Sam Kranzpnu-rtqmz-nrade-esz' (81)
Krkcng Naglqlzlr Ninge, Navz-nqblq-kzlr Natqnge
Nabz ne Asaf kx yrbzle mz kxrmailz ngr dzbe kxnzngrng.
Naglqpxku Gct
1 Namalqlvzku Gct murde nide lrpalvc nyzgu.
Nangr-katobzku mz Gct ngr Jekop.
2 Na-ayrnitiku gita x ukzlele x na-ayrlewzku nrasrpwale
Mz nzngr-krbzku bade nabz kxyrlvi.
3 Trpu navxutr mz nzrkqlengr leplz mz zbq kxnzetuting,
Mz zbq ngr nzpokr temz x zbq ngr nzyc-atwrnr-krde.
4 Murde krlc natq kx kam Gct bagu, nigu lr Israel,
Mz nzka-krbzle loukxtr scde mz nqvi lr Jekop.
5 Pipxbzle mz melrmqgung, nidr neidu lr Josip,
Mzli kc tqatrkati-ngrde lr Ijipt.
X ninge Asaf, mzli kc nzryr-krnge tqkrlzpe-ngrbzle me tavau,
Xlrx kc natq kx trglxwxu, a' mz nibrde sc tqglx-atex.
6 Rpimle kx, “Sc tqrkatxobo da kxmrlepu kcng tqglqamu.
X aopxbo drtqmu mz nzwz-kato-krmu Ijipt.
7 Mzli lc tqkxpu-ngrnamu, kqleamu ninge, x sc tqarlapxpex nimu.
X sc tqokatrpele nimu tqvzmc mz bzlrmei.
X ni-kznge kc tqabzle nimu mrkc lzke
Mz aulz ngr Meriba.”
Navz-nqblqku Natqde
8 “Naxlrmamu da kx narngidrlvz-ngrbo bamu, kx leplz nengeng.
X nalalztqmamu mz natqnge.
9 Bzkq angioamu kx trngiu Yawe Gct angidr,
Mz nzyrngzo-krbzmu badr.
10 Murde ninge Yawe, Gct rmu, ✡ Nzrlaszngr 20:2; Lou Kcpwz 5:6
Kc tqvzmile nimu mz nzrlasz-krmu Ijipt.
X sa na-amrlzx nimu mzli kx abrtrmamu drtwrmu bange.
11 Kxmule-esz', a' tryrlq-angidrwamuu natqnge, kx leplz nengeng,
Mz nzpxtxpx-krmu ninge.
12 Mz nzmu-krde lcde, rlrpx-ngrbo bamu nzvz-nqblq-krmu narmu,
X nzale-krmu nike suti drtwrmu.
13 A' sutitx zlwz drtwrnge kx nalalztqmamu bange, kx leplz nengeng,
Mz nzlolvz-amqngi-krmu nqmq krnge.
14 Murde na-aovxiobo enqmi rmung
Mz nzota-krgr badr.
15 X Krkcng tzpxtxpx-ngrdr ninge, sa narnrcng mz nzyrngzo-krmlr bange,
X na-ayrplapx-alox nidr.
16 A' na-amrlzx nimu leplz nengeng,
Murde na-abrtz-zlwzamu mz nzmnc-zpwx-krmu.”