3
Quimsa caj llaquicuy
Álef
1 Nogaga fiyupami ñacashcä.
Tayta Dios rabyacurcur castigamaptinmi ñacashcä.
2 Paymi yanauyaycajman pushamaran.
Achqui mana cashancho purichir ñacachimaran.* Job 19.8
3 Yaparir-yaparirmi imay örapis nogataga castigaycäman.* Job 7.16–19; Sal. 88.7, 15–16
Bet
4 Garätapis aychätapis pasaypanami auquisyächisha.
Tullöcunatapis pasaypami paquir-ushasha.* Job 7.5; 30.30
5 Intëröpa curralta rurajnömi fiyupa ñacachimashpan llaquicaycächiman.* Job 19.12
6 Wañojcuna pamparaycashan chacaychöno cawanäpämi cachaycamasha.* Sal. 88.5–6; 143.3
Guímel
7 Maypapis mana llojshinäpämi curralman wichgarcamasha.* Job 3.23; 19.8
Fiyupa lasaj cadinacunawanmi watarcamasha.
8 Yanapämänanpaj mañacur gaparaycaptëpis
ruwacushätaga manami wiyamashachu.* Job 30.20
9 Puricunätaga rumicunawanmi pergacurcusha.
Caminötaga juc-läpana jitarisha.
Dálet
10 Nogapäga Tayta Dios casha pacaraycaj ucumaryanömi;* Job 10.16; 16.9
pintipaycamänanpaj caycaj liyunnömi.
11 Allipa aywaycajtami pantacächimasha.
Tariparcur rachiramasha.
Fiyupa mancharishatami cachaycamasha.
12 Lëchanta sumaj chutarcurmi nogataga lëchanwan chayachimänanpaj apuntamasha.
He
13 Tayta Dios jitamushan lëchacunaga
cuerpöman fiyupa ruricamami jaticasha.* Job 16.12–13
14 Llapanmi marca-masëcunapis nogataga asipäman.
Imay örapis nogapaj parlar asircaycanmi.* Deut. 28.37; Job 30.9; Sal. 69.10–12; Jer. 20.7
15 Tayta Diosga fiyupa llaquicuyllamanmi churamasha.
Ashgaj berbënatami upuchimashapis.* Job 9.18
Vav
16 Guechga rumiwanmi quirötapis jorgusha.
Uchpachömi gochpachimasha.
17 Nogapäga manami cannachu alli goyayga.
Cushisha goyay cashantapis gongaycushcänami.
18 Chayno cashpämi nishcä:
«Alli goyayta manami yarpänachu. Tayta Diosmanpis imapänataj yäracushaj» nir.* Job 17.15–16; 19.9–10; 30.19
Zayin
19 Yarpämi llaquicushäta, ñacashäta, japallä goyashätapis.
20 Chaycuna imano päsamashantapis yarpachacömi.
Chauraga alli shacyaycashäpitapis guellanacäcönami.
21 Ichanga imaypis shongöcho yarpaycäshämi.
Y chay yarpaycashämanga yäracuycäshämi:
Jet
22 Tayta Dios cuyacoj cashanga manami imaypis ushacanchu.
Cuyapäcoj cayninpis manami ushacanchu.
23 Alli caynenga waran-waranmi mushojyaycan.
Aunishantaga imaypis cumlinmi.* Éxo. 34.6–7; Sal. 136
24 Shongullächöga në: «Nogapäga Tayta Diosllami llapanpitapis mas alli.
Chaymi payllaman yäracö.»* Sal. 16.5; 119.57
Tet
25 Tayta Diosga fiyupa allimi payman yäracojcunapäga
llapan shongunpa payman yäracuyta ashejcunapäga.* Isa. 30.18
26 Tayta Dios salbamänanchïpäga upällalla shuyaraymi mas alli.
27 Runapäga mas alli caycan mösu cashanpita-pacha ñacaycunata awantaymi.
Yod
28 Tayta Dios ñacachishan öra
runaga upällalla japallan cacunman.
29 Wiyacushpan pampaman uysuräcunman.
Chayno ruraptenga capaschari allimanpis churanman.
30 Pipis magaptenga cäranta witichipanman.
Imata gayapaptinpis upällalla chasquicunman.* Mat. 5.39
Caf
31 Tayta Diosga pitapis manami para-simriga gongaycunchu.
32 Ñacachishpanpis cuyapanmi.
Chaynöga ruran fiyupa cuyacoj cashpanmi.* Sal. 30.5; Isa. 54.7–8; 60.10
33 Rasunpaga pay manami munanchu
runacunata ñacachiyta, ni nanächiytapis.
