នាវកោរាញឞ្រាសងើយនាវតឹមរាង្លាប់មហែ យោហាន 5

ឞ្រាសយេឆូ ជានឞាសឞូនុយ្សរាវែន

1 ឞើសកើយនៃគែសនាវញេតបុនផូងអីឆ្រាអែល ជេសរីឞ្រាសយេឆូ ហាន់តាប៝នក្វ៝ង់យេរូឆាលឹម ។ 2 តាប៝នយេរូឆាលឹម នៃ ទាច់កេងមពោងមពេរលាប់ត្រោមប៝នអីឞូរាញា «មពោងឞែឞ្យាប់ » គែសទូមល៝ម់ទាកងលៅអីឞូជាន តានាវងើយហេឞ្រើ លាស៖ «ទាកងលៅបេថែសដា » រ៝ៈមែងទាកងលៅអីនៃគែសព្រាម់អឹនទ្រីង។* 3 តានទ្រីងអីនៃគែសឞូនុយ្សជីអ៝ក់ងាន់គុឞិច អាបាៈឞូនុយ្សចែសមាត់ អាបាៈឞូនុយ្សក្វែត នទ្រែលមាអាបាៈឞូនុយ្សរាវែនជ៝ង់រាវែនតី។ [ខាន់ពាង់គុក៝ប់ទាកអីនៃញច៝ច់‌ 4 យ៝រលាសជ៝ៈៗទូតឹ គែសតោងពារ់កោរាញឞ្រាសជុររាចូលទាកងលៅអីនៃអ៝ន់ញច៝ច់។ លាសឞូម៝សអីជុរល៝រតាទាកងលៅអីនៃ នាវជីតាឆាក់ពាង់ឞាសរ៝ ឞ៝លលាសគែសនាវជីទុតហោកាដោយ។] 5 តានតុកនៃគែសទូហ្វេឞូក្លោជីលែៈជ៝ៈ ៣៨ នាម់។ 6 ឞ្រាសយេឆូ ឆៃពាង់ឞិច គឹតលាសពាង់គុតានតុកនៃលែៈជ៝ៈនាម់ ឞ្រាសយេឆូ លាសមាពាង់៖ “មៃអុចឞាសដ៝ង់?” 7 ឞូនុយ្សជីនៃអើស៖ “អើកោរាញ គ៝ប់មោគែសអោសឞូនុយ្សឆើមពឺតេៈតាទាក។ នោកគែសទាកញច៝ច់ លាសគ៝ប់ញចោមាជុរ លែៈគែសឞូជុរត៝ត់ល៝រតាទាកនៃ”។ 8 ឞ្រាសយេឆូ លាសមាពាង់៖ “ទ៝ក់ឞ្រោៈហ៝ម់ ញអោតងក៝ៈឞិចមៃនៃ”។* 9 ជេសរីឞូក្លោអីនៃទោមាឞាសរ៝ ពាង់ទ៝ក់ញអោតងក៝ៈឞិចពាង់នើមអីរីហាន់ឞ្រោៈ។ នារនៃជេងនារឆាបាត់ អីនាររាលូផូងអីឆ្រាអែល ‌* 10 នទ្រីទឹងមពោលកោរាញផូងអីឆ្រាអែល លាសមាឞូក្លោអីនៃ៖ “នារអ្យានារឆាបាត់ តឹងនាវវៃផូងឞ៝ន់មោទីអោសមាមៃឞ្រោៈញអោតងក៝ៈកើតនៃ”។* 11 ពាង់អើសមាខាន់ពាង់៖ “ពាង់អីតើមជានឞាសនាវជីគ៝ប់ ពាង់លាសមាគ៝ប់៖ «ឞ្រោៈហ៝ម់ ញអោតងក៝ៈឞិចមៃនៃ»”។ 12 ខាន់ពាង់អោបពាង់៖ “ឞូម៝សដាៈមៃពឺងក៝ៈឞ្រោៈកើតនៃ?” 13 យើនមាឞូក្លោអីលែៈឞាសជីនៃ ពាង់មោអោសគឹតនាល់ឞូម៝សជានអ៝ន់ពាង់ឞាស នអ៝ប់មាឞ្រាសយេឆូ លែៈហាន់ឞើសនតុកនៃ ជ៝យមោហោមឆៃ យ៝រមានតុកនៃគែសឞូនុយ្សអ៝ក់ដ៝ង់។

