Sam Krarlimz (7)
Yawe Pipxle Nztubqkr Leplz O Nzvz-rbr-krdr
Nabz ne Devet, kx ngr-ngrbzle mz Yawe,
mzli kc Kus, ncblo ngr nqvi lr Benjamin, tqatrkati-ngrde nide.
Vz-rbrx O Trtingr
1 Yawe, Gct rnge, arlapxbz ninge mz mq ncblo kcng tzayotilr ninge.
Murde nim me rlakitrx.
2 Murde ma tzkivztibzlr nrkrdrtqnge mz nzapu-krdr laion,
X nzkilznedr ninge me trpnzngr kx naokatrle ninge.
3 ?Yawe, Gct rnge, nike ale-rbrx?
?Mqnge alele dq da kxtrtubqu?
4 ?Myx kxmule, alebo dq da kxtrka mz kztengeng?
?O atrkatix dzbede negrng mz nzarlapx-krnge enqmi rgrng?
5 Nzmu kx tqmule lcde, sa tqmrlz nzrlr-krbzme ninge mz mq enqmi rngeng,
Mz nzmaneuti-krdr ninge mz nzapu-krdr kuli x nzlolvz-krdr ninge.
X natabrtilr ninge x narnzbrtiolr ninge mz drtc',
X na-ayrbqtxdr namz rnge elr.
Aryrplapx Kxnzvz-rbrng
6 Yawe, tumilzm zngya x aesaki leplz kcng tzngyati drtwrdr ninge.
Okatr ninge murde yrlqpeq mzli r nzpipx-krm nztubqkr leplz amrlx o nzvz-rbr-krdr.
7 Ayrlwr leplz mz nrlc tulvzo murde natu-ngalelvzlr nim,
Mz nzaclve-krm nidr Heven.
8 Yawe, nim kx rpibz mz leplz kx nztubqng o nzvz-rbrng.
Pipxbz mz leplz kx mnctr-zpwxpebo bam murde nabznge opx x tubq.
9 Aesaki nqmq krdr kxdrka'-ngrng x tu-zvzbz mz nibr kxnztubqng.
Murde nim kxtubq-esz'ngr x obqplxq nabz x nzvzkr nardr.
10 Gct kxmyatxlz, nim temz ngr lomrnge kc tqyrputrngr nipna.
X arlapxq krkcng nabzdr tqlq.
11 Tubqq mz nzryrlq-krm drtwr.
X pipxq kx takitrde nzayrplapxngr kxnzvz-rbrng.
Tekqtr Nqmq Nr Drtwrm
12-13 Nzmu kx trnztekqtrlru nqmq krdr kxtrka, sa nayrlamzq toki r vea scm,
X nalalvzq popz' scm mz nzpnz-krm nidr mz nipna kxngc.
14 Kxdrka'-ngrng nzpetilr rtq da kxtrka.
X lvclzm nc nzodatingr. X nrade yrlqbzle ngi nzpokiangr.
15 Trtxki kc tzamwiti-ngrdr leplz,
Sa naprtz-mou-ngrdr.
16 Drtwr ngr nzkxpungr kcng tzesabrti-ngrdr leplz, sa nangq-moulr nidr.
X nzodangr kc tzalelr sa naetq-moungr drtqdr.
17 Nangrx mz nzglqlz-krnge Yawe kc tqmyalz-esz'ngr!
X na-awibo bade murde tubq-esz'ngr!