Lámed
34 Tayta Diosga manami munanchu prësu caycaj jäpacunata ñacachinanta.
35 Tayta Diosga manami munanchu pï runatapis manacajman churananta.
36 Tayta Diosga manami munanchu dimanducho juchayoj cajpa faburnin pipis cananta.
Mem
37 Tayta Dios mana camacächiptenga imapis manami cay pachacho canmanchu.
38 Allipis mana allipis chayamun janajcho caycaj Tayta Dios «chayno cachun» niptinmi.* Job 2.10; Isa. 45.7
39 Juchasapa cashanpita castigasha caycarga runa ¿imapitataj quijacunman?
Nun
40 Imano goyaycashanchïtapis sumaj yarpachacushun.
Tayta Dios munashannöna cawashun.
41 Syëlucho caycaj Tayta Diostaga
llapan shongunchïwan, maquinchïta chojpacur mañacushun.
42 Nogacunaga gam nishayquita mana rurarmi juchata rurashcä.
Chaymi gamga mana perdunamashcanquichu.* Isa. 55.7
Sámej
43 Fiyupa rabyashpayquimi gaticachämashcanqui.
Intëröpa chapacaycamashcanqui.
Mana cuyapaypami nogapa castacunataga wañuchishcanqui.
44 Nogacuna ruwacur mañacamushäta mana wiyanayquipämi pucutayman yagacuycurayqui.
45 Llapan runacunapa ñaupanchömi nogacunataga ganratano ricamashcanqui.
Pe
46 Llapan chiquimajcunapis nogacunapa contrallämi rimarcaycan.
47 Nogacunaga goyashcäpis mancharishallami.
Mana allicunallami chayamashapis.
48 Cuyashä siudäta illgaycächejta ricaptë weguëpis mayunörämi aywaycan.* Jer. 9.1; Lam. 2.11
Ayin
49 Mana chawaypami wagaycä.
Cushicuyta manami tarishächu
50 syëlucho caycaj Tayta Dios manaraj yanapämashancamaga.
51 Siudänëcho tiyaj jipashcuna ñacajta ricaptëmi
shongöcamaraj nanäman.
Tsade
52 Achäquita mana ashipaycaptillämi
chiquimajcunaga äbita charejnöpis prësu charimasha.
53 Cawaycajtami pösuman cacharpamasha.
Nircur uchcupa shimintana jatun läjawan chaparcamusha.
54 Chaura yacuga ushajpämi ultacarcamaran.
Chaymi yarparä «wañushänachari» nir.* Jon. 2.3–6
Qof
56 Mañacamushäta gamga wiyamashcanquimi.
57 Gayacamushäta wiyamashpayquimi yanapämarayqui.
Nircur «ama manchacuychu» nimarayqui.
Resh
58 Tayta Dios, gammi ima mana allipitapis chapämashcanqui.
Wañunäpitapis gammi salbamashcanqui.
59 Gamga ricaycanquimi imano mana alli ruramashantapis.
Gampaj alli cashanno arriglaycamay.
60 Gamga ricaycanquimi imata rurayta munaycämashantapis,
nogapa conträ imano rurananpaj yarpaycashantapis.
Shin
61 Tayta Dios, masqui wiyaycuy conträ imano rimarcaycashantapis,
imata ruramänanpaj yarpaycashantapis.
62 Chiquimajcunaga nogapa contrallämi imay örapis rimarcaycan.
63 Masqui sumaj ricay.
Ima rurashancunachöpis nogapäga shimincayllarämi riman.
Tav
64 Tayta Dios, paycunataga rurashanmanno castigaycuy.
65 Paycuna mana tantiyananpaj camacaycachiy.
Nircorga paycunata castigaycuy.
66 Tayta Dios fiyupa rabyasha gaticachaycuy.
Cay pachapita paycuna illgänanpaj camacaycachiy ari.
*3:2 Job 19.8
*3:3 Job 7.16–19; Sal. 88.7, 15–16
*3:4 Job 7.5; 30.30
*3:5 Job 19.12
*3:6 Sal. 88.5–6; 143.3
*3:7 Job 3.23; 19.8
*3:8 Job 30.20
*3:10 Job 10.16; 16.9
*3:13 Job 16.12–13
*3:14 Deut. 28.37; Job 30.9; Sal. 69.10–12; Jer. 20.7
*3:15 Job 9.18
*3:18 Job 17.15–16; 19.9–10; 30.19
*3:23 Éxo. 34.6–7; Sal. 136
*3:24 Sal. 16.5; 119.57
*3:25 Isa. 30.18
*3:30 Mat. 5.39
*3:32 Sal. 30.5; Isa. 54.7–8; 60.10
*3:38 Job 2.10; Isa. 45.7
*3:42 Isa. 55.7
*3:48 Jer. 9.1; Lam. 2.11
*3:54 Jon. 2.3–6
*3:55 Sal. 130.1–2