Sam Kranzpnu-nzlvqn-nrade-esz'mz (56)
Mzli Kznike Mwxlr-ngrne, Abrtrpo Drtwrnge Bam
Nabz ne Devet kx yrbzle mz kxrmailz ngr dzbe kxnzngrng,
mzli kc tzlolvzngr lr Filistia nide mrkc mztea Gat.
Okatrp Ninge
1-2 Yawe, nayc mz drtwrm ninge.
Murde enqmi rngeng nzkqlu-zlwzng.
X vz zvz nzmaneuti-krdr ninge x nzatrkati-krdr ninge,
Murde nzrpilr na-aovxiolr ninge mz nzrnzlvzo-krdr ninge.
3 A' mzli kznike mwxlr-ngrne,
Abrtrpo drtwrnge bam.
4 Trmwxlrtiwxu zmatq ngrdr murde abrtrpo drtwrnge mz natqm,
Nim Gct kc tqglqlz-zvzx.
5 Yawe, enqmi rngeng vz zvz nzrtangr-krdr drtwr kx na-atrkati-ngrdr ninge,
Mz nzrkatr-zvz-krmlr nzkxpungr bange.
6 X nzyrlwr-lxblrng me nzmnc-kapq-ngrdr,
Mz nzaukzti-krdr ninge, murde nanibqlr ninge.
7 Bzkq rlr-ngrbzme nzdwa-krdr,
A' ayrplapxng mz zngya ngr drtwrm.
Abrtrpo Drtwrnge Bam
8 Krlz-angidrq nzrkrkxkr drtqnge.
Murde aplxtipxpeq nztaliokr drlemzke' amrlx, mz nzyrtio-krmlr mz buk scm.
9 X krlz-zpwxx kx mz nzkqle-krnge nim, sa navzme x enqmi rngeng nadwaszlr ninge.
Murde tu-zvzme mz nibrnge.
10-11 Trmwxlrtiwxu zmatq ngrdr murde abrtrpo drtwrnge mz natqm,
Yawe, nim Gct kc tqglqlz-zvzx, x brti drtwrnge natqm amrlx.
12 X sa na-alebo bam da kcng tqpibo,
Mz nzrka-krbo blz ngr nzawingr.
13 Awi mz nzarlapx-krme ninge mz mq enqmi rngeng.
Murde trpnzngr nznibq-krdr ninge,
X trmetxpou badr.
Gct nawztr-zvzbo bam, nzmnc-krnge mz nrlc.