14 ត៝ត់ឞើសកើយនៃ ឞ្រាសយេឆូ ឆៃឞូក្លោអីលែៈឞាសជីនៃនើសគុតាជ៝ង់គូងញីសជានឞ្រាសមាកោរាញឞ្រាស។ ឞ្រាសយេឆូ លាសមាពាង់៖ “អាបៃអ្យានាវជីមៃលែៈឞាស មៃលើយហោមអោសជានតីស ក្លាចលាសនាវអ្យើសគែសតាមៃលើហោរាលាវអើមជឹត”។* 15 ជេសរីឞូក្លោអីនៃហាន់មឞើសងក៝ចមាមពោលកោរាញផូងអីឆ្រាអែល អ៝ន់ឞូគឹតឞ្រាសយេឆូ អីឞូនុយ្សជានអ៝ន់ពាង់ឞាសរីនើស។ 16 កើតនទ្រីទឹងមពោលកោរាញផូងអីឆ្រាអែល នតើមជានជេរមាឞ្រាសយេឆូ អាចមាពាង់ជាននទើអីនៃតានារឆាបាត់ ។ 17 ឞ្រាសយេឆូ លាសមាខាន់ពាង់៖ “ឞឹគ៝ប់ហោមជានការនឹងអាប់នារនហ៝មាត៝ត់នារអ្យា គ៝ប់ជានការកើតពាង់នៃដ៝ង់”។ 18 ត៝ត់មាតាង់នាវឞ្រាសយេឆូ ងើយកើតនៃ មពោលកោរាញផូងអីឆ្រាអែល លើមាហោអុចងខឹតពាង់ជឹត មោទើនអោសអាចមាពាង់ជាននទើអីនៃតានារឆាបាត់ ទើម អាចមាពាង់ក្វាល់កោរាញឞ្រាសជេងឞឹពាង់នើម កើតនទ្រីកើបអេងឆាក់ពាង់នើមតឹមឞានមាកោរាញឞ្រាស។*

ឞើសតាៈនាវទើយឞ្រាសយេឆូ

19 ឞ្រាសយេឆូ លាសមាខាន់ពាង់៖ “គ៝ប់លាសនហេលនានេៈងាន់មាខាន់មៃ មោគែសអោសនទើគ៝ប់អីក៝នកោរាញឞ្រាសទើយជានអេងតាៈឞើសឆាក់គ៝ប់នើម គ៝ប់ជានម៝សនទើគ៝ប់ឆៃឞឹគ៝ប់ជានទើម។ យ៝រលាសម៝សនទើឞឹគ៝ប់ជាន គ៝ប់អីក៝នពាង់ជាននទើអីនៃដ៝ង់។* 20 ឞឹគ៝ប់រ៝ង់មាគ៝ប់អីក៝នពាង់ហោងាន់ ពាង់ញហើទឹងលែៈនទើពាង់ជានអ៝ន់មាគ៝ប់អីក៝នពាង់ឆៃ ពាង់មរាញហើដ៝ង់នទើពាង់ជានក្វ៝ង់រាលាវមាអ្យាជឹតអ៝ន់មាគ៝ប់អីក៝នពាង់ នទ្រីទឹងខាន់មៃនទ្រ៝ត់ហីសរាហ៝ល់។* 21 ឞឹគ៝ប់ជានអ៝ន់ឞូនុយ្សលែៈខឹតទ៝ក់រេស កើតនៃដ៝ង់គ៝ប់អីក៝នពាង់អ៝ន់នាវរេសមាឞូម៝សគ៝ប់អុចអ៝ន់។* 22 ឞឹគ៝ប់មោអោសផាតទោយ្សឞូនុយ្ស យ៝រលាសនាវទើយផាតទោយ្សអីនៃលែៈពាង់អ៝ន់តាគ៝ប់អីក៝នពាង់‌* 23 គៃមាអ៝ន់ទឹងលែៈឞូនុយ្សយើកមាគ៝ប់អីក៝នពាង់ តឹមឞានមាឞូយើកមាឞឹគ៝ប់ដ៝ង់។ ឞូម៝សមោអោសយើកមាគ៝ប់អីក៝នពាង់ ឞូនុយ្សអីនៃមោដ៝ង់យើកមាឞឹគ៝ប់នើមអីតើមញជ្វាល់គ៝ប់”។*

