47
1 Ginu aminu kuupbam apbakngake katakza wesinong.
Bakngake ginda asainggamatake kaau pangenawan kuwan taike Anututane umana aknga yatangenatnong.
2 Dasingge, ninda Buyambam tapae asiknga gwautnim. Buyambamtapa waapa enane siknga yuak.
Ita kingu tupantapa yuke aminbamu kepna kepna yuaingu kakuya tasinggak.
3 Ita dongu kundutane umana kuupbam sandepakepuke pasiwan ninu enane yuamang.
Ngan, ita tasiwan dongu kundu ninde gepbiatang koyuaing.
4 Anututa keu komdu yawan yuwan ninde gwa nimukut. Ninu Jekopdane donga, Anututa musip gwaangu ninde natanimunggak.
Siwan keu waomde apbakngake yuamang.
5 Anutu yotna yekaune gwa kopbut.
Sike tapduu Buyambam tapata wa kopbut gwene aminu apbakngake kumzang ainggamatake pumu kuut puyapbing.
6 Ayok, ninda kau pangenake taike Buyambam tapatane umana yatangenatnim.
Ninda nisane kingu waapae apbakngake kau tainim.
7 Dasingge, Anutu king siknga yuke kepna kepna kuupbam kayuak.
Ninda unzingge kau taike umana aknga ayatangenatnim.
8 Anutu king siknga yuke dongu aminu kuupbam kayuak.
Ita king kapa ge inane sia king dakanane pukwike yuak.
9 Sike amindane tupan amin tapaapa aminu Abrahamdane Anutuna tawakaingkat unekan gatake yuaing.
Dasingge, kingu kepna kepna nana kuupbamu
aminu Anututanekan.
Ita king tupan tapa enane siknga yuak kapanin.