Sam Kratrtqki-esz'-nzpnu-pwx-nrade-nzlvqn (145)
Zluli X Zmatq Ngr Yawe
Nabz ngr nzrglqpxngr ne Devet.
Kzdq Nabz Ngr A, B, C
1 Awi-zvzbo bam mz nzglqpx-krnge nim,
Murde nim Gct rnge x mnclzbo bam.
2 Bilvzx nim mz nzawi-krbo bam.
X sa naglqpx-zvzx nim mz zbq kang kqlu.
3 Clveq nrlc mz zmatq ngrm kx trpnzngr kxrkrlz.
Yawe, myatxlz-esz'ngrn x takitrde nzrglqlzngr nim.
4 Doa nemqng sa nayapwxti-zvzbzlr mz doa nedrng,
Da kcng tqetuting tqmatq tqaletiqng.
5 Eu, x sa na-aoti-zvz-kzx drtwrnge nzwz-krmqng kxmrlzvxing,
X nzetu-esz'ngr-krm mz zmatq.
6 Gct, sa nayapwxtipx leplz da kxnzkctipxng kcng tqwz-ngrn.
X sa napipxx nzmyalz-esz'ngr-krm.
7-8 Ipq-aniq leplz murde yc mz drtwrm nidr.
Murde nivz lrm x nzaodu-krm tqyc tqyc.
Jzsiq leplz mz nztubqngr x sa na-angrlvzlr nim.
Sa nalepxlr nrpa ngr nzmrlz-esz'ngr-krm.
9 Kxetu, mrlztiq leplz amrlx,
X yc zlwz mz drtwrm doa amrlx kcng tqwz-ngrn.
10 Leplz nemqng amrlx sa na-awibzng bam,
X doa amrlx kcng tqwz-ngrn sa naglqlzlr nim.
11 Mz nrlc tulvzo, sa nayapwxtipxlr nzmyalz-esz'ngr-krm,
X nzetukr zmatq ngrm mz nzngini-krm king.
12 Nrpa ngr nzwz-krmqng etu, mz da kxmrlzting kcng tqwz-ngrn mz nzaclve-krm,
Sa nakrlz leplz amrlx.
13 Obqom mz nrlc mz nzaclve-krm kc tqyc tqyc,
X nzngini-krm king tqvzpe tqvzpe.
Pipx-zvzq natq kx na-angidatiq,
X aelwapx-zvzq nivz lrm mz da amrlx kcng tqaleq.
14 Rngiscm zmatq kx okatrle leplz kcng tzkxpung,
X axplrle nabz leplz kcng tqtalvzo.
15 Sa narkabzme dakxnzng mz kxnzlung amrlx,
Mz nzmnc-xgle-krdr nim mz da amrlx.
16 Tekqtrq nzbrtale-krdr mz nzakrlc-krbzme nelzdr,
X drtwrdr esatxpx zpwx.
17 Vz zvz nzale-krm da kx tubq-esz'ngr,
X aelwapx-zvzq nivz lrm mz da amrlx kcng tqaleq.
18 Wxbu-aepztrpzme mz krkcng tzkqlelr nim,
Mz nzbrti-zpwxkr drtwrdr nim.
19 Xlrq nzyrnikr leplz kcng tzamrluelr nim,
X ayzlubzme natqdr mz nzarlapx-krm nidr.
20 Yawe, tu-zvzbzme mz nibr leplz kx nzmrlztilr nim,
A' odati-atwrnr-ngrn kxdrka'-ngrng.
21 Zbq kalvz sa naglqlzx nim.
X krkcng tzlung tqwz-ngrn, nzangio-krdr nim tqvzpe tqvzpe.