24 “គ៝ប់មឞើសនហេលនានេៈងាន់មាខាន់មៃ ឞូម៝សអ្យាត់នាវគ៝ប់ងើយ ជេសរីញឆីងមានើមតើមញជ្វាល់គ៝ប់ ពាង់អីនៃគែសនាវរេសនហ៝រ៝ មោហោមអោសទើននាវតេៈទោយ្ស ពាង់លែៈក្លាយ្សឞើសនាវខឹត គែសនាវរេសនហ៝រ៝។* 25 គ៝ប់លាសនហេលនានេៈងាន់មាខាន់មៃ ត៝ត់ទីនារនៃតៃ ជេងអាបៃអ្យារ៝ ឞូនុយ្សអីតឹមឞានមាខឹតយ៝រមាខាន់ពាង់ងខាសទូឞើសកោរាញឞ្រាស ខាន់ពាង់អីនៃតាង់ឞ៝រ់គ៝ប់អីក៝នកោរាញឞ្រាស ជេសរីឞូម៝សតាង់ឞ៝រ់គ៝ប់គែសនាវរេសនហ៝រ៝។ 26 ឞឹគ៝ប់នើមជេងតើមនាវរេស តឹមឞានកើតនៃដ៝ង់ពាង់អ៝ន់គ៝ប់អីក៝នពាង់ជេងតើមនាវរេស។* 27 លែៈពាង់អ៝ន់ដ៝ង់នាវទើយផាតទោយ្សតាគ៝ប់អីក៝នពាង់ យ៝រលាសគ៝ប់អីក៝នឞូនុយ្សតាៈឞើសកោរាញឞ្រាស។ 28 លើយអោសខាន់មៃនទ្រ៝ត់ហីសរាហ៝ល់នាវអ្យា យ៝រលាសត៝ត់ទីនាររីតៃ ទឹងលែៈឞូនុយ្សលែៈខឹតតាង់នតែសឞ៝រ់គ៝ប់ទាទេ‌* 29 ជេសរីទ៝ក់រេស គៃមាឞូម៝សជានអ្វែសទើននាវរេសនហ៝រ៝ យើនមាឞូម៝សជានអ្យើស ពាង់ទ៝ក់រេសដ៝ង់ តីសមាទើននាវតេៈទោយ្ស”។*

នាវខ្លៃមានាវទើយឞ្រាសយេឆូ

30 “គ៝ប់មោអោសទើយជានទូនតីលនទើតាៈឞើសឆាក់គ៝ប់នើម នាវគ៝ប់ផាតទោយ្សនៃ គ៝ប់ជានតឹងនាវឞឹគ៝ប់លាសមាគ៝ប់ នាវគ៝ប់ផាតទោយ្សនៃជេងទី យ៝រលាសគ៝ប់មោអោសតឹងនាវគ៝ប់នើមអុច គ៝ប់តឹងនាវឞឹនើមអុចទើម ពាង់តើមញជ្វាល់គ៝ប់។* 31 លាសទូហ្វេគ៝ប់ទើមមឞើសងក៝ចតានាវខ្លៃគ៝ប់នើម នាវមឞើសងក៝ចអីនៃមោអោសគែសនាវខ្លៃ។ 32 យើនមាគែសឞឹគ៝ប់អ៝ន់ឞូគឹតមានាវខ្លៃគ៝ប់ ជេសរីគ៝ប់គឹតលាសនាវពាង់អ៝ន់ឞូគឹតជេងទីងាន់”។

