25
Yanapänanpaj Tayta Diosta mañacushan
David isquirbishan alabansa.
Álef
1 Tayta Dios, gammanmi mañacamö.
Bet
2 Tayta Dios gammanmi yäracamö.
Pengaycho canätaga ama camacächiychu.
Chiquimajcunapis ama cushipämächunchu.
Guímel
3 Gamman yäracamoj cäga ama pipis pengaychöga cachunchu.
Pengaychöga cachun mana ashipaycaptiqui contrayqui jatarejcuna.
Dálet
4 Tayta Dios, näniquita ricachimay.
Ruranäta munashayquino yachachimay.
He
5 Yachachimay ricachimay rasun cajta.
Gamllami canqui Salbamaj Tayta Diosnëga.
Vav
Imay örapis gamllamanmi yäracaycämö.
Zayin
6 Tayta Dios, para-simri cuyapäcoj cashayquita, alli cashayquita yarpaycuy ari.
Jet
7 Jucha rurashäcunata ichanga ama yarpaycuychu.
Mösu car mana allita rurashäta gongaycuyna.
Tayta Dios, fiyupa cuyapäcoj alli car
yarpaycamay ari.
Tet
8 Tayta Diosga allimi y juchaynajmi.
Chaymi juchayojcunataga alli nänita ricachenga.
Yod
9 Umildicunataga tantiyachinmi.
Allillata rurananpämi yachachin.
Caf
10 Tayta Diosga mandamintuncunata cumlejcunata
cuyapanmi, aunishantapis cumlinmi.
Lámed
11 Tayta Dios nogapa juchäga aypallami.
Gam alli cashayquita parlananpaj perdunaycamay ari.
Mem
12 Tayta Diosga payta rispitaj runata quiquinmi yachachin imano cawananpäpis.
Nun
13 Chaura cay bïdachöpis juc bïdachöpis allillami goyanga.
Wamrancunanami chacranwanpis quëdanga.* Deut. 11.8–9; Sal. 37.9, 11, 29; Mat. 5.5
Sámej
14 Tayta Diosga rispitajcunapa amïgunmi.
Parlacur aunishantapis musyachinmi.
Ayin
15 Imay örapis Tayta Diosllamanmi yäracuycä
ima mana allicunapitapis chapämaj captin.
Pe
16 Tayta Dios, cuyapaycamay ari.
Japallämi y llaquishami caycä.
Tsade
17 Shongöga masta mastami ushaycan.
Mana llaquicunäpaj yanapämay ari.
18 Masqui ricäramaypis.
Fiyupa llaquishami caycä.
Juchäcunapita perdunaycamay ari.
Resh
19 Masqui ricäriypis, imano aypallashi carcaycan chiquimajcunaga.
Fiyupa chiquimarmi wañuchimayta yarparcaycan.
Shin
20 Paycunapitaga salbaycamay ari.
Ama camacaycachiychu pengaycho canätaga.
Gamman yäracaycämuptëga ama camacaycachiychu wañuchimänanta.
Tav
21 Nogaga gamllamanmi yäracamö.
Allillata ruranäpaj tantiyaycachimay ari.
22 Tayta Dios, Israelcunataga llapan llaquicuycashanpita salbaycuy ari.