15
Maninkariite amerone paata 7 owasanketaantsi
1 Noñaake otsipa aamparentsi inkiteki. Kameetha okantaka, osheki niyokitziiwentakero. Eenitatsi ikaatzi 7 maninkari. Iri inashiyetakawori rowasanketantayetake. Tema okaatzi rantayetakeri maninkari, ari imonkaatari iñagaitziro iyatsimanka Pawa.
2 Noñaake eejatzi inkaare, oshiyawaitakawo ñaawontsi. Iro kantacha morekathaitake jiroka inkaare. Ari ikatziyayetakari oitsinampaakeriri katsimari owantaneri, rotaiyayetakero iwiyompimento ipawairiri Pawa. Iriira kaari pinkathaterone roshiyakaawo owantaneri, kaari kentakotyaawone iwairo. 3 Romampagaiyanakawoni romampaari pairani Moisés-ni. Iitaitziro “Romampaane oweja”, ikantzi:
Nowinkatharite Pawá, Shintsiperori,
Kameetha pantakeri, niyokitziiwentakero.
Pantapiintakero eeroka tampatzikari, piñaanetawo irooperori.
Eeroka pinkathariwentairi atziripaini.
4 ¿Tekaatsima pinkathataimine, thaamentaimine, raakotaimi piwairo?
Apatziro pitasorentsitzi eeroka.
Eeroka ripokashiyetai atziripaini, impinkathayetaimi.
Tema poñaagantakero osheki okameethatake pantayetakeri.
5 Noñaatzi inkiteki tasorentsipanko, ashitaryaanaka otasorentsiperotzira. 6 Ari rishitowanake tasorentsipankoki 7 maninkari owasanketantatsine. Kitamaa okantayetaka iithaare, shipakiryaa ikantaka rowaneenkataka. Roma-shipaneetakari ooro. 7 Ikanta apaani inkiteweri kaatatsiri 4, ipawakeri maninkaripaini apaani paso. Oshiyawaitakawo jaka pasoki, ari iyeekiteme iyatsimanka Pawa, kantaitachari ikañaanetzi. 8 Kachaareenkatanake tasorentsipanko, okantakaakawo rowaneenkawo Pawa eejatzi itasorenka. Tekaatsi kanterone inkye tasorentsipankoki irojatzi onkaatantapaakyaari rowasanketante maninkaripaini.