33 “ខាន់មៃលែៈដាៈឞូហាន់អោបយោហាន-បាប់តែម ជេសរីនាវពាង់មឞើសងក៝ចមាគ៝ប់ជេងទីងាន់។* 34 យើនមាគ៝ប់គ៝ប់មោអោសកើបខ្លៃនាវឞូនុយ្សមឞើសងក៝ចមាឆាក់គ៝ប់គ៝ប់ងើយកើតនៃ គៃមាងកាសតោរខាន់មៃមានាវយោហាន-បាប់តែម មឞើសងក៝ច គៃមាអ៝ន់ខាន់មៃញឆីងមាគ៝ប់ ជេសរីគែសនាវរាក្លាយ្ស។ 35 យោហាន-បាប់តែម ជេងតឹមឞានមាអុញឆាគេងហីតអាង ខាន់មៃនើសអុចគុរាម់មអាកទោលពាង់គែសអាងទូប្ល៝ត់អីនៃ។ 36 គ៝ប់លែៈគែសនទើមឞើសងក៝ចមានាវខ្លៃគ៝ប់ នទើអីនៃខ្លៃរាលាវមានាវមឞើសងក៝ចយោហាន-បាប់តែម ។ នទើទឹងលែៈអីឞឹគ៝ប់អ៝ន់ គ៝ប់ជានអ៝ន់ជេស ជេងនទើអីគ៝ប់ហោមជាន នទើអីនៃអ៝ន់ឞូគឹតអីឞឹគ៝ប់នើមតើមញជ្វាល់គ៝ប់ងាន់។* 37 ឞឹគ៝ប់អីតើមញជ្វាល់គ៝ប់ពាង់អ៝ន់ឞូគឹតមានាវខ្លៃគ៝ប់។ យើនមាទូឞោងនាវរេសខាន់មៃមោអោសតាង់ឞ៝រ់ពាង់ មុសមាត់ពាង់ខាន់មៃមោឆៃដ៝ង់។* 38 ជេសរីនាវងើយកោរាញឞ្រាសមោគែសអោសញអោតតានូយ្សនហ៝ម់ខាន់មៃ យ៝រលាសខាន់មៃមោអោសញឆីងមាពាង់អីតើមញជ្វាល់គ៝ប់។ 39 ខាន់មៃញឆ្រោយ្សអ្វាញ់នាវកោរាញឞ្រាសងើយ យ៝រមាខាន់មៃមឹនលាសគែសនាវរេសនហ៝រ៝តាៈឞើសនាវអីនៃ។ ជេសរីនាវកោរាញឞ្រាសងើយអីនៃមឞើសងក៝ចមានាវខ្លៃគ៝ប់‌* 40 តីសមាខាន់មៃរាលាច់ហាន់តឹងគ៝ប់គៃមាគែសនាវរេសនហ៝រ៝”។

