121
Inma nyangatjaya Jerusalemalakutu ankula inkakatipai.
1 Nganaluṉitju alpamilalku? Tjinguṟuṉa murpu nyara puḻkanya ira-nyakula tjapilku, panya paluṟu tjana tiṯutjara kuṉpu ngaṟala iritiringu. Tjinguṟuṉi paluṟu tjana ngayunya alpamilalku.
Palu wiyampal nyangatja. Wiya alatjiṯu.
2 Panya Mayatja Godaluṉitju ngayunya alpamilalku, panya paluṟu kutjupa kutjupa uwankara palyaṉu murpu tjuṯa kuḻu.
3-4 Uwa mulapa Mayatjalu uwankara rawangku kanyilpai pakuringkula kunkunarinytja wiyangku.
Munulanya aṯunymankupai punkantjaku-tawara.
Uwa, paluṟu nganaṉanya Israelkunu tjuṯa kunkunpa wiyangku aṯunymankupai.
5-6 Mayatjalulanya anga-kanyilpai panya puṉu wiltja puḻkuṉpa wiṟu ngaṟapai kalanya tjiṉṯungku puṯu kampapai, palu puṟunytju.
Munu paluṟu mungangka kuḻu anga-kanyilpai kinaṟa panya wiya ngaṟanyangka.
7 Ka Mayatja Godalulanya aṯunymaṟa kanyini panya kutjupa kutjupa uwankarangku kurantjaku-tawara.
Uwa mulapa nyangatjalanya aṯunymananyi wankaṟu nyinanytjaku.
8 Panya paluṟulanya tiṯutjarangku ilangku nyakula kanyini ngurangka nyinanyangka munu ngura parari ankunyangka kuḻu.
Munulanya tiṯutjarangku alatjiṯu aṯunytju kanyiṟa iritiriku.