he ʻoku ʻia Sihova ʻae ʻaloʻofa,
pea ʻoku ʻiate ia ʻae huhuʻi lahi.
8 Pea te ne huhuʻi ʻa ʻIsileli mei heʻene ngaahi hia kotoa pē.