2
1 Vano Yona nari mmirimani mohopa ahoswali aasukuruku Mwaneene Nluku 2 eeraka:
Mmahuvihoni kihokhuwelela Mwaneene Nluku
ni ahokaakhula.
Mmirimani mahiye kihokhuwa,
ni nyu nheewa ncu naka.
3 Nhokirihela mpaharini mapuro oowiisya cinenne
ni kihokhala oorukureriya ni maasi
ni mawimpi moolupale othene yaavira waculu waka.
4 Kihoona toko kihomwalaanihiya ni nyu.
Akaacuwela wiira kaanhala woona tho inupa enyu ittakattifu.
5 Maasi othene yahokikhuneela mpaka ukittiya iphumu;
ni ipahari yahokimirya
ni makukhu o mpaharini yahokivilikelela mmuru.
6 Kihokhuruwela mpaka vathi waya myaako,
mpaka ilapo ya atthu ookhwa
ni mikhora caya cahokitthukela mommo.
Nanso nyu nhokikumiha mapuro oowiisa,
nuukivaha ukumi;
Mwaneene Nluku; Nluku aka!
7 Upheelaka nnepa aka urimela
mi kihowuupuwelelani nyu, Mwaneene Nluku,
ni iswali caka cowela warinyu,
mpaani mwinyu moottakattifihiya.
8 Ale anaswalela anluku oohimaana
ahiyaka ikiriri ca Nluku.
9 Nanso mi kinaahala uwiipelani macipo oowunnuwihani
ni wuuvahani itthuvo.
Kinkopanka ile yookhuluvelihilyakani.
Woopwa ukhuma wa Mwaneene Nluku.
10 Vano Mwaneene Nluku ahoolumana ihopa wiira inraphye Yona, ni Yona ahoraphenya ucenkweni.