41 “គ៝ប់មោអោសឆ៝ៈនាវរានេតាៈឞើសឞូនុយ្ស‌ 42 យ៝រលាសលែៈគ៝ប់គឹតជេសតានូយ្សនហ៝ម់ខាន់មៃមោគែសអោសនាវរ៝ង់កោរាញឞ្រាស។* 43 គ៝ប់វាច់តារាញាឞឹគ៝ប់ យើនមាខាន់មៃមោអោសរ៝មគ៝ប់។ លាសគែសទូហ្វេឞូនុយ្សជឹតវាច់តារាញាឆាក់ពាង់នើម ខាន់មៃរ៝មពាង់រ៝។* 44 ខាន់មៃអុចឆ៝ៈទើមនាវរានេតាៈឞើសនទ្រាង់ខាន់មៃនើម យើនមាមោអោសជ៝យនាវរានេតាៈឞើសកោរាញឞ្រាស នទ្រីទឹងខាន់មៃមោដ៝ង់អុចញឆីងមាគ៝ប់។* 45 ខាន់មៃលើយតានអោនលាសគ៝ប់អ្យានតោននាវតីសខាន់មៃតាឞើសនាប់ឞឹគ៝ប់តៃ។ ខាន់មៃនអោនលាសមោឆេ អីចែឞ៝ន់កាល់អែនើសកើលខាន់មៃតាឞើសនាប់ឞឹគ៝ប់តៃ យើនមាពាង់ជេងឞូនុយ្សអីនតោនខាន់មៃ។* 46 លាសខាន់មៃអ្យាត់ងាន់នាវពាង់ញចីស ខាន់មៃអ្យាត់ដ៝ង់មានាវគ៝ប់ងើយ យ៝រលាសនាវពាង់ញចីសអីនៃងើយមាគ៝ប់។* 47 យើនមាលាសខាន់មៃមោអោសអ្យាត់មានាវពាង់ញចីសអីនៃ អាមើមខាន់មៃអ្យាត់ដ៝ង់មានាវគ៝ប់ងើយ?”*

*5:2 ៥:២៖ នេហ ៣:១, ៣២; ១២:៣៩

*5:8 ៥:៨-៩៖ មក ២:១០-១២

*5:9 ៥:៩៖ យហ ៥:១៦; ៧:២១-២៣; ៩:១៤

*5:10 ៥:១០៖ នង ២០:៨-១១; យេរ ១៧:២១-២២

*5:14 ៥:១៤៖ យហ ៨:១១

*5:18 ៥:១៨៖ យហ ១០:៣០-៣៣; ១៩:៧

*5:19 ៥:១៩-២៣៖ យហ ១:៣៤

*5:20 ៥:២០៖ យហ ១:៥០

*5:21 ៥:២១៖ នវ ៣២:៣៩; ១ឆា ២:៦; យហ ១១:២៥

*5:22 ៥:២២៖ មថ ២៥:៣១-៣២; ការ ១០:៤២

*5:23 ៥:២៣៖ ដាន ៧:១៣-១៤; ផល ២:១០-១១; ១យហ ២:២៣

*5:24 ៥:២៤៖ យហ ៣:១៦; ៦:៤៧; ៨:៥១

*5:26 ៥:២៦៖ យហ ១:៤

*5:28 ៥:២៨៖ ១តេ ៤:១៦

*5:29 ៥:២៩៖ ដាន ១២:២; មថ ២៥:៣១-៤៦; នតម ២០:១១-១៥

*5:30 ៥:៣០៖ យហ ៤:៣៤

*5:33 ៥:៣៣៖ យហ ១:២៦-២៧, ៣២-៣៤; ១៤:៦

*5:36 ៥:៣៦៖ យហ ១០:២៥, ៣៨; ១៤:១០-១១

*5:37 ៥:៣៧៖ យហ ១:១៨

*5:39 ៥:៣៩៖ លក ២៤:២៧, ៤៤; ២តម ៣:១៥-១៦; ១ពេ ១:១០-១១

*5:42 ៥:៤២៖ លក ១១:៤២

*5:43 ៥:៤៣៖ យហ ១:៩-១១

*5:44 ៥:៤៤៖ យហ ១២:៤២-៤៣; មថ ២៣:៥-៧

*5:45 ៥:៤៥៖ នវ ៣១:២៦-២៧

*5:46 ៥:៤៦៖ នវ ១៨:១៥, ១៨

*5:47 ៥:៤៧៖ លក ១៦:៣១