54
A nianga tupas no tunotuno nong i kure ira ut na ninge: da ting ira mangana gita ing da inge iakan ra ninge. Devit ga pit iakan ra ninge. I hinhinawas utano pakana bung ing ira tunotuno me Zif diet gate haan tupas Sol, diet gaam tange, “Devit i mun taar nalamin ta mehet.”
1 Nng 20:1God, halon iau ma no hinsaam.
Hamines ma no num dadas bia iau pai gil tiga nironga.
2 God, hadade ira nugu sinasaring.
Taram ira nianga mekai ra hagu.
3 Ira wasire diet tut na hinarubu ma iau.
Ira ngangarina tunotuno ing diet malok ise God, diet silsilihe no nugu lon.
4 Nng 37:17,24; Ais 41:10Tutun saakit bia God aie no nugu harharahut.
No Watong aie nong i la hatur hadadas tar iau.
5 Waak tar no saksakena na tapukus gasien baal taar ta diet ing diet tange hagahe iau.
Nu hatutun ing u te tange ma nu haliare diet.
6 Nam 15:3; Nng 50:14Watong, tano nugu sinisip at, iau ni tar tiga hartabar ukaia ho ugu.
Iau ni pirlat no hinsaam kanong i bilai.
7 Nng 34:6Kanong warah, u te halangalanga iau sukun ira nugu tinirih bakut,
ma ira matagu i te nes ira nugu ebar ing di bu bing diet.