Pisarema 20
Kumutungamiri wokuimba. Pisarema raDhavhidhi.
1 Jehovha ngaakupindure paunotambudzika;
zita raMwari waJakobho ngarikudzivirire.
2 Ngaakutumire rubatsiro runobva panzvimbo tsvene,
uye akupe rutsigiro runobva kuZioni.
3 Ngaarangarire zvibayiro zvako zvose
uye agogamuchira zvibayiro zvako zvinopiswa.
Sera
4 Ngaakupe zvinodikanwa nomwoyo wako,
uye aite kuti urongwa hwako hwose hubudirire.
5 Tichadanidzira nomufaro pakukunda kwako,
uye tichasimudza mireza yedu muzita raMwari wedu.
Jehovha ngaakupe zvose zvawakakumbira.
6 Zvino ndava kuziva kuti Jehovha anoponesa muzodziwa wake;
anomupindura ari kudenga rake dzvene,
nesimba rokuponesa kworuoko rwake rworudyi.
7 Vamwe vanovimba nengoro, vamwe namabhiza,
asi isu tinovimba nezita raJehovha Mwari wedu.
8 Vanowisirwa pasi namabvi avo vagowa,
asi isu tinosimuka tigomira takasimba.
9 Haiwa Jehovha, ponesai mambo!
Tipindurei patinodana!