1 Yinni Gusunɔ u nɛɛ,

wunɛ Bɛtelehɛmu, Efɑrɑtɑɡibun wuu,

wunɑ ɑ piiburu bo Yudɑn wusu sɔɔ.

Adɑmɑ wunɛn min diyɑ kpɑro koo yɑri

wi u koo nɛn tɔmbu Isirelibɑ kpɑrɑ.

U wɑ̃ɑwɑ sɑɑ yee yellun di.

2 Adɑmɑ ko nɑ n ɡinɑ nɛn tɔn be deriwɑ ben yibɛrɛbɑn nɔmɑ sɔɔ

sere kurɔ wì u koo kpɑro wi mɑ, u kɑ mɑ.

Be bɑ kpikiru dɑ, bɑ koo ɡɔsirɑmɑ bu Isireli be bɑ tie deemɑ.

3 Kpɑ kpɑro wi nɑ bɛɛ nɔɔ mwɛɛru kuɑ mi,

u bɛɛ nɛn tɔmbu mɛnnɑ u kpɑrɑ mɑm mɑm

kɑ nɛ, Yinni Gusunɔn dɑm kɑ nɛn yiiko.

Win tɔmbu bɑ ko n wɑ̃ɑ bɔri yɛndu sɔɔ.

Kpɑ u yĩsiru yɑri hɑnduniɑn ɡoonu nnɛ ye sɔɔ.

4 Wiyɑ u koo kɑ bɔri yɛndu nɑ.

Asiriɡibu bɑ̀ n nɑ, bɑ bɛsɛn tem wɔri

bɑ duɑ sere bɛsɛn sinɑ kpɑɑrɔ,

sɑ ko bɛsɛn kpɑro be bɑ dɑm bo seeyɑ bu bu wɔri.

5 Ben tɑbu yɑ̃nun sɔ̃,

bɑ koo Asiriɡibu kɑ Nimuroduɡii be tɑɑre,

kpɑ bu sun wɔrɑ Asiriɡibu bɑ̀ n bɛsɛn tem wɔrimɑ.

6 Isireli be bɑ tiɑrɑ bɑ ko n wɑ̃ɑ tɔn dɑbinun suunu sɔɔ nɡe kɑko ɑrufɑɑniɡiru

te Yinni Gusunɔ u derɑ tɑ wɔrumɑ,

ǹ kun mɛ nɡe ɡurɑ ye yɑ nɛmɔ tɛɛru,

yɑ ǹ ɡɑ̃ɑnu yĩiyɔ tɔnun min di.

7 Isireli be bɑ tiɑrɑ bɑ ko n wɑ̃ɑ tɔmbun suunu sɔɔ,

kpɑ bɑ n dɑm mɔ nɡe ɡbee sunɔ ɡe ɡɑ wɑ̃ɑ ɡbeeku yɛɛn suunu sɔɔ,

ǹ kun mɛ yɑ̃ɑ ɡɔ̃ɔ sɔɔ.

Mi ɡɑ duɑ kpuro, ɡɑ rɑ yɑɑ kɑsukuwɑ ɡu mwɛ.

Goo kun mɑɑ kpɛ̃ u ɡu mwɑɑri.

8 Isirelibɑ, i seewo i bɛɛn yibɛrɛbɑ wɔri.

Kpɑ i bu ɡo mɑm mɑm.

9 Yinni Gusunɔ u nɛɛ,

tɔ̃ru ɡɑrɑ sisi tè sɔɔ kon bɛɛn dumi kɑ bɛɛn tɑbu kɛkɛbɑ kpeerɑsiɑ.

10 Kpɑ n bɛɛn wusu kɑm koosiɑ.

Kpɑ n bɛɛn ɡbɑ̃rɑnu suriri.

11 Kon bɛɛn dobo doboɡibu ɡo.

I ǹ mɑɑ ben dobo dobo wɑsi bɛɛn suunu sɔɔ.

12 Kon bwɑ̃ɑrokunu kɑ kpee ni i ɡirɑ kɔsuku.

I ǹ mɑɑ nu sɑ̃ɑmɔ.

13 Kon bũu wi bɑ mɔ̀ Asitɑɑten sɑ̃ɑ yerun dɑ̃nu wukiri.

Kpɑ n bɛɛn wusu kɔsuku.

14 Nɛn mɔru koo se,

kpɑ n nɛn dɑm sɔ̃ɔsi bwese ni nu ǹ mɑn mɛm nɔɔwɑmmɛn mi.