Sam Kranzpnu-rlimz-nrade-esz'mz (76)
Gct Kx Aovxio Zvz
Nabz ne Asaf.
Kxaovxio
1 Lr Israel nzangiolr Gct.
X drtqde nzkrlz-zlwzlr.
2 Ma nyzde tuom Jerusalem,
Mz newz Saeon.
3 Mrlc dekc tqtwz-ngrde temz ngr lomr, toki r vea, x nipna scdr enqmi rdeng,
Mz nzodati-krde dalr nzotangr amrlx.
Ngrlrvea
4 Gct, nim Ngrlrvea kxmyatxlz zlwz.
X myaszlzq newz kcng bqnc tzmyatxlzng.
5-6 Gct ngr Jekop, mzli kc tqpnanati-ngrn enqmi rmqng,
Odatipeq zmatq ngr ncblo ngr vea nedrng x rblxbz badr nzotangr.
Ncblo amrlx kcng tzvoneng mz hcsi x hcsi nedrng nztatio-lxblrng x nzbzng.
Nibqtiq nidr amrlx x twzq dztudrng.
7 Delc leplz amrlx tzmyatitr-zlwz-ngrdr nim,
Murde nzngyakr drtwrm trpnzngr kx nayatrpz.
8-9 Gct, mzli kc tqpio-ngrme Heven nzvz-rbrkr lr nrlc,
Mz nzarlapx-krm kxnzobqszong,
Lr nrlc lcng amrlx nzmwxlr-zlwzng
X nzmnc-lrpitxng.
Ncblo Ngr Vea Nzmetxbzng Bade
10 Leplz amrlx sa naglqlz-ngrdr nim
Mz nzaovxio-krm enqmi rmqng kcng tzngyati drtwrdr nim.
Murde ncblo ngr vea kcng trnibqtiwqng tzmetxbzng bam,
Nzpipxbzlr kx nanginipedr ncblo nemqng.
11 Delc na-angidati-ngrgu da kx esalz-ngrbzku mz Yawe, Gct rgu.
X lr mrkzbleng kcng tzesotrpzng nartwzmqng dztudrng kxmrlzvxing mz Gct kc tzmyatitr zlwz, murde aovxiole nidr.
12 Murde nide kc tqavzole kxnzetung.
X king amrlx mz nrlc tzmwxlrti-zlwz-ngrdr nide.