Sam Kranzpnu-pwx-nrade-li x Kranzpnu-pwx-nrade-tq (42 x 43)
Kxmule-esz' Nabznge Talvzo
Nabz ne nqvi lr Kora.
1 Gct, nzmingrti-zlwzkr drtwrnge nim
Apule animol kc drtwrde tqbrlxkz mqde lue.
2 Nim Gct kc tqlu x nzsutikr drtwrnge nim apule nzbrlxkztikr drtwrnge lue kxbao.
?Myx mzli kx naxngi-ngrbo nzmnc-krme bange?
3 Mz zbq kang kqlu yrni-zvzx x mnqtxpwo drlemzke' kx piz.
A' enqmi rngeng nzyrpalelvzlr ninge, nzrpimlr kx, “?Memule Gct rm trokatrpe-ngrdeu nim? ?Bzpe?”
4 Gct, mzli ka drtwrnge yrnibutx zlwz. A' dcpx mou mz drtwrnge mzli kc ena tqmailztr-ngrne leplz Mangr-nzangiongr nim.
Mzli lcde abrtz-zlwzkr x ngr-katokr mz nzglqlz-krgr nim.
5 Kxmule-esz' nabznge talvzo x nelznge vzdzm,
A' sa na-abrtxtrpwo drtwrnge bam.
Murde naglqlz-mou-ngrne nim kalr,
Mzli kc na-arlapxq ninge.
6-7 Gct rnge, mzli boipe trnzkrlzpe-krpou Israel.
?Memule tqpulio-zvz-ngrme bange nzkxpungr mz nzapu-krde lue kxvo?
Nzvzdz-krm nelznge vz-ebirnrpe-ngrm bange apule nrc kcng tzyrplalvzolr ninge.
X nztalvzokr nabznge xplr-zlwzpe apule nzyrpukr lue kxtalio mz nabzde.
X ebio ngr srkau amrlx kcng tqatwzlr-ngrme nzalxlvrtine-zvzlr ninge.
A' nadcpx mz drtwrnge da kcng tqmyalz tqaleq Israel,
Mrkc tqyrlengr LueJodzn x tqycngr Newz Hemon x Newz Misa.
8 Murde vz zvz nzpulio-krme nivz lrm mz zbq kang kqlu.
X ngrbo bam mz nrlckxbq vzmi nzkrka'-krnge murde nim Gct kx rkam nzlungr bange.
9 Gct, nim butqbr nyznge. ?Memule tqmrbrtitrpengr drtwrm ninge?
?X memule tqkxpu-zvz-ngrne
Mz nzaetqti-krm enqmi rngeng drtqnge?
10 Nzrpi-zvzmlr bange kx, “?Memule Gct rm trokatrpe-ngrdeu nim? ?Bzpe?”
X sc tqvz zvz nzngzlilvzti-krdr ninge natq kxtrka.
11 Kxmule-esz' nabznge talvzo x nelznge vzdzm,
A' sa na-abrtxtrpwo drtwrnge bam.
Murde naglqlz-mou-ngrne nim kalr,
Mzli kc na-arlapxq ninge.