Salmo 26
26
Kararag Di Nalinteg Ay Ipogaw
1 Ikeddeng mo koma ay magay basol ko,
tan say am-amagek din kosto
ya inmongsan ko din talek kon sik-a, Apo.
2 Estem kod ay ilaen sak-en, Apo,
ta linisam nan liknak ya nemnem ko.
3 Adiak polos linglingan din adi manbalbaliw ay layad mo,
kanayon ay napodnoak en sik-a, Apo.
4 Adiak makikadwa sin ipogaw ay magay silbi na.
Sin aginsisingpet, adiak makibonggoy en daida.
5 Kaliliget ko din mangam-amag si lawa,
adiak makikoyog sin nakillo di ogali na.
6 Manboak ay mangipaila ay magay basol ko.
Sin pandayawak en sik-a, likedek din altar mo.
7 Mankantaak ay man-iyaman en sik-a, Apo,
ya dad-atek am-in din nakaskasdaaw ay inamag mo.
8 Laylaydek din panteam ay beey mo
ay kailaan di mankoniniing ay kinadiyos mo.
9 Adim kod pakidosas sak-en sin ad-adoy basol da,
sin pantongpalan di makapese, omilisi ka.
10 Nakasagana da ay mangamag si lawa
ya mangawat si maipasoksok en daida.
11 Ngem sak-en pay, magay basol ko.
Maseg-ang ka ta omisalakan ka, Apo.
12 Wadaak si kad-an ay nasingpa,
sin dakdake ay gimong, idaydayaw kos sik-a.